اتامەكەنىنە قونىس اۋدارعان قازاقتار ەلىمىزدىڭ اقمولا (27%), ماڭعىستاۋ (14%) جانە جامبىل (9%) وبلىستارىندا, سونداي-اق نۇر-سۇلتان (8,9%) جانە شىمكەنت (8,5%) قالالارىندا قونىستاندى.
بۇگىنگە دەيىن, ياعني 1991 جىلدان باستاپ 307,3 مىڭ وتباسى نەمەسە 1,046 ميلليون ەتنوستىق قازاق تاريحي وتانىنا ورالىپ, ورالمان مارتەبەسىن العان ەكەن.
«قازاقستاندا ورالمان مارتەبەسىن العان ەتنوستىق قازاقتارعا جەڭىلدەتىلگەن تۇردە ازاماتتىق الۋ ءۇشىن قولايلى جاعدايلار جاسالدى. بۇل مارتەبە ءبىر جىلعا جارامدى. مارتەبەنى ۇزارتۋ ورالمان مارتەبەسى توقتاتىلعان كۇننەن باستاپ ءۇش ايدان اسپايتىن مەرزىمگە ءوتىنىش بەرگەن كەزدە جەڭىلدەتىلگەن تارتىپپەن ازاماتتىق الۋ ءۇشىن عانا كوزدەلەدى», دەيدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى احمادي سارباسوۆ.
ۆيتسە-مينيستر بۇل رەتتە كەيبىر ورالمانداردىڭ ۇسىنىلعان ۋاقىت ىشىندە جەڭىلدەتىلگەن تارتىپپەن قازاقستان ازاماتتىعىن الماعانىن جانە مۇنداي مۇمكىندىكتەن ايىرىلعانىن اتاپ ءوتتى.
«وسىعان بايلانىستى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ مۇنداي ساناتتاعى قانداستارىمىزعا مارتەبەسىن جەڭىلدەتىلگەن تارتىپپەن الۋدى 2019 جىلدىڭ 31 جەلتوقسانىنا دەيىن ۇزارتۋ تۋرالى شەشىم قابىلدادى. وسىلايشا مارتەبەسىن ۇزارتپاعان ورالماندار جەرگىلىكتى اتقارۋشى ورگاندارعا جۇگىنە الادى جانە قازاقستان ازاماتتىعىن جەڭىلدەتىلگەن تارتىپپەن الۋ ءۇشىن ىشكى ىستەر ورگاندارىنا قۇجاتتارىن تاپسىرا الادى», دەدى ا.سارباسوۆ.
اكتسيا اياسىندا 26 تامىزداعى جاعداي بويىنشا ەلىمىزدە 5 789 ەتنوستىق قازاقتارعا ورالمان مارتەبەسى ۇزارتىلدى, ونىڭ 4 909-ى قازاقستان ازاماتتىعىن الۋعا قۇجات تاپسىردى.
