ايماقتار • 19 قىركۇيەك، 2019

بقو-دا پايدالانىلماعان جەر تەلىمى مەملەكەتكە قايتارىلادى

76 رەتكورسەتىلدى

ەلىمىزدە ءىرى جەر يەلەنۋشىلەردىڭ، جەردى ماقساتتى پايدالانباي وتىرعان لاتيفۋنديستەردىڭ اتى-ءجونىن كوپشىلىككە جاريا ەتۋ تۋرالى ۇسىنىس بۇعان دەيىن دە ايتىلىپ قالاتىن. باتىس قازاقستان وبلىسىنىڭ اكىمى عالي ەسقاليەۆ بەرىلگەن جەردى پايدالانباي، نە مەملەكەت مەنشىگىنە قايتارماي وتىرعان تۇلعالاردىڭ اتى-ءجونىن باق-تا جاريالاۋدى تاپسىردى.

وڭىردە پايدالانىلماي جاتقان جەرلەردى انىقتاۋ جانە قايتارۋ بويىنشا جيىن وتكىزگەن باتىس قازاقستان وبلىسىنىڭ اكىمى عالي ەسقاليەۆ وسىلاي دەدى. شارۋا قوجالىقتارى مەن مەملەكەتتىك قۇرىلىمداردىڭ باسشىلارى شاقىرىلعان بۇل جيىنعا بقو پروكۋرورى ج. ومىراليەۆ قاتىستى.

باتىس قازاقستان وبلىسىنىڭ جالپى اۋماعى 15 ملن. 133 مىڭ گەكتاردى قۇرايدى. ونىڭ ىشىندە اۋىل شارۋاشىلىعى ماقساتىنداعى جەردىڭ كولەمى – 6 907،3 مىڭ گا. جەرگىلىكتى اتقارۋشى قۇرىلىمدار وبلىستىق پروكۋراتۋرامەن بىرلەسىپ سوڭعى جىلدارى جالپى اۋماعى 1 ملن. 532 مىڭ گا بولاتىن 1805 جەر تەلىمى پايدالانىلماي جاتقانىن انىقتادى. بۇگىندە بۇل جەرلەردىڭ 1122 مىڭ گەكتارى مەملەكەت مەنشىگىنە قايتارىلدى، شامامەن 400 مىڭ گا جەردى يەلەرى وزدەرى يگەرەتىن بولدى.

- كەشە سولتۇستىك قازاقستان وبلىسىنا جۇمىس ساپارى بارىسىندا پرەزيدەنت قاسىم-جومارت توقاەۆ اۋىل شارۋاشىلىعى ماقساتىنداعى جەرلەردى شارۋاشىلىق اينالىمعا قوسۋ قاجەتتىلىگىنە باستى نازار اۋداردى. ءبىز اگرارلىق وبلىس سانالامىز، سوندىقتان، جەر – ءبىزدىڭ ءوڭىر ءۇشىن ەڭ ماڭىزدى ماسەلەنىڭ ءبىرى. قولدا بار مالىمەتتەر بويىنشا يەلەرى ءتيىستى جۇمىستى جۇرگىزبەي وتىرعان انىقتالماعان جەر تەلىمدەرى بىزدە جەتەرلىك. 1980 جىلدارى بىزدە 1،5 ملن. گا استام ەگىستىك جەر بولسا، قازىر بۇل كورسەتكىش بار-جوعى 540 مىڭ گا قۇرايدى. اۋداندىق جەرلەردەگى شارۋالار مەملەكەتتى الداپ، ەگىستىكتىڭ شەتكى بولىكتەرىنە ەگىن ەككەن كەيىپ تانىتىپ، وتىرىك ەسەپ تاپسىراتىندار دا بار ەكەندىگىن ايتادى. ءوزىنىڭ بەدەلىن پايدالانىپ، ءبىزدىڭ قىزمەتكەرلەرگە قىسىم كورسەتۋ ارقىلى وزدەرىنە جەردى كەرى قايتارۋ بويىنشا زاڭدى شارالار قولدانباۋدى تالاپ ەتەتىندەر دە بار، – دەدى اكىم عالي ەسقاليەۆ.

