قوعامدا قوردالانعان ماسەلەلەردى, ارينە از ۋاقىت ىشىندە شەشۋ وڭايعا سوقپايدى. تىپتەن, ونجىلدىقتار بويى كۇرمەۋىن شەشەتىن كۇردەلى ماسەلەلەر بار. پرەزيدەنت قاسىم-جومارت توقاەۆ مەملەكەت باسشىلىعىنا كەلگەن كۇننەن بەرگى ارالىقتا ەلدەگى الەۋمەتتىك ماسەلەلەرگە بىردەن نازارىن اۋداردى. پرەزيدەنتتىڭ ءا دەگەننەن الەۋمەتتىك سالاداعى ماسەلەلەردى شەشىپ, كىشى جانە ورتا بيزنەسكە كوڭىل اۋدارا باستاعانى جۇرتشىلىقتىڭ پرەزيدەنتكە دەگەن سەنىمىن ارتتىرا تۇسكەندەي. ال بۇگىنگى جاعدايدا حالىقتىڭ باسقارۋ جۇيەسىنە دەگەن سەنىمى اسا ماڭىزدى. سوندا عانا رەفورمالار كەزەڭ-كەزەڭىمەن جۇزەگە اسا باستايدى. ميكرو جانە شاعىن بيزنەس ەكونوميكانى العا سۇيرەيتىن تەتىكتەردىڭ ءبىرى دەيتىن بولساق, سالىق جۇيەسىنە ءۇش جىلعا موراتوري جاريالانۋىنىڭ ءوزى كاسىپكەرلەرگە ۇلكەن جەڭىلدىك بەرەدى.
پرەزيدەنتتىڭ مۇعالىمدەردىڭ مارتەبەسىن كوتەرۋگە بايلانىستى باستاماسىن تولىق قۇپتايمىن. مۇعالىمى قانداي بولسا, بالانىڭ ءبىلىمى دە سول دارەجەدە بولادى. ەگەر دە مۇعالىمنىڭ تابىسى تومەن بولىپ, وتباسىنىڭ كوكەيكەستى ماسەلەسىمەن اينالاسىپ جۇرسە, بولاشاق ۇرپاققا قانداي ءبىلىم بەرە الادى؟.. سوندىقتان دا پرەزيدەنتتىڭ پەداگوگ مارتەبەسىن زاڭمەن بەكىتىپ, ءبىلىم سالاسىنا ۇلكەن قولداۋ كورسەتۋى كەلەشەگىمىزدىڭ جاعدايىن ويلاۋى دەر ەدىم.
مەملەكەت باسشىسىنىڭ زەينەتاقى سالاسىنا كوڭىل ءبولۋى, سالانى ەكونوميكاعا قاراي جۇمىلدىرۋ ماسەلەسىن كوتەرۋى كەلەشەگىمىزگە, قارت ادامدارعا دەگەن قامقورلىعىنىڭ نىشانى. ال پرەزيدەنتتىڭ كوپپارتيالىق جۇيەگە جول اشىپ, جاعداي جاسايمىز دەۋى اشىق ويلاردىڭ ايتىلىپ, قوعامداعى تۇيتكىلدى ماسەلەلەردى كوتەرۋگە باستاعان ماڭىزدى قادامى دەپ قابىلدايمىن. سونداي-اق ميتينگ وتكىزۋگە رۇقسات بەرۋى, ءاربىر ازاماتتىڭ ويىمەن ساناسىپ, ولاردىڭ پىكىرىنە قۇرمەتپەن قاراۋىنا مەڭزەيدى. سوندىقتان دا پرەزيدەنت اتاپ وتكەنىندەي, ميتينگىلەر زاڭ اياسىندا, ءوز رەتىمەن, تارتىبىمەن ءوتۋى قاجەت.
پرەزيدەنت سونىمەن قاتار ايماقتارعا ساپارى بارىسىندا جەرگىلىكتى باسقارۋ ورگاندارىنا الەۋمەتتىك سالاعا بەتبۇرىس جاساپ, حالىقتىڭ جاعدايىن كوتەرۋگە شاقىرىپ جۇرگەنىنىڭ كۋاسى بولىپ ءجۇرمىز. سونىڭ ارقاسىندا قازىرگى كەزدە ايماقتارداعى قوردالانعان ماسەلەلەر كوتەرىلىپ, ءتيىستى ورىنداردىڭ نازارىن اۋدارا باستاعانداي. وسى تۇرعىدا ايتارىم, بيلىك قۇرىلىمدارىندا جاس مامانداردى دايارلاۋ, ءبىلىمدى, وزىق ويلى ازاماتتاردى تاربيەلەپ, ورتاعا تارتۋ ەلىمىزدەگى احۋالدىڭ وزگەرۋىنە زور ىقپالىن تيگىزەرى ءسوزسىز.
بۇگىندە قازاقستاننىڭ سىرتقى ساياساتتاعى ءرولىنىڭ ەل ىشىندەگى تۇراقتىلىققا تىكەلەي اسەرىمەن بايلانىستى ەكەندىگىن ايتا كەتكەنىمىز ءجون. پرەزيدەنت قاسىم-جومارت توقاەۆ تاجىريبەلى ديپلومات رەتىندە بۇل باعىتتاعى ماسەلەلەردى دە ءجىتى باقىلاۋدا ۇستاپ وتىر. بۇگىندە الەمدەگى جاعداي تۇراقتى ەمەس. امەريكا, ەۋروپا, قىتاي, رەسەي, ۋكراينا ەلدەرىندەگى بولىپ جاتقان جاعدايلاردىڭ قازاقستانعا اسەرى بار. پرەزيدەنتتىڭ جاقىندا قىتايعا جاساعان ساپارى بارىسىندا دا كوپتەگەن تۇيتكىلدى ماسەلە ايتىلدى. سوندىقتان دا كورشى مەملەكەتتەرمەن تاتۋلىق ماسەلەسى – ەلىمىز ساياساتىنىڭ باستى تەتىگى, ياعني سىرتقى ساياساتتا تاتۋلىعىمىز, ىشكى تۇراقتىلىعىمىزدىڭ كەپىلى. بۇگىندە الەم بىزگە كوز تىگىپ, جاڭا پرەزيدەنتتىڭ ءىس-قيمىلىن ءجىتى باقىلاۋدا ۇستاپ وتىر. سوندىقتان دا ەل بولىپ پرەزيدەنتىمىزدىڭ باستامالارىنا قولداۋ بىلدىرسەك, قازاقستان الەمدىك دارەجەدەگى بيىكتەن كورىنە الادى. ءارى پرەزيدەنت باستاماسىن جىلدام, ساپالى ءارى ۋاقتىلى ىسكە اسىرساق, كوپ نارسەدەن ۇتامىز.
سەيداحمەت قۇتتىقادام,
ساياساتكەر, قوعام قايراتكەرى
الماتى
