ەكونوميكا • 11 قىركۇيەك، 2019

ەلەكتروندى ساۋدانىڭ ۇلەسى ارتادى

35 رەتكورسەتىلدى

ەلىمىزدە ەلەكتروندى كوممەرتسيانى دامىتۋدىڭ 2019-2025 جىلدارعا ارنالعان جول كارتاسى بەكىتىلدى. جۇيەلى جۇمىس جۇرگىزىلسە، الداعى التى جىلدا ەلەكتروندى ساۋدانىڭ ۇلەسى قازىرگى 2،9%-دان 5%-عا دەيىن ارتۋى بەك مۇمكىن.

بۇل تۋرالى ۇكىمەتتە وتكەن ءباسپاسوز كونفەرەنتسياسىندا ساۋدا جانە ينتەگراتسيا ءمينيسترى باقىت سۇلتانوۆ مالىمدەدى. ونىڭ ايتۋىنشا، ەلەكتروندى ساۋدانى دامىتۋ ءۇشىن بىزدە بارلىق زاڭنامالىق جاعدايلار جاسالعان. زاماناۋي ساۋدا فورماتتارىنا دا كوپ كوڭىل بولىنۋدە.

− 2019 جىلعى 2 ساۋىردە «بيزنەس ورتانى دامىتۋ جانە ساۋدا قىزمەتىن رەتتەۋ تۋرالى» زاڭ قابىلداندى، وندا ەلەكتروندى ساۋدانى جانە بيرجا ساۋداسىن دامىتۋ كوزدەلگەن. ءتيىستى ينفراقۇرىلىم جاسالۋدا. قازىر نارىقتا 20-عا جۋىق پلاتفورما بار، شامامەن 1700 كاسىپكەر ەلەكتروندى كوممەرتسيادا جۇمىس ىستەيدى، دەدى ب.سۇلتانوۆ.

قازاقستان جەتەكشى الەمدىك كورپوراتسيالاردىڭ كومەگىمەن ينتەرنەت ارقىلى ساۋدانى دامىتۋدى كوزدەيدى. 2019 جىلعى 26 تامىزدا ساۋدا جانە ينتەگراتسيا مينيسترلىگى مەن رەسەيدەگى №1 «Wildberries» ونلاين-ريتەيلەر اراسىندا ءوزارا ىنتىماقتاستىق تۋرالى كەلىسىمگە قول قويىلدى. وندا «Wildberries» قاتىساتىن بارلىق اۋماقتا ەلەكتروندى ساۋدا ارنالارىن قولدانىپ، قازاقستاندىق ەكسپورتتاۋشىلاردىڭ حالىقارالىق ساۋداعا قاتىسۋى قاراستىرىلعان. قازاقستاندىق تاۋارلاردى ەكسپورتتاۋدى ىلگەرىلەتۋ ءۇشىن باسقا دا شەتەلدىك ينتەرنەت-الاڭدارمەن وسىنداي جۇمىستار جۇرگىزۋ جوس­پارلانىپ وتىر.

– ءبىز ولارمەن بىرگە ەلەكتروندى ساۋدانى دامىتۋ جۇيەسىن ازىر­لەپ، ۇلەسىن ارتتىراتىن بولامىز. بۇگىندە ينتەرنەت ساۋدانىڭ بولشەك ساۋداعا قاتىستى ۇلەسى − 2،9%. مەم­­لەكەت باسشىسىنىڭ قىتايعا ساپارى اياسىندا Alibaba ءتارىزدى ءىرى ەلەكتروندى الاڭ وكىلىمەن كەزدەسۋ جوسپارلانعان. بۇل سالادا سال­ماقتى ويىنشىلاردىڭ بولۋى بىزگە بارىنشا دۇرىس باعىتتا دامۋ­عا مۇم­­كىندىك بەرەدى. ءبىزدىڭ كاسىپ­كەر­لەرىمىز الەم­دىك ويىنشىلارمەن بەل­سەنە ىن­تىماقتاستىق ورناتۋعا ءتيىس. بۇل قازاقستاندا ەلەكتروندى كوم­مەرتسيا­نى قارقىندى دامىتۋعا مۇم­كىندىك بەرەدى، دەدى مينيستر. الداعى ۋاقىتتا ءتۇسىندىرۋ جۇ­مىس­­­تارىن جۇرگىزۋگە باسىمدىق بەرىلمەك.

سوڭعى جاڭالىقتار

ۇقساس جاڭالىقتار