كورمەدە 30 شاقتى جەرگىلىكتى كاسىپورىننىڭ ونىمدەرى مەن رەسپۋبليكاداعى 15 ءىت-جوبا كەلۋشىلەر نازارىنا ۇسىنىلدى. وبلىس اكىمى عالي ەسقاليەۆ وڭىردە تسيفرلاندىرۋ اياسىندا جۇزەگە اسىپ جاتقان جوبالاردى تانىستىردى.
– ەكونوميكالىق دامۋدىڭ نەگىزگى باعدارى شيكىزاتتىق سەكتوردان شيكىزاتتىق ەمەس سەكتورعا كوشۋ جانە ەكونوميكانىڭ باسىم سالالارىنا ينۆەستيتسيالار تارتۋ. ءوڭىردىڭ ينۆەستيتسيالىق احۋالىن جاقسارتۋ, ينۆەستيتسيالار تارتۋ جانە جوعارى تەحنولوگيالىق جوبالاردى ەنگىزۋ ماقساتىندا بەلسەندى جۇمىستار اتقارىلۋدا. سوڭعى ءۇش جىل ىشىندە نەگىزگى كاپيتالعا سالىنعان ينۆەستيتسيا 453 ملرد تەڭگەگە جەتتى. سونىڭ ىشىندە شيكىزاتتىق ەمەس سەكتورعا قۇيىلعان قارجى 77 ملرد-تان 107 ملرد تەڭگەگە ءوستى, دەدى ع.ەسقاليەۆ.
ءوڭىر باسشىسى بيىلعى 8 ايدىڭ قورىتىندىسى بويىنشا نەگىزگى كاپيتالعا قۇيىلعان ينۆەستيتسيا مولشەرى 36,5%-عا (332,7 ملرد تەڭگە), سىرتقى ينۆەستيتسيا كولەمى 74%-عا (250 ملرد تەڭگە) كوبەيگەنىن حابارلادى. قازىر وبلىستا جالپى كولەمى 170 ملرد تەڭگە شەتەلدىك قارجىنىڭ قاتىسۋىمەن 5 جوبا قولعا الىنعان. بۇل كاسىپورىنداردا جاڭادان 340 جۇمىس ورنى اشىلاتىن بولادى. سونىمەن بىرگە «ورال» اكك ينۆەستورعا اقپاراتتىق, ادىستەمەلىك جانە كونسۋلتاتيۆتىك قولداۋ كورسەتۋگە ارنالعان «ينۆەستورلارعا قىزمەت كورسەتۋ ورتالىعىن» (يىۇ) قۇردى. ورتالىق ء«بىر تەرەزە» قاعيداتىمەن قىزمەت كورسەتەدى. جالپى «تسيفرلى قازاقستان» مەملەكەتتىك باعدارلاماسى اياسىندا وڭىردە 140-تان استام جوبا قولعا الىنعان.
– تسيفرلاندىرۋ قولجەتىمدى ءارى ساپالى ينتەرنەتسىز مۇمكىن ەمەس. وسى ماسەلەدە قالا مەن اۋىل اراسىن جاقىنداتۋ ءۇشىن 2020 جىلعا دەيىن وبلىستىڭ بارلىق اۋدانى كەڭجولاقتى ينتەرنەت جەلىسىمەن قامتىلادى. ينتەرنەت بيىل 60 ەلدىمەكەنگە جەتەدى, – دەدى ءوڭىر باسشىسى.
جاقىندا گەواقپاراتتىق پورتال ىسكە قوسىلماق. بۇل پورتالدا بوس جەر تەلىمدەرى, ونىڭ ماقساتتى قولدانىلۋى, جەر پايدالانۋشىلاردىڭ شەكاراسى بۇزىلۋى سەكىلدى مالىمەتتەر انىق كورىنەتىن بولادى. BITRIX-24 جۇيەسى بويىنشا جاسالعان «جوبالىق كەڭسەدە» تاياۋ 5 جىلدا جۇزەگە اسپاق جوبالار جيناقتالىپ, ءار جوبانىڭ بارلىق كەزەڭى تولىق قاداعالاۋدا بولادى. تاعى ءبىر جوبا – تۋريستەرگە ارنالعان www.visit-uralsk.kz سايتى. مۇندا ءوڭىردىڭ كيەلى جەرلەرى مەن تۋريستىك نىساندارى تۋرالى بارلىق مالىمەت, ۆيرتۋالدى تۋرلار ءۇش تىلدە, 3D-مودەلىندە ۇسىنىلعان.
بيىل اقجايىق وڭىرىندە مەكتەپ اسحانالارىندا قولما-قول اقشاسىز قىزمەت كورسەتۋ ەنگىزىلمەك. وسى ارقىلى اتا-انا مەكتەپ اسحاناسىنىڭ ءمازىرىن رەتتەيدى, بالانىڭ اقشالاي شىعىندارىن قاداعالايدى. مەكتەپتەردە سونداي-اق «ۆيرتۋالدى ءىت-زەرتحانالار» ەنگىزىلىپ جاتىر. مۇنىڭ ارتىقشىلىعى – ءتۇرلى تاجىريبەلەر ۆيرتۋالدى جاسالادى, قىمبات زەرتحانا جابدىقتارىنىڭ قاجەتى جوق ءارى وقۋشى قاۋىپسىزدىگى قامتىلادى.
