رۋحانيات • 16 قىركۇيەك، 2019

سۇيەگى اسىل ادام ەدى

182 رەت كورسەتىلدى

ءابىلفايىز اعا دۇنيەدەن وزدى! اق شاشىن ارتقا قايىرا تارتىپپەن تاراعان، ءبىر قاراعاندا تىم قاتال سياقتى، ال شىن مانىندە جان-دۇنيەسى جايساڭ، ەرەكشە مەيىرىم-شۋاق يەسى ابەكەڭە شاكىرت بولعان شاقتارىمىز كەشە عانا سياقتى ەدى-اۋ! ول كىسى بىزگە «گازەتتى بەزەندىرۋ تەحنيكاسى»، «وچەرك»، «رەداكتور مەن كوررەكتورعا قوسىمشا كومەك»، «سەكرەتاريات جۇمىسى»، ت.ب. پاندەردەن ءدارىس وقىدى. تالاپ قوياتىن. سول تالاپتىڭ ورىندالۋىن قاتاڭ قاداعالايتىن.

Egemen Qazaqstan

جالپى ۇستازدىققا تاجىريبەدەن كەلگەن. ال 1965 جىلدان تابان اۋدارماي قازمۋ-ءدىڭ جۋرناليستيكا فاكۋلتەتىندە اعا وقىتۋشى، دەكاننىڭ ورىنباسارى، پروفەسسور بولىپ قىزمەت اتقاردى. مىڭداعان شاكىرتتەرگە ءتالىم-تاربيە بەردى.

قازىرگى ەلىمىزدەگى قالام ۇستاعان قاۋىمنىڭ كوپشىلىگى ابەكەڭنىڭ شاكىرتتەرى.

اسا مازمۇندى، ماعىنالى، ونەگەلى ءومىر ءسۇردى. 20-دان استام وقۋلىق، وقۋ-ادىستەمەلىك كىتاپتارى جارىق كوردى.

زامانداستارىنىڭ ىشىنەن كامال سمايىلوۆپەن ەرەكشە سىيلاس دوس بولدى. ءازىلحان نۇرشايىقوۆپەن سىرلاس بولدى. جوعارى وقۋ ورنىنداعى ەڭبەگى جوعارى باعالانىپ، ءال-فارابي اتىنداعى قازۇۋ-ءدىڭ «ايرىقشا ەڭبەگى ءۇشىن»، ء«ال-ءفارابيدىڭ» ۇلكەن التىن مەدالىمەن» ماراپاتتالدى.ءومىرىنىڭ سوڭىنا دەيىن ادەبيەت پەن ونەر سالاسىنداعى پرەزيدەنت ستيپەندياسىنىڭ يەگەرى بولدى.

مەن ۋنيۆەرسيتەتتى بىتىرگەننەن كەيىن وقىتۋشىلىق قىزمەتتە جۇرگەندە، ابەكەڭنىڭ قاسىنا كوپ ەردىم، كوپ اقىل-كەڭەسىن تىڭدادىم. مەنى تۋعان بالاسىنداي جاقسى كوردى. باكىجان دەپ ات قويعان جالعىز ادام ەدى!

ول كىسىنىڭ شىن تۋعان ۋاقىتى 1928 جىلى ەكەن. سوندا 91 جاسىندا دۇنيەدەن وزىپ وتىر.مۇنداي 90-نان اسقان ابىز اقساقالدارىمىز ءبىز ءۇشىن اسا قادىرلى جاندار. سۇيەگى اسىل ادام ەدى! – دەيدى قازاق ونداي جانداردى.

ابەكەڭ كىم بولسا دا الدىنا كەلگەن قازاق بالاسىنا كومەكتەسىپ جىبەرەتىن، جان بالاسىنا قيانات جاساپ كورمەگەن قاراپايىم، كىشىپەيىل، ادال ازامات ەدى! ءوزى دە كيەلى تورعاي ءوڭىرىنىڭ تۇلەگى، تەكتى ازامات بولاتىن.

قانشا جاس شۋاعىڭنان پايدا كوردى،

كازگۋدەي جايلاپ ءوتتىڭ باي مەكەندى.

جادىڭنان تاستامادىڭ اۋەزوۆتى،

اۋزىڭنان تاستامادىڭ قايرەكەڭدى (بەكحوجين).

ءسىز جايلى ۇستاز دەپ ءبىز ءسوز ەتەيىك،

كونەنىڭ بىزگە جەتكەن كوزى ەتەيىك.

التاي دەپ ەركەلەتتى اماندوسوۆ،

الپان دەپ سىيلاپ ءوتتى قوجاكەەۆ.

بولا الماس ماڭدايىڭداي وزگە ماڭداي،

قاقتىرماي قاناتتىعا، سوزگە قالماي،

ءوسىردىڭ تۇمسىقتىعا شوقىتتىرماي،

قازاقتىڭ بار بالاسىن ءوز بالاڭداي.