ايماقتار • 19 قىركۇيەك، 2019

تۇركىستان وبلىسىندا ماقتا تەرىمى باستالدى

88 رەتكورسەتىلدى

تۇركىستان وبلىسىنىڭ ماقتاارال اۋدانىندا ماقتا تەرىمى باستالدى. ج.نۇرلىباەۆ اۋىلدىق وكرۋگىنە قاراستى «نۇرجان» شارۋا قوجالىعى 5،8 گەكتار جەرگە «ماقتاارال 47/27» ماقتا سورتىن ەككەن. ماقتا تەرىمىن العاش بولىپ باستاعان قوجالىق 27 تسەنتنەردەن ءونىم الۋدا.

«اق التىن» تەرىمىنە شىققان جەرگىلىكتى اۋىل تۇرعىندارىنا كەلىسىنە 30 تەڭگە تولەنۋدە. جينالعان ءونىم «قاراقىر» ماقتا قابىلداۋ پۋنكتىنە وتكىزىلمەك. بىلتىر اۋداندا ماقتا وندىرەتىن 5 زاۋىت جانە ماقتا قابىلدايتىن 69 بەكەت شارۋالارعا قىزمەت كورسەتكەن بولاتىن. بيىل دا بۇل ءوندىرىس ورىندارى جيىن-تەرىم ناۋقانىنا دايىن. كۇزگى دالا جۇمىستارىن جۇرگىزۋگە  مەملەكەت تاراپىنان جەڭىلدەتىلگەن باعامەن بولىنگەن 4420 توننا جانار - جاعارماي شارۋالارعا تاراتىلۋدا.

جالپى بيىل ماقتاارالدىق شارۋالار 38 مىڭ گەكتاردان اسا جەرگە ماقتا ءشيتىن سەپكەن. بىلتىر اۋا-رايىنىڭ قولايسىزدىعى مەن ماقتا زيانكەستەرىنىڭ كوپ بولۋىنا قاراماستان، اق التىننان 96 مىڭ توننا ءونىم جينالعان-دى. ورتاشا ونىمدىلىك 25 تسەنتنەرگە ارەڭ جەتكەن بولاتىن. ال، بيىل بۇل مەجەدەن اسۋ جوسپارلانىپ وتىر. «قازىرگى تاڭدا ماقتا القاپتارىندا جاپىراقتاردى قۋراتۋ جۇمىستارى باستالىپ كەتتى. اۋدان بويىنشا 7842 گەكتار عانا ماقتالىق القاپ دەفولياتسيالانعان. بۇل - وتە تومەن كورسەتكىش. سوندىقتان شارۋالارعا ءتۇسىندىرۋ جۇمىستارىن بارىنشا جۇرگىزۋدەمىز. كۇنى كەشە عانا اۋدان اكىمى باقىت اسانوۆتىڭ باستاماسىمەن ءدال وسى ماسەلە بويىنشا سەمينار-كەڭەس وتكىزدىك»، - دەيدى اۋداننىڭ اۋىل شارۋاشىلىعى ءبولىمىنىڭ باسشىسى وسەر مىرزامدانوۆ.

ناۋقانعا دايىندىق بارىسىندا كومبايندارعا جوندەۋ جۇمىستارى جۇرگىزىلگەن. قوسىمشا اۋدانعا اقش-تان 16 «دجون-دير» ماقتا تەرىم كومباينى ساتىپ الىنعان. جالپى جىل باسىنان بەرى ماقتاارالدىق ديقاندار ليزينگكە جانە ءوز قارجىلارىنا 414 ميلليون تەڭگەگە 40 جاڭا تەحنيكا العان.

 

 

تۇركىستان وبلىسى

 

سوڭعى جاڭالىقتار

اۋىز سۋ ساپاسى قالىپقا كەلتىرىلدى

قازاقستان • بۇگىن، 18:04

انا ءتىلى – ارىڭ بۇل...

رۋحانيات • بۇگىن، 13:10

كۇرەس: العاشقى كۇنى ءۇش قولا

كۇرەس • بۇگىن، 09:00

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار