قوعام • 20 قىركۇيەك، 2019

قىستا قىسىلمايمىز با؟

16 رەتكورسەتىلدى

كەشە ۇكىمەتتىڭ ءباسپاسوز ورتالىعىندا وتكەن بريفينگ بارىسىندا ەنەرگەتيكا ۆيتسە-ءمينيسترى سۇڭعات ەسىمحانوۆ قىسقى جىلىتۋ ماۋسىمىنا دايىندىق بارىسى تۋرالى ايتىپ بەردى.

س.ەسىمحانوۆ قازاقستاننىڭ بىرىڭعاي ەلەكتر ەنەرگەتيكالىق جۇيەسى شتاتتىق رەجىمدە جۇمىس ىستەپ تۇرعانىن جەتكىزدى. ونىڭ بايانداۋىنشا، وسى جىلدىڭ 19 قىركۇيەگىندەگى مالىمەتتەرگە سايكەس رەسپۋبليكا بويىنشا ەلەكتر ەنەرگيا­سىن تۇتىنۋ 72،5 ملرد كۆت قۇرادى. بۇل – وتكەن جىلدىڭ وسى مەرزىمىندەگى دەڭگەيدەن 1،7%-عا ارتىق.

سونىمەن قاتار ۆيتسە-مينيستر ەنەر­گيا ءوندىرۋشى جانە بەرۋشى كاسىپورىن­داردى كۇزگى-قىسقى كەزەڭگە دايىنداۋ بەكىتىلگەن جوندەۋ كەستەلەرىنە سايكەس جۇرگىزىلىپ جاتقانىن اتاپ ءوتتى.

بۇگىنگە دەيىن ەلىمىزدە 5 ەنەرگوبلوك، 40 قازاندىق، 23 تۋربينادا جوندەۋ جۇ­مىستارى جۇرگىزىلگەن، 4 ەنەرگيا بلوگىندا، 28 قازاندىقتا جانە 18 تۋربينادا بۇل جۇمىستار جالعاسۋ ۇستىندە. ياعني جىلۋ بەرەتىن ءىرى كاسىپورىندارداعى جوندەۋ جۇمىستارى بەل ورتاسىنان اۋىپ وتىر.

مۇنىڭ سىرتىندا الداعى جىلىتۋ ماۋسىمىنا دايىندىق ءۇشىن ورتالىق­تاندىرىلعان جىلۋمەن قامتۋ ايماعىن­داعى 459 قازاندىقتىڭ 428 قازاندىعىنا جوندەۋ جۇمىستارى جۇرگىزىلدى. ءسويتىپ بۇل جونىندەگى جىلدىق جوسپاردىڭ 93%-ى ورىندالدى.

«سونداي-اق  21 مىڭ شاقىرىم ەلەكتر جەتكىزۋ جەلىلەرى مەن 1152 شاعىن ستان­ساعا جوندەۋ جۇمىستارى جۇرگىزىلدى، بۇل جىلدىق جوسپاردىڭ تيىسىنشە 84% جانە 92%-ىن قۇرايدى» دەدى س.ەسىمحانوۆ.

سونىمەن قاتار ول بىرقاتار وڭىر­­دە جوندەۋ جۇمىستارى كەستەدە بەلگى­لەن­گەن مەرزىمنەن كەشىكتىرىلىپ جاتقانىن اتاپ ءوتتى.

«ماسەلەن، پاۆلودار وبلىسىندا ور­نا­لاسقان «ەۋراازيالىق ەنەرگەتيكالىق كورپوراتسيا» اق ەلەكتر ستانساسى. بۇل ەڭ ءىرى مەملەكەتتىك اۋداندىق ەلەكتر ستانساسى (ماەس). ونىڭ جۇمىسىنا جەرگىلىكتى اكىمدىك جانە اكتسيونەرلەرمەن قاتار، ءبىزدىڭ مينيسترلىك كوميتەتى دە باقىلاۋ جاسايدى. بۇگىندە ەكى بلوك – №5 جانە №8 بويىنشا جوندەۋ مەرزىمى كەستەدەن قالىپ كەلەدى. جوندەۋ جۇمىستارى ماۋسىم مەن تامىز ايلارىندا اياقتالۋى ءتيىس  بولسا، ەندى تەك قازان ايىنىڭ سوڭىندا اياقتالماق. بىراق بۇل ماەس-ءتىڭ جىلۋ بەرۋگە قاتىسى جوق. بۇل تەك ەنەرگيا جۇيەسىنە اسەر ەتۋى مۇمكىن بولعان سوڭ اتاپ ءوتىپ وتىرمىن» دەدى ۆيتسە-مينيستر.

