بۇگىندە لاتىن قارپىنە كوشىرۋ ءىسى مەن ونىڭ ەرەجەسىن ەل-جۇرت اراسىندا ءتۇسىندىرۋ جۇمىستارىنىڭ ماڭىزى جوعارى ەكەنى بەلگىلى. وسى رەتتە باسقارما تاراپىنان ۇيىمداستىرىلعان «جاڭا ەملە: جازۋ قاعيداتتارى» تاقىرىبىنداعى شارانىڭ اۋقىمى مەيلىنشە كەڭ بولدى. وعان قوعامدىق جانە مەملەكەتتىك ۇيىمداردىڭ ءار سالاسىندا قىزمەت اتقاراتىن بەس جۇزدەن استام ادام قاتىستى. شارا بارىسىندا ء«تىل-قازىنا» ۇلتتىق عىلىمي ورتالىعىنىڭ اتقارۋشى ديرەكتورى ەربول تىلەشوۆ ءدارىس وقىدى. سونىمەن بىرگە تىلدەردى وقىتۋ ورتالىعىنىڭ وقىتۋشىلارى گۇلايىم اياپوۆا مەن اقمارال سۇگىرباەۆا ترەنينگ وتكىزدى. بۇعان بايلانىستى پراكتيكالىق جۇمىستار ورىندالىپ, لاتىن قارپىندە جازىلعان سوزدەر مەن ولەڭ شۋماقتارى وقىلدى. ءارى ترەنينگ پەن دارىسكە قاتىسۋشىلار لاتىن قارپىنە كوشۋگە وراي, وزدەرىن تولعاندىرىپ جۇرگەن بىرقاتار ساۋالعا جاۋاپ الدى. سونىمەن بىرگە ولار ەملە ەرەجەلەرىندەگى بىرقاتار ەرەكشەلىككە دە قانىق بولدى.
ونكۇندىك اياسىندا رەفورمانىڭ ساياسي ماڭىزدىلىعىن ارتتىرۋ ماقساتىندا «قوش كەلدىڭ, جاڭا ءالىپبي», «تورلەت, ءتول ءالىپبي» تاقىرىپتارى بويىنشا كەزدەسۋلەر ۇيىمداستىرىلىپ, لاتىن گرافيكاسىنا كوشكەن ەلدەردىڭ تاجىريبەسى ورتاعا سالىندى. سونىمەن بىرگە وسى ارالىقتا لاتىنعا كوشۋدى ءتيىمدى ءارى ساپالى جۇزەگە اسىرۋ ماقساتىندا حالىقارالىق كونفەرەنتسيالار مەن سەمينارلار, تەلەجوبالار مەن تەلەساباقتار وتكىزىلدى. الەۋمەتتىك روليكتەر كورسەتىلىپ, اشىق ديكتانتتار جازۋ ۇيىمداستىرىلدى. بۇل باعىتتا ارنايى كورنەكى قۇرالدار ازىرلەنىپ, كوپشىلىككە تاراتىلدى. وسى ورايدا, وڭىردە لاتىن گرافيكاسىنا كوشۋ جونىندەگى باعدارلاما قابىلدانعان كەزدەن بەرى ءتىل باسقارماسىنىڭ ۇيىمداستىرۋىمەن 687 شارا ۇيىمداستىرىلعانىن ايتۋ پارىز. اتالعان كەزەڭدە 44 مىڭعا جۋىق ادام ءتۇسىندىرۋ جۇمىستارىمەن قامتىلعان. 100 مىڭنان اسا ادام اشىق ديكتانت جازۋعا قاتىسقان. سونىمەن بىرگە جاڭا ەملە ەرەجەلەرى اپروباتسياسىندا 250 جانە جاڭا الىپبيدە جاسالعان كلاۆياتۋرانىڭ اپروباتسياسىنا 600-دەن استام ادام تارتىلعان. زيالى قاۋىم, سالا ماماندارى, تۇرعىنداردىڭ باسقا دا ساناتتارى وكىلدەرىنىڭ پىكىرلەرى رەسپۋبليكالىق, وبلىستىق بۇقارالىق اقپارات قۇرالدارىندا جاريالانىپ, سۇحباتتار بەرىلۋى دە ونكۇندىكتىڭ ءورىسى كەڭ بولعانىن كورسەتەدى.
وقىتۋ ىسىندە ينتەرنەت بەرەتىن زاماناۋي مۇمكىندىكتەردى قولدانۋ ماقساتىندا قاشىقتىقتان وقىتۋ جۇيەسى ەنگىزىلىپ, ءوز بەتىمەن ءتىل ۇيرەنەمىن دەگەن ازاماتتار ءۇشىن ء«تىلتانۋ» اتتى قازاق ءتىلىنىڭ جاڭا ءالىپبيى نەگىزىندە قاشىقتىقتان وقىتۋ كۋرسى ۇيىمداستىرىلدى. ءارى تۇرعىندار سايت, الەۋمەتتىك جەلى ارقىلى لاتىن گرافيكاسىنداعى قازاق ءالىپبيى ەرەجەلەرىمەن, ءتىل سالاسىنداعى جاڭالىقتارمەن تانىستى. حالىقتى قازاق ءتىلىنىڭ جاڭا الىپبيىنە ۇيرەتۋ ءۇشىن, اتالعان ورتالىق لاتىن گرافيكاسىنداعى «جازىلىم» جانە ء«بىلىمدى بالاقاي» اتتى تاپسىرمالار جيناعىن باسپادان شىعارۋعا ۇيىتقى بولدى. ونىڭ لاتىن گرافيكاسى بويىنشا قازاق ءتىلىن ۇيرەتۋ قۇرالى رەتىندە ماقساتتى اۋديتورياعا ارنالعان تۇساۋكەسەرى وتكىزىلدى.
مىنە وسىلايشا اقتوبە ايماعىندا قازاق ءالىپبيىن لاتىن گرافيكاسىنا ساتىلاپ كوشىرۋ ىسىندە ۇيرەنەتىندەي ۇردىستەر كوبەيىپ كەلەدى.
اقتوبە
