ايماقتار • 16 قىركۇيەك، 2019

باتىس قازاقستان وبلىسىندا اۋىل مۇعالىمدەرى سايت اشتى

42 رەتكورسەتىلدى

باتىس قازاقستان وبلىسى بوكەي ورداسى اۋدانى سارالجىن اۋىلىندا تۇراتىن مەكتەپ مۇعالىمدەرى اعىلشىن، ورىس تىلدەرىن ۇيرەنۋگە كومەكتەسەتىن سايت اشتى.

ميرحات احتاروۆ – قۇرمانعازى ساعىرباەۆ اتىنداعى ورتا مەكتەپتىڭ اعىلشىن ءتىلى ءپانى مۇعالىمى بولسا، ارىپتەسى تىلەكجان بەگيشانوۆ – ينفورماتيكا پانىنەن ساباق بەرەدى. جاڭا سايتتى دايىنداۋ ءۇشىن جىگىتتەر ءۇش اي ۋاقىت جۇمساپتى.

سايت وقىرماندارىنا اعىلشىن ءتىلى مەن ورىس ءتىلىن قوسىپ ۇيرەنۋدىڭ قىزىقتى جولدارىن ۇسىنباق. مۇنداعى ءتىل كۋرسى ءتورت دەڭگەيدەن تۇرادى. العاشقى ساتىدا سايت پايدالانۋشىلارى سوزدىك جاتتاسا، ەكىنشى دەڭگەيدە كۇندەلىكتى تۇرمىستىق جانە قىزمەتتىك قارىم-قاتىناستى ديالوگ تۇرىندە ۇيرەنەدى ەكەن. ءۇشىنشى ساباقتا بەلگىلى شەتەل ورىنداۋشىلارىنىڭ اندەرى جانە سول ءاننىڭ كاۆەر نۇسقاسى قوسا بەرىلمەك. «ياعني ولەڭمەن بىرگە سول ءاننىڭ تەكستىنە قاراپ ورىندايتىن بولاسىزدار. ال ءتورتىنشى دەڭگەيدە بەينەساباقتارمەن جۇمىس ىستەيمىز» - دەيدى سايت اۆتورلارى.

– سايتتىڭ قولدانىلۋى وتە قاراپايىم. كەز كەلگەن ادام پايدالانا الادى دەپ ويلايمىز. ءورىستىلدى قولدانۋشىعا ارنالعان نۇسقامىز دا ءازىر. قازىرگى زاماندا ءۇش ءتىلدى جەتىك ءبىلۋ ماڭىزدى. سول جولدا بۇل سايت تاپتىرمايتىن قۇرال بولادى، -دەيدى جوبا اۆتورلارىنىڭ ءبىرى تىلەكجان بەگيشانوۆ.

قاراپايىم اۋىل مۇعالىمدەرى اشقان www.eneasy.kz سايتى بيىلعى جاڭا وقۋ جىلىنان باستاپ قوسىلعان ەدى. تىلەكجان قازىردىڭ وزىندە ءۇش ادام سايتقا تىركەلىپ، ءتىل ۇيرەنۋگە كىرىسىپ كەتكەنىن ايتادى.

سوڭعى جاڭالىقتار

ۇقساس جاڭالىقتار