القالى جيىنعا قاتىسۋشىلار الدىندا قاراعاندى وبلىسى اكىمىنىڭ ورىنباسارى ابزال نۇكەنوۆ قۇتتىقتاۋ ءسوز سويلەدى. «ادەبيەت – بۇل حالىقتىڭ تولقۇجاتى», دەپ اتاپ وتكەن ول جاڭا تەحنولوگيالار عاسىرىندا كىتاپ وقۋدىڭ ادام ءومىرىنىڭ بارلىق قىرلارىندا ماڭىزدى ءرول اتقاراتىنىنا نازار اۋداردى.
– زاماناۋي ادەبيەت جاستارعا تارتىمدى بولۋى كەرەك. «رۋحاني جاڭعىرۋ» باعدارلاماسىنىڭ كوزدەگەنى دە وسى, – دەدى وبلىس اكىمىنىڭ ورىنباسارى.
ودان كەيىن ءسوز العان قازاقستان جازۋشىلار وداعى توراعاسىنىڭ ورىنباسارى باقىت بەدەلحان ۇيىم توراعاسى ۇلىقبەك ەسداۋلەتتىڭ قۇتتىقتاۋ حاتىن وقىپ بەردى. سونىمەن قاتار ول جەرگىلىكتى اقىن جانات جاڭقاش, ولجاس قاسىم جانە باسقا دا جاس ادەبيەتشىلەرگە قازاقستان جازۋشىلار وداعىنىڭ مۇشەلىك بيلەتتەرىن تابىس ەتتى.
– تاياۋدا استانامىزدا ازيا ەلدەرى جازۋشىلارىنىڭ ۇلكەن فورۋمى ءوتتى. قاراعاندى فورۋمىن سونىڭ جالعاسى دەپ باعالاۋعا بولادى. بۇل جيىندى ادەبيەتشىلەردىڭ وتە ۋاقتىلى ۇيىمداستىرىلعان جانە اسا قاجەتتى كەزدەسۋى دەپ سەنىممەن ايتۋعا بولادى. ءبىز ءبارىمىز بىرگە زاماناۋي ادەبيەتتىڭ بولاشاعىن انىقتاي الامىز دەپ ويلايمىن, – دەي كەلە باقىت بەدەلحان فورۋمدى ۇيىمداستىرعان وبلىس باسشىلىعىنا العىس سەزىمىن ءبىلدىردى.
فورۋمدا ءسوز سويلەگەن اقىن يسرايل ساپارباي «رۋحاني جاڭعىرۋ» باعدارلاماسىنىڭ ءمان-ماڭىزىنا باسا نازار اۋداردى.
– «رۋح» دەگەنىمىز ول – ادامنىڭ جان دۇنيەسى. ءبىز ونى دۇرىس ءتۇسىنۋىمىز كەرەك. بۇل بۇكىل حالىقتىڭ رۋحاني جاڭعىرۋىن بىلدىرەدى, – دەدى اقىن.
سونداي-اق القالى جيىندا ساكەن سەيفۋلليننىڭ 125 جىلدىعى مەن «Egemen Qazaqstan» گازەتىنىڭ 100 جىلدىق مەرەيتويىنا بايلانىستى باسىلىم باسشىسى دارحان قىدىرالى بايانداما جاسادى.
– حالقىمىزدىڭ ماقتانىشى ساكەن سەيفۋلليننىڭ 125 جىلدىعى بيىل ءوزىنىڭ 100 جىلدىق مەرەيتويى ۇستىندەگى «Egemen Qazaqstan» ءۇشىن ەلەۋلى وقيعا. سەبەبى اقىن كەزىندە «ەڭبەكشى قازاق» – قازىرگى «Egemen Qazaqstan» گازەتىندە ەڭبەك ەتكەن. باسىلىم بەتىندە وزەكتى ماسەلەلەردى كوتەردى. مىسالى گازەتتە «قازاق» اتىن قايتارۋ, قازاق ءتىلىنىڭ مارتەبەسىن كوتەرۋ تۋرالى وتكىر ماتەريالدار جازعانى بەلگىلى. احاڭنىڭ – احمەت بايتۇرسىن ۇلىنىڭ 50 جىلدىعىن كەڭ كولەمدە اتاپ وتۋگە باستاماشى بولعان. ياعني, ساكەندى ناعىز الاششىل تۇلعا دەپ اتاۋعا ابدەن بولادى, – دەدى دارحان قىدىرالى.
