ناتيجەسىندە 8 پالۋان شيرەك فينالعا ءوتىپ, ءوزارا بەلدەسۋگە دايىندالدى. ولاردىڭ اراسىندا «الەم بارىسىنىڭ» ەكى دۇركىن, «قازاقستان بارىسىنىڭ» ەكى دۇركىن جەڭىمپازى, قازاقستاننىڭ بىرنەشە دۇركىن «تۇيە پالۋانى», 22 اۆتوكولىك يەگەرى ا.نۇعىماروۆ, «قازاقستان بارىسىنىڭ» كۇمىس, ەكى رەت قولا جۇلدەگەرى ر.ابدىرازاقوۆ, تۇركىستان وبلىسىنان كەلگەن «الەم بارىسىنىڭ» كۇمىس جۇلدەگەرى, قازاقستاننىڭ بىرنەشە ءدۇرىن جەڭىمپازى ە.مۇزاپاروۆ, سونداي-اق نەبىر دودالاردا ولجا سالعان قاراعاندىلىق ب.احمەتبەكوۆ, قوس قىزىلوردالىق م.يساعابىلوۆ پەن ن.سالىمگەرەەۆ, دزيۋدودان بىرنەشە دۇركىن رەسەي فەدەراتسياسىنىڭ جەڭىمپازى, سامبودان ەۋروپا چەمپيونى رەسەيلىك ە.حامزين, حالىق ىقىلاسىمەن «قارا بۋرا» اتانعان ماڭعىستاۋلىق پالۋان ن.جارىلعاپوۆ سىندى تيتۋلى جوعارى پالۋاندار بار.
شيرەك فينالدا العاشقى بولىپ كىلەمگە كوتەرىلگەن ماڭعىستاۋدا ولجا سالىپ جۇرگەن ايتۋلى پالۋان ج.تاڭاتوۆ پەن ا.نۇعىماروۆ جۇبى بولدى. بۇل بەلدەسۋدە ايقىن باسىمدىقپەن جەڭىسكە جەتكەن ا.نۇعىماروۆ كەلەسى اينالىمعا جولداما الدى. كەلەسى جۇپ – رەسەيلىك ا.حانبيەۆ پەن قىزىلوردالىق ن.سالىمگەرەەۆ تارتىستى بەلدەسۋ جاسادى, ۇپاي سانى ايىرماشىلىعىمەن حانبيەۆ كەلەسى بەلدەسۋگە ءوتتى. كەلەسى ر.ابدىرازاقوۆ پەن ە.مۇزاپاروۆتىڭ بەلدەسۋى دە تارتىستى بولدى, ناتيجەسىندە ە.مۇزاپاروۆ تازا جەڭىسكە جەتتى. سونداي-اق, شيرەك فينالدىڭ سوڭعى جۇبى م.يساعابىلوۆ پەن ن.جارىلعاپوۆ 4 مينۋت ءبىر-ءبىرىن الا الماي الىسا ءجۇرىپ, ءبىر-ءبىر «بۇك» ۇپايمەن تەڭ ءتۇسىپ كەلە جاتىپ, سوڭعى سەكۋندتا, ياعني 4 مينۋت 59 سەكۋندتا جارىلعاپوۆ يساعابىلوۆتى تازا جەڭىپ, كەلەسى اينالىمعا ءوتتى.
اقتىق سىنعا ءوتۋ ءۇشىن ايقاسقان ا.نۇعىماروۆ پەن ا.حانبيەۆتىڭ بەلدەسۋىندە باعى جانعان حانبيەۆ ايقىن باسىمدىلىقپەن ۇتىپ, فينالعا شىقتى. ەكىنشى مۇزاپاروۆ پەن جارىلعاپوۆتىڭ كەزدەسۋىندە 2 مينۋت 37 سەكۋندتا ن.جارىلعاپوۆ تازا جەڭىسكە قول جەتكىزدى. سونان سوڭ ءوزارا بەلدەسكەن ا.نۇعىماروۆ پەن ە.مۇزاپاروۆ ايقاسىندا مۇزاپاروۆ تازا جەڭىپ, 3-ورىنعا قول جەتكىزدى.
اقتىق بەلدەسۋدە ا.حانبيەۆتى 1 مينۋت 17 سەكۋندتا تازا جەڭىپ, 1-ورىنعا كوتەرىلگەن ماڭعىستاۋلىق پالۋان ن.جارىلعاپوۆ اقتاۋ قالاسىنان 1 بولمەلى پاتەردىڭ يەسى اتاندى. 2-ورىن يەگەرى رەسەيلىك اسلان حانبيەۆ 1 ملن تەڭگەنى, 3-ورىن العان ە.مۇزاپاروۆ 500 مىڭ تەڭگەنى ولجالادى.
ايتا كەتۋ كەرەك, استا الىسقان الىپتاردىڭ سالماعى دا وسال ەمەس – ن.جارىلعاپوۆ 147 كگ, ا.حانبيەۆ 130 كگ بولسا, ە.مۇزاپاروۆتىڭ سالماعى 95 كگ, ا.نۇعىماروۆتىڭ سالماعى 145 كگ, ال ر.ابدىرازاقوۆ 120 كگ-دا بەلدەستى.
ماڭعىستاۋ وبلىسى