سونىمەن قاتار س.ەسىمحانوۆ ستان­سالارداعى وتىن دايىنداۋ جۇمىستارى تۋرالى دا حاباردار ەتتى.

«بىزدە كومىرمەن جىلىتىلاتىن 20 ءىرى ەنەرگەتيكالىق كاسىپورىن بار. قازىرگى تاڭدا وسى ستانسالاردا 4 ملن توننا كومىر قورى بار. بيىل كاسىپورىندار ايتارلىقتاي جاقسى جۇمىس اتقاردى. وتكەن جىلمەن سالىستىرعاندا 600 مىڭ توننا كومىر ارتىق دايىندالدى» دەدى ۆيتسە-مينيستر.

سونىمەن، بۇگىندە بارلىق ستان­سا­لاردا كومىر قورى بار. ماسەلەن، وس­كەمەن جىلۋ ەنەرگيا ورتالىعىندا قالىپتاستىرىلعان كومىر قورىنىڭ كولەمى 20 تاۋلىككە جەتۋى ءتيىس ەدى، قازىر مۇنداعى كومىر قورى 38 تاۋلىككە جەتەدى. ال كومىردى از  تۇتىناتىن بالقاش جىلۋ ەنەرگيا ورتالىعىندا ونىڭ 2-3 ايعا جەتەتىن قورى قالىپتاستى.

وسى جىلدىڭ 19 قىركۇيەگىندەگى جاع­داي بويىنشا ەنەرگيا كوزدەرىنىڭ قوي­مالارىندا مازۋت قورى 101،9 مىڭ توننانى قۇرايدى. بۇل – وتكەن جىلعى كور­سەتكىشپەن سالىستىرعاندا 24%-عا كوپ.

س.ەسىمحانوۆتىڭ ايتۋىنشا، ەنەر­گەتيكا مينيسترلىگى قوسىلعان قۇن سا­لى­عىن قوسا ەسەپتەگەندە 100 مىڭ تەڭگە باعامەن 277 مىڭ توننا كولەمىندە «الەۋ­مەتتىك» مازۋت جەتكىزۋ كەستەسىن بەكىتتى.

«جالپى العاندا، الداعى جىلۋ بە­رۋ ماۋسىمىنا دايىندىق تۇراقتى رە­جىمدە ءجۇرىپ جاتىر» دەدى بۇل جونىندە ەنەرگەتيكا ۆيتسە-ءمينيسترى.

سونىمەن قاتار جىلۋ جەلىلەرىنىڭ تەمپەراتۋرالىق كەستەلەرى ەنەرگەتيكا مينيسترلىگى مەن ەنەرگەتيكالىق قادا­عالاۋ كوميتەتىنىڭ سايتتارىندا جاريا­لانعانىن اتاپ ءوتتى. اتالعان كەستەلەر ساق­تالماعان جاعدايدا، ەڭ الدىمەن، تەمپە­راتۋرالىق جاعدايدى قامتاماسىز ەتەتىن جىلۋ بەرۋشى ۇيىمدارمەن بايلا­نىس ورناتۋ قاجەت. جەرگىلىكتى اكىمدىك­پەن بىرگە قاجەتتى ورىندارعا بارىپ، سە­­بەپتەرىن انىقتايتىن كوميسسيالار قۇ­رى­لادى.

«مۇنداي جۇگىنۋلەر ەنەرگەتيكالىق قاداعالاۋ كوميتەتىنە دە كەلىپ جاتادى. ونداي كەزدە ءبىزدىڭ اۋماقتىق دەپار­تا­مەنتتەرىمىز ماسەلەنى دەرەۋ انىقتاۋعا بارادى. سوندىقتان دا اۋماقتىق ەنەرگەتيكالىق قاداعالاۋ دەپارتامەنتتەرىنە قوسىمشا حابارلاسۋعا بولادى. بارلىق مالىمەتتەر مەن كوورديناتتار سايتتا جاريالانعان» دەدى ۆيتسە-مينيستر.

سوڭعى جاڭالىقتار

اۋىز سۋ ساپاسى قالىپقا كەلتىرىلدى

قازاقستان • بۇگىن، 18:04

انا ءتىلى – ارىڭ بۇل...

رۋحانيات • بۇگىن، 13:10

كۇرەس: العاشقى كۇنى ءۇش قولا

كۇرەس • بۇگىن، 09:00

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار