ساۋد ارابياسىندا ءىرى مۇناي نىساندارىنا جاسالعان وسى شابۋىلدان كەيىن مۇناي ءوندىرىسى تاۋلىگىنە ەكى ەسە كەمىگەن. ناقتىراق ايتقاندا, ادەتتە كۇنىنە 9,8 ميلليون مۇناي شىعاراتىن ەلدىڭ ءوندىرىسى 5,7 ميلليون باررەلگە قىسقارعان.
الەم ەلدەرىنىڭ نازارىن اۋدارىپ, ۇلكەن داۋ تۋدىرعان بۇل شابۋىلدى يەمەننىڭ سولتۇستىگىن باسىپ العان شيتتىك «اڭسار اللا» قوزعالىسى موينىنا الدى. حۋسيتتەر قالاعان كەزدە ساۋد ارابياسىنىڭ كەز كەلگەن نۇكتەسىنە جەتۋگە قاۋقارلى قارۋ-جاراعى ساي ەكەنىن ايتىپ, سەس كورسەتتى. سونداي-اق ولار ساۋد ارابياسىنىڭ يەمەندەگى شيەلەنىستەرگە ارالاسۋىن دوعارماسا, تاعى شابۋىلدايتىندارىن ءبىلدىرىپ, كومپانيالار مەن شەتەلدىك ازاماتتارعا ساق بولۋدى ەسكەرتتى.
الايدا اقش-تىڭ مەملەكەتتىك حاتشىسى مايك پامپەو حۋسيتتەردىڭ بۇل مالىمدەمەسىن جوققا شىعارىپ, مۇناي وڭدەۋ زاۋىتتارىنا جاسالعان شابۋىلعا يراننىڭ قاتىسى بارىن ايتىپ, كىنالادى. ونىڭ سوزىنەن كەيىن اق ءۇي باسشىسى دونالد ترامپ تا Twitter-دەگى پاراقشاسىندا ء«بىز كورولدىكتەن بۇل شابۋىلدى كىم جاساعانى جانە قانداي جاعدايدا ارەكەت ەتەتىنىمىز تۋرالى حابار كۇتەمىز» دەپ جازدى. ساۋد ارابياسىنىڭ وداقتاسى اقش بۇل شابۋىلعا اسكەري ءىس-قيمىلمەن جاۋاپ بەرۋ مۇمكىندىكتەرىن قاراستىرىپ جاتىر.
ال يران تاراپى اقش-تىڭ بۇل كىنالاۋىن جوققا شىعاردى. يراننىڭ سىرتقى ىستەر مينيسترلىگىنىڭ رەسمي وكىلى ابباس مۋساۆي امەريكالىقتاردىڭ سىنىققا سىلتاۋ ىزدەپ وتىرعاندارىن اتاپ ءوتتى. ونىڭ ايتۋىنشا, يەمەندەگى قاقتىعىستاردى توقتاتۋدىڭ جالعىز جولى – ساۋد ارابياسى باستاعان اراب ەلدەرىنىڭ اسكەري كواليتسياسىنىڭ سول ەلدەگى شيەلەنىستەرگە ارالاسۋىن توقتاتۋ.
