سۋرەتتە: بەنتسە يشتۆان
ونىڭ اڭگىمەسىنەن ۇققانىمىز بەنتسە بۇدان تۇپ-تۋرا 10 جىل بۇرىن قازاقستان-ۆەنگريا اراسىندا العاش رەت ات ەكسپەديتسياسى وتكىزىلۋىنە مۇرىندىق بولىپتى. مۇنداعى باسى ماقساتى – قازاق پەن ۆەنگرگە ورتاق اتا-بابالاردىڭ رۋحىن ۇلىقتاپ, تاريحقا قۇرمەت كورسەتۋ ەكەن. ءسويتىپ, 2009 جىلى ب.يشتۆان باسقارعان ەكسپەديتسيا جامبىل, الماتى, وڭتۇستىك قازاقستان, قىزىلوردا, اتىراۋ جانە ماڭعىستاۋ وبلىستارىنىڭ ۇستىمەن ءجۇرىپ ءوتىپتى. كەيىن 2014 جىلى ۆەنگريالىق شاباندوز اقتاۋدان استاناعا دەيىن اتپەن بارىپ, ەكسپو-عا قاتىسىپتى. ونىڭ دۇنيەجۇزىلىك كورمەنىڭ پاۆيلونىنان اتقا ءمىنىپ ءوتۋ قۇرمەتىنە يە بولعان دارا ءدۇلدۇل ەكەنى دە ەلەۋلى ءجايت.
ات ەكسپەديتسياسىنىڭ ءار كەزەڭىندە بەنتسەنىڭ توبى باتىستان شىعىسقا قاراي كوسىلىپ جاتقان قازاقستاننىڭ كەڭ اۋماعىن كەسىپ وتكەنى دە ايتۋعا تۇرارلىقتاي. سونداي-اق «ەۋرازيالىق بىرلىك» قورى پرەزيدەنتىنىڭ «التىن ادامنان اتتيللاعا» دەيىنگى ساپالى دا ەجەلگى قازاق-ۆەنگر جاۋىنگەرلەرىنىڭ اتقا ءمىنۋ مادەنيەتى مەن ۇقساستىقتارىن پاش ەتەدى. وسى ساپارىندا بىزگە قانى دا, جانى دا جاقىن جان كوشپەلى مادەنيەتكە قاتىستى بۇعان دەيىن زەرتتەلە قويماعان قۇندى دەرەكتەر مەن جادىگەرلەر تاۋىپتى. مەنىڭ باستى ويىم ەجەلدەن تاريحي تۇرعىدا تامىرلاسقان جۇرتتىڭ ورتاق تۇلعالارىن تەرەڭدەتە تاني ءتۇسۋ دەيدى ول.
بەنتسە يشتۆاندى قازاق حالقىنىڭ ەجەلگى سالت-داستۇرلەرى دە قاتتى قىزىقتىراتىنىن بايقادىق ول قازاقستانعا العاش ساپارلارىنىڭ بىرىندە قازاق وتباسىنداعى جاس ءسابيدىڭ تۇساۋىن كەسكەنىن تەرەڭ تولقىنىس ۇستىندە ايتىپ بەردى. ءارى سول وتباسىمەن ءالى كۇنگە دەيىن حابارلاسىپ تۇراتىن كورىنەدى.
-قاي جەردە, قاي ەلدە جۇرسەم دە مەنىڭ قازاق حالقىنىڭ قايىرىمدىلىعى مەن قامقورلىعى, قوناقجايلىلىعى مەن مەيىرباندىعى ءتانتى ەتەدى. ات ۇستىندەگى جورىقتارىم كەزىندە مەن قونعان اۋىل تۇرعىندارى مەنى جاقسىلاپ قوناق ەتىپ كۇتتى. ءارى اتىمدى تىنىقتىرىپ, شىعارىپ سالىپ وتىردى دەيدى ول.
بەنتسەنىڭ 10 جىل بويى قازاق دالاسىن اتپەن شارلاپ جۇرگەنى قۇر بوس ءجۇرىس ەمەس, ەجەلگى كوشپەندىلەر سپورتىنىڭ ەكىنشى تىنىسىن اشۋ بولىپ شىقتى. ول ونى ەجەلگى ساداق تارتۋ ماسەلەسىنەن باستاعاندى ءجون كورەدى. بۇل ءۇشىن ول ارنايى زەرتتەۋ جۇمىستارىن جۇرگىزگەن. ب.يشتۆان حالىقارالىق كوكپار فەدەراتسياسىنىڭ ۆيتسە-پرەزيدەنتى رەتىندە دە اجەپتاۋىر ءىس تىندىرعان. كوكپار ويىنىڭ ماديارلار تىلىندە «كوبەرە» دەپ اتايتىنىن ايتقان ات بىلگىرى ونى جانداندىرا ءتۇسۋ ءۇشىن ەلدەردىڭ ءبىر-بىرىنەن كورىپ, ءبىلىپ ۇيرەنۋىنىڭ ارتىق بولمايتىنىن جەتكىزدى.
56 جاستاعى بەنتسە يشتۆان ءۇش بالانىڭ اكەسى. ات ۇستىندە « ۇلى جىبەك جولىن» ءوز ەكسپەديتسياسىمەن كەسىپ وتكەن جيھانكەز ۆەنگريادان باكۋگە, سودان سوڭ قازاقستان قالالارى ارقىلى مونعولياعا دەيىن بارعان. بويىنا جاۋىنگەرلىك رۋحتى سىڭىرە بىلگەن ءتوزىمدى دە, شىدامدى جان جالپاق رەسەي مەن ەۋروپا ەلدەرىن دە اتپەن ارالاپ ءوتىپتى. بەنتسە يشتۆاننىڭ ەندىگى وي-ماقساتى جەلدەي جۇيرىك جانۋار مەن كورەي تۇبەگىنە دەيىن بارۋ.
