رۋحانيات • 12 قىركۇيەك، 2019

حانبوك: ءداستۇردىڭ رۋحاني ەمى

كورەي حالقىنىڭ ءداستۇرلى ۇلتتىق كيىم ءپىشىنى، ۇلگىسى، ءتۇسى جاعىنان ادامنىڭ بەلگىلى ءبىر تەككە جاتاتىنىن اڭعارتىپ قانا قويمايدى، سونىمەن قاتار ەل تاريحى مەن مادەنيەتىنەن زور حابار بەرەدى. ەلباسى كىتاپحاناسىنىڭ مۋزەيىندە وتكەن «حانبوك: ءداستۇردىڭ رۋحاني ەمى» اتتى كورەي ۇلتتىق كيىمدەر كورمەسىندە كونە مۇرانىڭ جاڭعىرعان، جاڭارعان سيپاتىنا كۋا بولدىق.

ايا ءومىرتاي

كورەي رەسپۋبليكاسى ەلشىلىگىنىڭ مادەني ورتالىعى مەن ەلباسى كىتاپحاناسى بىرلەسە ۇيىمداستىرعان بۇل جولعى سالتاناتتى جيىن قوس مەملەكەت اراسىنداعى ستراتەگيالىق سەرىكتەستىكتىڭ مەرەيلى 10 جىلدىعىنا ارنالىپ وتىر. كورمەنىڭ اشىلۋىندا ءسوز العان ەلباسى كىتاپحاناسىنىڭ ديرەكتورى ءامىرحان راحىمجانوۆ مادەنيەت سالالارى بويىنشا ىنتىماقتاستىق بايلانىستاردى نىعايتۋ بويىنشا ءوتىپ جاتقان كەزەكتى جيىننىڭ ماڭىزىنا توقتالدى. سونداي-اق ۇلتتىق كيىم ۇلگىلەرىنىڭ كونسترۋكتسياسىندا، ۇلتتىق ناقىشىندا، ويۋ-ورنەگىندە كەز كەلگەن ۇلتتىڭ دۇنيەتانىمى جاتاتىنىن، ۇلتتىق قۇندىلىقتى قاستەرلەۋ تۇرعىسىنان قازاق پەن كورەي ۇلتىنىڭ وزىندىك ۇقساس تۇستارى بار ەكەندىگىن جەتكىزدى. ال كورەي رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كيم دەسيك مىرزا اتالعان جيىننىڭ ەلدەر اراسىنداعى ءوزارا تۇسىنىستىكتى نىعايتۋدا ورنى ايرىقشا ەكەنىن ايتتى.

كورمەدە ديزاينەر كۆاك گونچجۋ مەن سانگەر رو ءچجۋحيوننىڭ 10-نان استام حانبوك كوستيۋمى جانە «حاندجي» كورەي قاعازىنا تۇسىرىلگەن 45-كە جۋىق زاماناۋي گرافيكالىق شىعارماسى ۇسىنىلدى. تۋىندىلار بولمىس پەن ادامعا ءتان ءومىر قۇبىلىستارىن سۋرەتتەۋ ارقىلى كورەرمەنگە وي سالۋدى كوزدەيدى.

قاراپايىم ءارى ۇقىپتى تىگىلگەن حانبوك كوستيۋمىنىڭ شالعايى مول ءپىشىلىپ، قولتىعى مەن جەڭى كەڭ ءارى ۇزىن كەلەدى. ەدەنگە دەيىن توگىلگەن كويلەك ەتەگى كەستەلى ويۋ-ورنەكپەن ادىپتەلسە، كەۋدە تۇسىنداعى بانت بەشپەتكە ايرىقشا نازىكتىك دارىتقان. جىبەك پەن شىلتەردىڭ ۇيلەسىمىنەن تۋعان «چوگوري» بەشپەتى مەن «چيما» بەلدەمشەسىندە كەستەلەنگەن گۇل مەن كوبەلەكتەر كيىمنىڭ ارناۋلى مەرەكەلىك كەشكە تيەسىلى ەكەنىن اڭعارتادى. ودان بولەك كوستيۋمدەگى ءتۇس الۋاندىعى سيمۆولدىق مانگە يە كورىنەدى. ماسەلەن، ەرلەردىڭ باس كيىمىندەگى قارا ءتۇس شەكسىزدىك پەن شىعارماشىلىق باستاۋ ۇعىمىن بىلدىرسە، قىزىل ءتۇس تابىستىڭ ءتۇسىن اڭعارتقان.

«كورەي ۇلتتىق كيىمىندەگى سىزىقتار ءىس-ارەكەتتى عانا ەمەس، قورشاعان ورتاعا دەگەن قارىم-قاتىناستى كورسەتەدى. بۇگىنگى كورمەدەگى شىعارمالار ءبىزدىڭ وتكەنىمىزگە، بۇگىنىمىز بەن بولاشاعىمىزعا بايلانىستى ءومىردىڭ ماڭىزدى كەزەڭدەرىن بەينەلەيدى. وسى كورمە ارقىلى سىزدەر دە ساۋىعۋدىڭ وزىندىك جولىن، ءوز جولدارىڭىزدى تاباسىزدار دەپ سەنەمىن»، دەدى ديزاينەر كۆاك گونچجۋ. ونىڭ ايتۋىنشا، جارتى عاسىر بۇرىن كۇندەلىكتى كيىم ەسەبىندە بولعان بۇل كوستيۋمدەر قازىرگى كۇنى ۇلكەن مەرەكەلەر مەن ءتۇرلى توي كۇندەرى عانا كيىلەدى. ايتسە دە زاماناۋي ديزاينەرلەر توبى اتا-باباسىنان مۇراعا قالعان ۇلتتىق كيىمدەرىنە ەستەتيكالىق تارتىمدىلىق سىيلاپ، جاڭا ۇلگىدەگى مادەنيەتتىڭ قۇرامداس بولىگى رەتىندە ايقىنداۋدى ءجون كورىپ وتىر.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز