قوعام • 13 قىركۇيەك، 2019

جەمقورلىقپەن كۇرەس ىمىراسىز جۇرگىزىلەدى

48 رەت كورسەتىلدى

Nur Otan پارتياسىنىڭ ورتالىق اپپاراتىندا جاڭارتىلعان Cىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ العاشقى وتىرىسى ءوتىپ، وعان قازاقستاندىق پارتيالاردىڭ، مەملەكەتتىك ورگانداردىڭ وكىلدەرى، قوعامدىق بەلسەندىلەر مەن جۋرناليستەر قاتىستى.

وتىرىس بارىسىندا Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك ەلباسى، پارتيا ليدەرى نۇرسۇلتان نازارباەۆتىڭ Cى­باي­لاس جەمقورلىققا قار­سى ءىس-قيمىل جونىندەگى رەس­پۋب­ليكالىق قو­عامدىق كەڭەس­تىڭ جۇمىسىن كۇشەي­تۋدى تاپ­سىرعانىن حابارلادى. ول ءۇشىن جۇمىستىڭ فورماتى مەن ءتاسىلىن جاقسارتىپ، جاڭا مامانداردى تارتۋ قاجەت. حالىقپەن دانەكەر بولاتىن بايلانىستى قالىپتاستىرىپ، الەۋمەتتىك جە­لىلەردەگى تۇرعىنداردىڭ سۇ­راقتارىنا دەر كەزىندە جاۋاپ بەر­گەن، بۇكىل ەلىمىز بويىنشا قوعامدىق قابىلداۋلاردىڭ حا­لىقپەن ءوزارا ارەكەتىنە ەرەكشە نازار اۋدارعان ابزال.

«ەلىمىزدىڭ تۇڭعىش پرەزيدەنتى نۇرسۇلتان نازارباەۆ ايتقانداي، «قازاقستان-2050» ستراتەگيالىق ماقساتتارىنا قول جەتكىزۋ سىبايلاس جەمقورلىقپەن ىمىراسىز كۇرەس جۇرگىزۋ ارقىلى عانا مۇمكىن بولماق. مەملەكەت پەن قوعام سىبايلاس جەمقورلىققا قارسى جۇدىرىقتاي جۇمىلا ءبىلۋى ءتيىس. مەملەكەت باسشىسى قاسىم-جومارت توقاەۆ ساي­لاۋال­دى باعدارلاماسىنداعى نەگىزگى باسىمدىقتارىنىڭ ءبىرى رەتىندە مەملەكەت پەن قوعامنىڭ دامۋىنا زور كەدەرگى كەلتىرىپ وتىرعان جەم­قورلىققا قارسى جۇيەلى كۇرەستى بەلگىلەدى. Nur Otan پارتياسى قاراپايىم ازا­ماتتاردىڭ پروبلەمالارىن شە­شۋدى ۇيىمداستىراتىن، وزەكتى جانە وتكىر ماسەلەلەر تالقى­لانىپ جاتاتىن الاڭ بولۋى ءتيىس. جىل باسىنان بەرى عانا 143 مىڭ ادام ءبىزدىڭ قوعامدىق قابىلداۋدىڭ كومەگىنە جۇگىندى. سىبايلاس جەمقورلىق ماسەلەسى بويىنشا دەربەس «جەدەل جەلىنى» قۇرۋ ماسەلەسىن قاراستىرعان ءجون. ەگەر بىزگە شاعىمدار ءتۇسىپ جاتسا، بىزدە وعان جاۋاپ قايتاراتىن ايقىن باعدارجول بولۋى كەرەك. شاعىم بەرگەن ءار اداممەن جەكە كەزدەسىپ، ماسەلەنى ەگجەي-تەگجەيلى زەرتتەۋ قاجەت. بۇل جۇمىسقا وكىلەتتى مەملە­كەتتىك ورگانداردى، ءبىزدىڭ دەپۋتاتتارىمىزدى، ازاماتتىق قوعام­نىڭ بەلسەندى ازاماتتارىنىڭ ءبارىن تارتىڭىزدار»، دەدى ب.بايبەك.

ونىڭ ايتۋىنشا، قوعامداس­تىقتىڭ كەڭىنەن تالقىلاۋىنىڭ ناتيجەسىندە 2014 جىلى پار­تيانىڭ 2025 جىلعا دەيىنگى سى­بايلاس جەمقورلىققا قارسى ءىس-قيمىل باعدارلاماسى، Nur Otan پارتياسىنىڭ باستاماسىمەن سىبايلاس جەمقورلىققا قارسى ءىس-قيمىل، اقپاراتقا قولجەتىمدىلىك، قوعامدىق كەڭەس­تەر تۋرالى جانە ت.ب. زاڭدار قابىلداندى. بۇگىنگى تاڭدا مەملە­كەتتىك قىزمەتتىڭ 80%-ى اۆتوماتتاندىرىلدى، بۇكىل ەلىمىز بويىنشا حقو جۇمىس ىستەيدى، تسيفرلى تەحنولوگيالار ەنگىزىلۋدە. پارتيا توراعاسىنىڭ ءبىرىنشى ورىنباسارى وسىنىڭ ءبارىنىڭ دە سىبايلاس جەمقورلىققا قارسى ءىس-قيمىل ەكەنىن اتاپ ءوتتى.

ءوز كەزەگىندە سىبايلاس جەم­قور­لىققا قارسى ءىس-قيمىل جونىندەگى رەسپۋب­ليكالىق قوعام­دىق كەڭەس­تىڭ جاڭا توراعاسى ومارحان وكسىك­باەۆ كەڭەستىڭ قىزمەتى مەن ونىڭ تيىمدىلىگىن پىسىقتاۋعا بايلانىستى ناقتى ءىس-شارالاردىڭ قابىل­داناتىنىن ايتتى. ولاردىڭ ىشىندە ورتالىق مەملەكەتتىك جانە جەرگىلىكتى اتقارۋشى ورگانداردىڭ جۇمىس­تارىنداعى جەمقورلىقتىڭ ىقتي­مالدىعىن تالداۋ وزەكتىلىگى، بار­لىق دەڭگەيدە ولاردى ازايتۋ بويىن­شا ءىس-شارالاردى قابىل­داۋعا ىقپال ەتۋ بار.

تالقىلاۋ بارىسىندا كەڭەس توراعاسىنىڭ ورىنباسارى ورالباي ابدىكارىموۆ پارتياعا قاراتىپ، جەمقورلىق ماسەلەسى انىقتالعان كەزدەن باستاپ وعان جاۋاپ بەرىپ، كەز كەلگەن قۇقىق بۇزۋشىلىق جەم­قورلىعىنا بايلانىستى ماسەلەنى تالقىلاۋدى ۇسىندى. باۋىرجان بايبەك اتالعان ۇسىنىسقا قولداۋ تانىتىپ، بۇل ماسەلەدە ءبىرىنشى كەزەكتە كىناسىزدىك پرەزۋمپتسياسى قاعيداتىنا ارقا سۇيەۋ كەرەك ەكەنىنە توقتالدى.

«قازاقستان حالقىنا ارناعان ءوزىنىڭ جولداۋىندا مەملەكەت باسشىسى قاسىم-جومارت توقاەۆ كىناسىزدىك پرەزۋمپتسياسى قاعيداتىنىڭ تولىق كولەمدە ساقتالۋى كەرەك ەكەنىن اتاپ ءوتتى، ياعني ادامنىڭ كىناسى دالەل­دەنبەيىنشە ونى ايىپتاۋعا بولمايدى. تۇتاستاي العاندا ءبىزدىڭ ماقساتىمىز – زاڭنىڭ ۇستەمدىگىن قامتاماسىز ەتۋ»، دەدى باۋىرجان بايبەك.

Nur Otan پارتياسى توراعاسى­نىڭ ءبىرىنشى ورىنباسارى، سونداي-اق «تۇرمىستىق» جەمقورلىق ىقتي­مالدىعى جوعارى بارلىق سالالاردى – دەنساۋلىق ساقتاۋ، جەر قاتىناستارى، قۇرىلىس، ميگراتسيا، شەتەل جۇمىسشىلارىنا كۆوتا بەرۋ جانە ت.ب. كەڭىرەك قامتۋ كەرەك ەكەنىن اتاپ ءوتتى. ونىڭ ايتۋىنشا، ءتۇسىندىرۋ جۇمىستارىن كەڭىنەن جۇرگىزۋ، اقپاراتتاندىرۋ ارقىلى اشىقتىققا قول جەتكىزۋ قاجەت.

«شەتەلدىكتەردىڭ قاتىسۋىمەن بولسا دا جاڭا وندىرىستەردى اشۋ – ەلىمىز ءۇشىن يگىلىك، ەكونوميكانى دامىتۋدىڭ باستى شارتى. بۇگىنگى تاڭدا بارلىق مەملەكەتتەر شەتەلدىك ينۆەستيتسيا ءۇشىن كۇرەسىپ جاتىر. تەك قانا بىرلەسكەن قىتاي جوبالارىنىڭ اياسىندا 20 مىڭنان استام جۇ­مىس ورنىن قۇرۋ جوسپارلانۋدا. وسى جۇمىس ورىندارىنىڭ 95%-ى قازاقستاندىقتارعا تيەسىلى بولادى. شەتەلدىكتەردىڭ قاتىسۋىمەن جاڭا وندىرىستەردى قۇرۋ كەزىندە وكىلەتتى ورگاندار Nur Otan پارتياسىمەن بىرگە ميگراتسيالىق جانە ەڭبەك زاڭناماسىنىڭ بۇزىلماۋىن باقىلاۋدى قامتاماسىز ەتۋى ءتيىس. وسىنىڭ ءبارى دە قازاقستاندىق جۇمىسشىلاردىڭ جاڭا كاسىپ­ورىنداردا جۇمىس ىستەپ، لايىقتى جالاقى الۋى ءۇشىن اتقارىلىپ جاتىر»، دەپ تۇيىندەدى ب.بايبەك.

سوڭعى جاڭالىقتار

پرەزيدەنت الماتى اكىمىن قابىلدادى

پرەزيدەنت • بۇگىن، 14:07

وتكەن تاۋلىكتە 187 ادام ىندەت جۇقتىردى

كوروناۆيرۋس • بۇگىن، 10:40

ۇقساس جاڭالىقتار