ع.ەسقاليەۆ قاراشىعاناق كەنىشى ورنالاسقان ءبورلى اۋدانىنىڭ ورتالىعى اقساي قالاسىندا «سمارت سيتي» جوباسىن ەنگىزۋ جوسپارىن حابارلادى. قالا كوشەلەرى قازىر ينتەللەكتۋالدىق جارىقتاندىرۋ جۇيەسىنە كوشە باستادى. بالامالى قۋات كوزدەرى دە قارقىندى قولدانىلۋدا. ءوڭىر باسشىسىنىڭ ايتۋىنشا, شاڭىراق سانى 50-100-دەن اسپايتىن ەلدى مەكەندەرگە ءداستۇرلى ەلەكتر جەلىسىن تارتىپ, ارتىق شىعىندانۋدىڭ قاجەتى جوق. ونىڭ ورنىن بالامالى قۋات – جەل, كۇن ەنەرگياسى ت.ب. كوزدەر باسۋى ءتيىس.
«باتىس قازاقستان وبلىسىنىڭ اگروونەركاسىپ سالاسىنداعى الەۋەتى وراسان زور». ع.ەسقاليەۆتىڭ وسى ءسوزىن قازاقستان-گەرمان اگرارلىق-ساياسي ديالوگىنىڭ باسشىسى يورگ دينكەلاكەر دە قايتالادى. «گەرمانيانىڭ اگروونەركاسىپ كەشەنىن تسيفرلاندىرۋ تاجىريبەسىن قولدانۋ مۇمكىندىكتەرى» تاقىرىبىندا بايانداما جاساعان يورگ مىرزا قازاقستاننىڭ الەۋەتى گەرمانيادان دا زور ەكەنىن بىرنەشە مارتە ايتتى. يورگ دينكەلاكەردىڭ ايتۋىنشا, گەرمانيانىڭ ءاربىر ەكىنشى فەرمەرى ءوز شارۋاشىلىعىندا تسيفرلى تەحنولوگيانى ەندىرگەن. GPS دەرەكتەرى تەحنيكانى باسقارۋدا جاپپاي پايدالانىلادى. اۋا رايىن باقىلايتىن قوندىرعىلار, ولشەۋىش قۇرال-جابدىقتار, اۆتوماتتى قوسىمشالار – شارۋانىڭ سەنىمدى سەرىكتەرى. وسىنىڭ ءبارىن قازاق دالاسىنا اكەلۋ – بۇگىنگى كۇن تالابى.
فورۋمدا ازەربايجاننىڭ قازاقستانداعى توتەنشە جانە وكىلەتتى ەلشىسى راشاد ماممادوۆ ءوز ەلىندەگى تسيفرلاندىرۋ جۇيەسىنىڭ قالىپتاسۋى تۋرالى بايانداسا, «كاس كونسالتينگ» فيرماسىنىڭ ديرەكتورى يرينا سۋليمەنكو اگروونەركاسىپ كەشەنىن تسيفرلاندىرۋ تاجىريبەسى جايلى ايتىپ بەردى. نۇر-سۇلتان قالاسىنداعى «ەلوردانى تۇراقتى دامىتۋ ورتالىعىنىڭ» ءىت-ساۋلەتشىسى ۆيتالي پۋستوۆويتەنكو ايماقتى باسقارۋداعى BIG DATA قۇرالدارىن قولدانۋ جوباسىنا توقتالدى. لاتۆيانىڭ قازاقستانداعى سىرتقى ەكونوميكالىق وكىلدىگىنىڭ جەتەكشىسى, لاتۆيا ەكونوميكا مينيسترلىگىنىڭ كەڭەسشىسى ۆلاديمير سامويلەنكو مەن يزرايلدىك «CEO Isratech» كومپانياسىنىڭ وكىلى اناتولي كولومينسكيدىڭ سوزدەرى دە ىقىلاسپەن تىڭدالدى.
– پرەزيدەنتىمىز قاسىم-جومارت توقاەۆ اتاپ وتكەندەي, ەكونوميكانى جاپپاي تسيفرلاندىرۋ مۇلدە جاڭا سالانىڭ پايدا بولۋىنا الىپ كەلەدى. ءبىز دە ۋاقىت تالابىنا ساي بولۋىمىز قاجەت. الەمدە ورىن الىپ جاتقان پايدالى جاڭا وزگەرىستەردەن قالماۋ ءۇشىن بارلىعىمىز جۇمىس تاسىلدەرىمىزدى, باسقارۋ قۇرالدارىمىزدى جاڭعىرتىپ, وڭ وزگەرىستەرگە جول بەرۋىمىز كەرەك. «Digital Aqjaiyq» اياسىندا ەنگىزىلەتىن جاڭا تەحنولوگيالار مەن شەشىمدەر – ءوڭىرىمىزدىڭ بارلىق سالاسىنا سەرپىن بەرەتىنى ءسوزسىز, – دەدى فورۋمدا ع.ەسقاليەۆ. فورۋم اياسىندا بىرنەشە ناقتى ينۆەستيتسيالىق جوبالار ايقىندالىپ, كاسىپورىندار اراسىندا ىنتىماقتاستىق تۋرالى بىرقاتار مەموراندۋمعا قول قويىلدى.
باتىس قازاقستان وبلىسى