جيىندا وڭىردەگى ەڭ ەگىستى ءوڭىر – بايتەرەك اۋدانى بويىنشا جەرلەردىڭ جاي-كۇيى تالقىلاندى. ماسەلەن، «ناسىم»، «تۋرسۋن ي ك» جشس-لارى سەكىلدى جەر يەلەرى ءبىراز ۋاقىتتان بەرى 18 مىڭ گا ەگىستىكتى يگەرمەي كەلىپتى.

بقو

- مۇنداي جەر يەلەنۋشىدەردى مەن زالال كەلتىرۋشىلەر دەپ ەسەپتەيمىن. ماسەلەن، ءدال وسى 18 مىڭ گەكتار القاپتىڭ يگەرىلمەۋىنەن ءبىز قانداي زيان شەكتىك؟ ونى بىلاي ەسەپتەۋگە بولادى: ەگەر بيداي، كۇنباعىستىڭ ونىمدىلىگىن ورتاشا ەسەپپەن 1 گەكتارعا 10 تسەنتنەردەن دەپ الساق، ءوڭىر جىل سايىن شامامەن 1،5 ملرد. تەڭگە پايدادان ايرىلىپ وتىر. اتالعان اۋماقتاردا 30-40 ادام، ال قوسىمشا جۇمىستاردى ەسەپكە العاندا، 100 ادامعا دەيىن ەڭبەكپەن قامتىلار ەدى. جانە، ەڭ باستىسى، بۇل جەر ازىپ، قۇنسىزدانادى جانە جۇمىسى جاندانىپ تۇرعان كورشىلەس القاپتاردى بۇلدىرەدى، - دەدى عالي ەسقاليەۆ.

بقو جەر قاتىناستارى باسقارماسىنىڭ باسشىسى ءاليا مۇحانبەتجانوۆا جىلدىڭ سوڭىنا دەيىن جەرسەرىكتىك مونيتورينگ ارقىلى جەر تەلىمدەرىنىڭ ناقتى يگەرىلۋى تۋرالى مالىمەت الۋعا مۇمكىندىك بەرەتىن گەواقپاراتتىق جۇيە جۇمىس جاساي باستايتىندىعىن مالىمدەدى.

- قولدانىسسىز جاتقان جەر يەلەرىنە ايتارىم: كەلەسى جىلدان باستاپ ءبىز جەرسەرىكتىك مونيتورينگ ارقىلى جەردىڭ پايدالانىلۋى تۋرالى جەدەل اقپارات الۋ مۇمكىندىگىنە يە بولامىز جانە جالعان ەسەپ تاپسىرۋ دەگەن بولمايدى. سول سەبەپتى اۋدان اكىمدەرىنە قولدانىلماي جاتقان جەر تەلىمدەرىنىڭ يەلەرىمەن، جالعا الۋشىلارمەن تاعى ءبىر مارتە جۇزدەسۋدى تاپسىرامىن. ەگەر ولاردىڭ جەردى يگەرۋگە مۇمكىندىگى بولماسا، ءوز ەركىمەن مەملەكەت مەنشىگىنە قايتارسىن، نە بولماسا سوتقا بەرىڭىزدەر. بەرىلگەن جەردە جۇمىس جۇرگىزگىسى دە، مەملەكەتكە قايتارعىسى دا كەلمەيتىندەردىڭ اتى-ءجونىن باق ارقىلى جاريالايتىن بولامىز، - دەپ مالىمدەدى ءوڭىر باسشىسى.

سونداي-اق جيىندا الەۋەتتى ينۆەستورلار ءۇشىن گەواقپاراتتىق جۇيەگە بوس جاتقان جەر تەلىمدەرىنە وتكىزىلەتىن جوسپارلى كونكۋرستار تۋرالى قولجەتىمدى جانە تۇسىنىكتى اقپارات ورنالاستىرۋ قاجەتتىلىگى ايتىلدى.

 

باتىس قازاقستان

سوڭعى جاڭالىقتار

ارىماس ابىروي

رۋحانيات • كەشە

كونەدەن كەلگەن كونەك

رۋحانيات • كەشە

شىمبۇلاق شاڭعى ماۋسىمىن اشتى

قىسقى سپورت • كەشە

اتباسار

رۋحانيات • كەشە

ۇقساس جاڭالىقتار