جوبا اقتاۋ قالاسىنىڭ ەرەكشە قاجەتتىلىگى بار تۇرعىندارىنا قولجەتىمدى ورتا جاساۋعا باعىتتالعان. جالپى اقتاۋ قالاسىندا 200-دەن استام كولياسكامەن جۇرەتىن تۇرعىندار تۇرادى, سونىمەن قاتار بالانىڭ كولياسكاسىمەن جۇرەتىن اتا-انالار قانشاما. الايدا قالانىڭ نىساندارىنىڭ پاندۋستارى مەن تەپپەلەرىنىڭ تولىعىمەن ستاندارتتارعا ساي بولماۋى ولاردىڭ كۇندەلىكتى ءومىرىن تەك ۇيدە وتكىزۋىنە اكەلىپ سوقتىرىپ وتىر.
دامىعان قوعامدا وسىنداي ەرەكشە بالالار مەن ۇلكەندەر كەز-كەلگەن جەرگە وزدەرى بارىپ, سپورتپەن اينالىسىپ, كۇندەلىكتى ءومىرىن جاي عانا تۇرعىندار سياقتى ەش قيىندىقسىز وتكىزەدى.
جوبا اياسىندا الەۋمەتتىك ۆيدەروليك جاساپ, بيلبورد ءىلىپ, قوعام نازارىن اتالعان پروبلەماعا اۋدارۋ ءۇشىن شارالار ۇيىمداستىرادى. سونىمەن قاتار «مەن بارمىن!» الەۋمەتتىك جەلىدەگى پوستتار بايقاۋى وتەدى. بايقاۋدا كولياسكاداعى مۇمكىندىگى شەكتەۋلى تۇرعىندار مەن بالالى انالار دۇرىس جاسالماعان نەمەسە مۇلدەم پاندۋس جوق جەرلەردە سۋرەتكە ءتۇسىپ, الەۋمەتتىك جەلىدە جاريالايدى. بايقاۋ ناتيجەسىندە بارلىق قاتىسۋشىلارعا كەرەمەت سىيلىقار تابىس ەتىلەدى. بايقاۋدا انىقتالعان 10 نىساننىڭ پاندۋسى جوندەلەدى. ال 5 پاندۋستى نىسانداردىڭ يەلەرى جاساۋىن قوعام تالاپ ەتەدى. سونىمەن قاتار «وركەنيەتتى كەلەشەك» قوعامدىق قورىنىڭ اشقان «پەرىشتە» ورتالىعىندا اقتاۋ قالاسىنىڭ مۇمكىندىگى شەكتەۋلى 20-25 تۇرعىنىنا وڭالتۋ شارالارى, يوگا, ەمدىك فيزكۋلتۋرا, بيواككۋستيكالىق اپپاراتپەن كۋرستار, اعىلشىن ءتىلى, قولونەر ساباقتارى جۇرگىزىلەدى.
ماڭعىستاۋ وبلىسى
