ەسكەرتكىش-ءمۇسىننىڭ اشىلۋ سالتاناتىندا اۋدان باسشىلارى, ەرىك ماعزۇم ۇلىنىڭ زامانداستارى ءسوز الدى. ەرىك اسانباەۆتىڭ اكەسى مەن اعايىندارى ەلىمىز تاۋەلسىزدىگى ءۇشىن قۇربان بولعان ەكەن. اكەسى ماعزۇم اسانباي ۇلى «حالىق جاۋى» دەگەن ايىپپەن ناقاقتان اتىلىپ كەتەدى. اعايىن تۋىسى مىرزاعازى ەسبول ۇلى الاش ارداقتىلارىمەن ۇزەڭگىلەس جۇرگەن, قازاق ەلى ءۇشىن ناعىز كۇرەسكەر بولعان ادام ەدى. ول دا 30-جىلداردىڭ قۋعىن-سۇرگىنىنەن تىس قالمادى, جازىقسىز اتىلادى.
– ەرىك ماعزۇم ۇلى وتە ءبىلىمدار كىسى ەدى. «حالىق جاۋىنىڭ» ۇلى, تۋىسى رەتىندە دە كوپ سىرى ىشتە بولدى. تاۋەلسىزدىگىمىزدى العاندا ەرەكشە قۋانىشپەن, جىگەرمەن ونىڭ ىرگەتاسىن بەكىتۋگە بار ءبىلىمىن, كۇشىن سارقا ەڭبەك ەتتى, – دەدى ارداگەر زامانداسى ىسقاق ەسىرگەپوۆ.
ەرىك اسانباەۆقا ەسكەرتكىش-ءمۇسىندى ونىڭ بالالارى ماقسۇت پەن ميراس ءوز قاراجاتتارىنا ورناتتى. جەرلەستەرى ەلىمىز تاۋەلسىزدىگىنە قىزمەت ەتكەن ۇلىنىڭ ارۋاعىنا قۇرمەت كورسەتتى.
سۋرەتتى تۇسىرگەن اۆتور
قوستاناي