القالى جيىننىڭ اشىلۋىندا قوناقتار الدىندا جاقسىكەلدى كەمالوۆ, سەرجان مۇسايىن سياقتى بەلگىلى ونەرپازدار ساكەننىڭ, قاسىمنىڭ اندەرىن شىرقادى.
فورۋمنىڭ سالتاناتتى اشىلۋىنان كەيىن «قازىرگى زامان قازاق ادەبيەتىنىڭ بەت-بەينەسى جانە ءرولى» اتتى تاقىرىپتا دوڭگەلەك ۇستەل ۇيىمداستىرىلدى. مۇندا ءسوز سويلەگەن اقىندار سەرىك اقسۇڭقار ۇلى, گۇلنار سالىقباي, باقىت بەدەلحان, مارالتاي رايىمبەك ۇلى, تاناكوز تولقىنقىزى, «Egemen Qazaqstan» گازەتىنىڭ باسشىسى دارحان قىدىرالى, جازۋشى اياگۇل مانتاي, ادەبيەتتانۋشى جانسايا جارىلعاپوۆ قازىرگى قازاق ادەبيەتىندەگى قاداۋ-قاداۋ ماسەلەلەرگە توقتالىپ, وزدەرىنىڭ قۇندى ۇسىنىستارىن ايتتى.
مىسالى دارحان قىدىرالى ادەبيەتتە سىن جانرىن دامىتۋ كەرەكتىگىن قوزعاسا, اقىن سەرىك اقسۇڭقار ۇلى قالاماقى ماسەلەسىنە نازار اۋداراتىن كەز جەتكەنىن ايتتى. تاناكوز تولقىنقىزى اۋدارما جانرىنىڭ ءبىزدىڭ ادەبيەت ءۇشىن اسا ماڭىزدى جانر ەكەندىگىنە باسا ءمان بەردى. ال عالىم جانسايا جارىلعاپوۆ وسىنداي جيىندارعا ادەبيەتتانۋشى ماماندار دا قاتىسسا دەگەن تىلەگىن ءبىلدىردى.
جالپى اقىن-جازۋشىلار باس قوسقان جيىن اسا قىزىقتى جانە پايدالى پىكىرتالاس ۇردىسىمەن ءوربىدى. فورۋم قوناقتارى ايتقان كوكەيگە قونىمدى يدەيالار مەن ۇتىمدى ۇسىنىستاردىڭ جيىننىڭ ماڭىزىن ارتتىرا تۇسكەنىن دە اتاپ وتكەن ءلازىم.
بۇگىن فورۋم قوناقتارى قاراعاندىنىڭ ماڭىنداعى دولينكا كەنتىندە ورنالاسقان ساياسي قۋعىن-سۇرگىن قۇرباندارىن ەسكە الۋ مۇراجايىنا ەكسكۋرسيا جاسايدى. بۇدان بولەك اقىن-جازۋشىلار كەنشىلەر استاناسىنداعى ستۋدەنت جاستارمەن كەزدەسۋلەر وتكىزەدى. سونداي-اق فورۋم قوناقتارى سەمينارلار مەن ترەنينگتەرگە, شەبەرلىك ساباقتارى جانە كىتاپ تۇساۋكەسەرلەرىنە قاتىسادى. باعدارلاما جوسپارى بويىنشا القالى جيىننىڭ جۇمىسى جەرگىلىكتى ونەرپازدار كۇشىمەن قويىلاتىن گالا-كونتسەرتپەن تۇيىندەلمەكشى.
قاراعاندى
