Maqpalsher - لوندوندا

كوپ نازارىنا ۇسىنىلعان «AUA» كونتسەپتۋالدى كونتسەرتى – ادامنىڭ ىشكى جان-دۇنيەسى مەن ءومىر سىرىنا ءۇڭىلۋى، بوستاندىق پەن ەرىك جولىنداعى سونى ىزدەنىستەرى. وسىعان دەيىن قازاق تىڭدارماندارىنىڭ جۇرەگىنە تەرەڭ بويلاعان ونىڭ ماقامدى جىرلارى تالعامپاز باتىس وقىرماندارى تاراپىنان دا زور قىزىعۋشىلىققا يە بولدى. جوبا اۆتورى، پروديۋسەرى – اقىن ماقپال جۇمابايدان بولەك شىعارماشىلىق ۇجىم قاتارىندا مۋزىكالىق جەتەكشى بەيبىت اقوش، مۋزىكانتتار ورالحان سادۋاقاس، رۋسلان جۋربين، باقىت جەتەنوۆ، ءالىبي ءابدىراحمانوۆتار مۋزىكالىق سۇيەمەل جاساپ، كوركەمدىك تۇتاستىقتا ونەر كورسەتتى. اۆتور وسىناۋ كەشكە ارقاۋ بولعان «AUA» فيلوسوفياسىن بىلاي تۇسىندىرەدى: «ومىرلەر، ادامدار، تاعدىرلار، سوزدەر، ويلار، سەزىمدەر، وقيعالار، قۇبىلىستار، قوعامدار، زاماندار، ءبارى-ءبارى تەك اۋادا عانا قالادى. باسقا ەشتەڭە ماڭگىلىك ەمەس، تەك سولاردى سىڭىرگەن اۋا عانا ماڭگىلىك. ەندى مەن اۋانى عانا تىڭدايمىن، اۋانى عانا ەستيمىن، اۋاعا عانا ايتامىن جانە اۋانى ءبارى ءۇشىن كەشىرەمىن. بۇل – ومىرىمدەگى ەڭ ۇلكەن تاۋەكەلدەرىمنىڭ ءبىرى». ول ءوز شىعارماشىلىعىنا Maqpalsher دەگەن اتاۋ بەرىپ، بىرنەشە جىلدان بەرى مۋزىكالىق-پوەتيكالىق كونتسەپتسيا بويىنشا جۇمىس ىستەپ كەلەدى. ونەرى فيلوسوفيالىق، دۇنيەتانىمدىق  ويعا قۇرىلىپ، ادام جانىنىڭ تەرەڭ قاتپارلارىنا بويلايدى.

– لوندون ساحناسىندا العاشقى ولەڭىمدى ورىنداپ تۇرعان ساتتە ادامداردىڭ كوزىنەن شىن سەزىم مەن تۇسىنىستىك كوردىم. سول ساتتە جان تىنىشتىعىن سەزدىم. سوندىقتان كەش بويى ەش الاڭسىز ونەر كورسەتتىم. كونتسەرت اياقتالعان سوڭ قوناقتار تاعى دا ءبىر ساعاتتاي قالىپ، كەشتى، كەشتەگى ويلاردى، Maqpalsher-ءدى تالقىلادى. بىرنەشە ادام ءۇنسىز عانا كەلىپ قۇشاقتادى. لوندوننىڭ كونتسەپتۋالدى كونتسەرتتەن، Maqpalsher-دەن ماعىنا كورگەنى – بۇل ۇلكەن ساپاردىڭ تەك باسى ەكەنىن سەزدىردى، – دەگەن ماقپال تاۋەكەلشىل شەشىمىنە قۇرمەتپەن قاراپ، قولداۋ كورسەتكەن شىعارماشىلىق كومانداسى مەن اتا-اناسىنا، وتباسىنا العىسىن ءبىلدىردى.

ماقپال جۇمابايدىڭ كونتسەرت بارىسىندا ورىندالعان جىرلارىنىڭ ءماتىنى الدىن-الا اعىلشىن تىلىنە اۋدارىلىپ، كەش قوناقتارىنا كىتاپشا رەتىندە تارتۋ ەتىلىپ، لەد ەكران ارقىلى تىكەلەي اۋدارماسى قاتار كورسەتىلدى.

ءماتىندى اعىلشىن تىلىنە اۋدارعان بەلگىلى اقىن، كاسىبي اۋدارماشى دەۆيد  كۋك ( ۇلىبريتانيا) سالتاناتتى كەشكە قاتىسىپ، اقىن شىعارماشىلىعىنا قاتىستى جىلى پىكىردە ەكەنىن جەتكىزدى.

– مەنىڭ قازاق پوەزياسىمەن ازعانتاي تانىستىعىمنان بىلەتىنىم، بۇل – مۋزىكالىق ءتىل، اۋدارۋ كەزىندە وسىنى قاتتى ەسكەردىم. قازاق تىلىنە ءتان ىرعاعىن ساقتاي وتىرىپ، اعىلشىن تىلىندە جاقسى ءبىر دۇنيە جاساعىم كەلدى. سوڭعى ءبىر جىلدا قازاق پوەزياسىنىڭ اعىلشىن تىلىندەگى نۇسقالارىن شىعارۋعا قاتىسىپ كەلەمىن. ماقپالدىڭ ولەڭدەرىن تۇسىنۋىمە كەلەتىن بولساق، ماعان ونىڭ قورشاعان ورتاعا قاتىستى ماسەلەلەرى قاتتى اسەر ەتتى. ماقپالمەن سويلەسىپ وتىرعاندا بايقاعانىم، ونىڭ انا تۋرالى ايتىپ وتىرعانى ول جەر-انا. مۋزىكالىق جانە ىشكى ريفمالىق رەڭك بەرۋگە كوپ ۋاقىت جۇمسادىم. ماقپالدىڭ جىرلارى كەز-كەلگەن تىلدە تۇسىنۋگە بولاتىن ماڭىزدى ەموتسيالار مەن ماڭىزدى يدەيالار تۋرالى شىنايى ولەڭدەر، – دەيدى ول.

اتالعان كونتسەرتكە قازاقستان رەسپۋبليكاسىنىڭ ۇلىبريتانيا جانە سولتۇستىك يرلانديا بىرىككەن كورولدىگىندەگى ەلشىلىگى قولداۋ كورسەتتى. كەشتىڭ قۇرمەتتى قوناقتارىنىڭ قاتارىندا قازاقستان ەلشىلىگىنىڭ وكىلدەرى، كورنەكتى اعىلشىن ونەرتانۋشىلارى، تانىمال ادەبيەتشىلەر مەن اۋدارماشىلار، ۇلىبريتانيادا تۇراتىن قازاقتار، ۋنيۆەرسيتەت ستۋدەنتتەرى جانە جەرگىلىكتى جىرسۇيەر قاۋىم قاتىستى.