ورال قالالىق پروكۋراتۋراسى تاراتقان مالىمەتكە قاراعاندا س. 2015-2019 جىلدارى ەكى بالاسىنا اليمەنت تولەمەي, ول بويىنشا بەرەشەك 3,6 ملن تەڭگەگە جەتكەن. ءسويتىپ «نەكە (ەرلى-زايىپتىلىق) جانە وتباسى» تۋرالى كودەكستىڭ 138-بابىنىڭ تالابى ورەسكەل بۇزىلعان.
باتىس قازاقستان وبلىستىق كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوت ماتەريالدارىنا قاراعاندا, بورىشكەر جەكە سوت ورىنداۋشىسىنىڭ ەسكەرتۋلەرىن ەسكەرمەي, جۇمىسقا ورنالاسپاعان. تابىسىنىڭ ۇشتەن ءبىر بولىگىن اليمەنت رەتىندە تولەۋ تۋرالى 2010 جىلعى 22 اقپانداعى سوتتىڭ شەشىمىن قاساقانا ورىنداماعان.
بەلگىلى بولعانداي, س. «جۇمىسسىزبىن» دەگەنمەن, 2017 جىلعى 4 قاڭتاردا ول قۇرىلتايشىلىق ەتەتىن «S» جشس-نىڭ ۇستىنەن جالعان بۋحگالتەرلىك قۇجاتتاردى وتكىزۋ فاكتىسى بويىنشا سوتقا دەيىنگى تەرگەۋ جۇرگەن. ول ءىس راقىمشىلىق اكتىسى قولدانىلۋىنا بايلانىستى توقتاتىلعان.
«بىراق جشس قۇرىلتايشىسى س. زاڭسىز تابىس تاپقانى انىقتالدى» دەيدى پروكۋراتۋرا وكىلى.
ءسويتىپ, 2019 جىلعى 10 قىركۇيەكتە بقو كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتتىڭ ۇكىمى بويىنشا قىلمىستىق كودەكستىڭ 139-بابىندا (بالالارىن كۇتىپ-باعۋعا ارنالعان قاراجاتتى تولەۋ جونىندەگى مىندەتتەردى ورىنداماۋ) كوزدەلگەن قىلمىستى جاساعانى ءۇشىن س. ءبىر جىلعا باس بوستاندىعى شەكتەلىپ, ءجۇز ساعات ءماجبۇرلى ەڭبەككە تارتىلدى.
سوت اكتىسى زاڭدى كۇشىنە ەنگەن جوق.
