شاھار باسشىسىنىڭ ايتۋىنشا, بۇل سەكتوردا ەكونوميكالىق تۇرعىدان بەلسەندى استانالىقتاردىڭ 68%-ى ەڭبەك ەتىپ كەلەدى. بۇل شامامەن 360 مىڭ ادام. شاعىن جانە ورتا بيزنەستەگى ءوندىرىستىڭ كولەمى 10 جىلدىڭ ىشىندە 800 ملرد تەڭگەدەن 5 ترلن تەڭگەگە ۇلعايعان. ينۆەستيتسيانىڭ 90%-ى جەكەمەنشىك سەكتورعا تيەسىلى. اسىرەسە بيزنەستىڭ الەۋمەتتىك باعىتتاعى ناتيجەلەرى كوڭىلدەن شىعادى, دەيدى اكىم. ماسەلەن, ءبىلىم سالاسىندا 23 مىڭ ورىنعا شاقتالعان 213 جەكەمەنشىك بالاباقشا جانە 13 مەكتەپ جۇمىس ىستەپ تۇر. سونداي-اق دەنساۋلىق ساقتاۋ سالاسىندا 14 جەكە ەمحانا حالىققا قىزمەت كورسەتۋدە.
– مۇنىڭ بارلىعى شاعىن جانە ورتا بيزنەستىڭ جەمىسى. الەۋمەتتىك ينفراقۇرىلىمعا سۇرانىس ارتىپ كەلەدى. ويتكەنى ەلوردادا حالىقتىڭ سانى ءوسۋ ۇستىندە. بۇگىندە باس قالادا 1 ملن 100 مىڭ ادام تۇرىپ جاتىر. بۇل جاقسى نارىقتىڭ قالىپتاسقانىن ايعاقتايدى. دەمەك, شاعىن جانە ورتا بيزنەستىڭ الەۋەتىن ارتتىرۋعا زور مۇمكىندىك تۋىپ وتىر. «اتامەكەن» ۇلتتىق كاسىپكەرلەر پالاتاسىمەن بىرلەسىپ, ميكروبيزنەسكە ارنالعان «1000 ورىن» جوباسىن قولعا الدىق. ازىرگە باستاماسى جامان ەمەس. بۇل باعىتتاعى جۇمىس ارمەن قاراي جالعاسادى. سونىمەن قاتار كاسىپكەرلەر پالاتاسىمەن الەۋمەتتىك از قامتىلعان جانداردىڭ بالالارىن وقۋ ماۋسىمىنا دايىنداۋ ءۇشىن «جاپپاي وقۋ» باعدارلاماسىن پىسىقتادىق. ءبىز 10 جەڭىل ونەركاسىپ پالاتالارىن تاڭداپ, مەكتەپ فورماسىنا تاپسىرىس بەردىك. وسىلايشا ءبىر جاعىنان اتا-انالارعا قولداۋ كورسەتسەك, ەكىنشى جاعىنان وتاندىق تاۋار وندىرۋشىلەردىڭ جۇمىسىن جانداندىردىق. 1-ءشى يندۋستريالىق پاركتىڭ ماسەلەسىنە كەلسەك, ونىڭ اۋماعى 97%-عا تولىق. قازىر ونداعى جۇمىس ويداعىداي جۇرگىزىلىپ جاتىر. ەندى كاسىپكەرلەر پالاتاسىمەن بىرلەسىپ, جاڭا يندۋستريالىق پاركتى قۇرىپ جاتىرمىز. جەرى بەلگىلەنىپ قويعان. ونىڭ اۋماعى 400 گەكتارعا جەتەدى. قاۋلى شىقتى. ينجەنەرلىك ينفراقۇرىلىم قۇجاتتارى دايىندالىپ جاتىر, دەدى ا.كولگىنوۆ.
ىسكەر جانداردىڭ قۇرىلتايىندا وزەكتى پروبلەمالار دا نازاردان تىس قالمادى. نۇر-سۇلتان قالاسى كاسىپكەرلەر پالاتاسىنىڭ ديرەكتورى المات ءجۇنىسوۆ بايانداعانداي, «ەڭبەك» باعدارلاماسىنا بولىنەتىن قارجى تىم ماردىمسىز. انىعىن ايتقاندا, جىل سايىن شاعىن نەسيەلەۋگە 800 ملن تەڭگە ءبولىنىپ كەلەدى. الايدا, سالانى ىلگەرىلەتۋگە 5 ملرد تەڭگە قاجەت, دەدى قالالىق پالاتانىڭ باسشىسى. سول سەبەپتى الداعى جىلى قالالىق بيۋدجەتتە بۇل سوما قاراستىرىلسا دەگەن ۇسىنىسىن ءبىلدىردى.
– بيزنەس سۋبەكتىلەرىنىڭ سانى وسكەنىنە قاراماستان ساۋدا سالاسىندا جابىلىپ جاتقان كاسىپورىندار از ەمەس. بۇل ماڭىزدى ماسەلە دەپ ەسەپتەيمىز. قالانىڭ اۋماعى ۇلعايىپ بارا جاتقانىن ەسكەرسەك, شەتكى اۋدانداردى دا شاعىن جانە ورتا بيزنەسكە تارتقان ءجون. بۇل ورايدا ينفراقۇرىلىمدى دامىتىپ, بيزنەسكە ارنالعان ينتەراكتيۆتى پورتال قۇرۋ قاجەت. مۇندا كاسىپكەرگە ين-
ۆەستيتسيانى قاجەت ەتەتىن كاسىپورىندار جايلى اقپاراتپەن تانىسۋعا مۇمكىندىك تۋادى. بۇل ءوز كەزەگىندە بيزنەسكە ۇزاق مەرزىمدى جوسپار قۇرۋعا جانە ءتيىمدى جوبالاردى جۇزەگە اسىرۋعا جول اشادى, – دەدى ا.ءجۇنىسوۆ.
كونفەرەنتسياعا قاتىسقان «اتامەكەن» ۇكپ-نىڭ تورالقا توراعاسى تيمۋر ق ۇلىباەۆ «بيزنەسكە ارنالعان ۇكىمەت» ءبىر تەرەزە قاعيداتى – بيزنەسكە قولداۋ كورسەتۋدە بارلىق مەملەكەتتىك ورگاندار مەن كۆازيمەملەكەتتىك ينستيتۋتتاردى ءبىر ورتالىققا شوعىرلاندىرۋعا مۇمكىندىك بەرەتىنىن ايتتى.
ايتا كەتەيىك, بيىل ۇكىمەتتىڭ تاپسىرماسىمەن «اتامەكەن» ۇكپ جانىنان جەڭىلدىكپەن نەسيەلەۋ جونىندەگى جوبالىق القا قۇرىلعان ەدى. بۇل ارقىلى ەلوردادا قارجى ينستيتۋتتارى
7,7 ملرد تەڭگە سوماسىنداعى 5 جوبانى ماقۇلدادى. ەكىنشى دەڭگەيلى بانكتەردىڭ قاراۋىنا 5,1 ملرد تەڭگەنى قۇرايتىن 15 جوبا جىبەرىلدى.
