ءۇش ءجۇز الپىس اۋليەلى ماڭعىستاۋ اتانعان باعزى جۇرت, باباتوپىراقتا كۇللى قازاق, ءيسى مۇسىلمان الەمى ءۇشىن قۇندى سانالاتىن قاسيەتتى ورىندار از ەمەس. سولاردىڭ ءبىرى – سيسەم اتا قاۋىمى. بۇل قاۋىمدا تاريحي تۇلعالار, ەل قورعاعان باتىرلار, بيلەر مەن بەكتەر, جومارت-مىرزالار, رۋباسىلارى مەن رۋحاني كوسەمدەردىڭ ارۋاعى بايىز تاپقان. سيسەم اتا تۋرالى تاريحي ماعلۇمات تىم از. ونىڭ يسلام ءدىنىن تاراتقان قاسيەت يەسى بولعاندىعى عانا ايتىلادى سيسەم اتا قورىمى – كەرەمەت ويۋلارىمەن, تاڭعاجايىپ ەپيگرافيكاسىمەن, ءار ءتۇرلى ساۋلەتتىك پىشىندەرمەن ەرەكشەلەنەدى. ماڭعىستاۋلىقتار بۇل ورىندى قازاق حالقىنىڭ بىرنەشە قايراتكەرلەرى جەرلەنگەندىگىمەن قۇرمەت تۇتادى.
سيسەم اتا قورىمى ماڭعىستاۋ اۋدانىنىڭ سايوتەس ەلدى-مەكەنىنەن 35 شاقىرىم قاشىقتىقتا ورنالاسقان ۇلكەن قاۋىم. عىلىمي تىلدە پانتەون (يگى جاقسىلار, جايساڭدار, رۋباسىلار) دەپ اتايدى.
- جەرگىلىكتى كاسىپكەرلەردىڭ قولداۋىمەن, ەل اعالارىنىڭ باستاماسىمەن 13-14 قىركۇيەك كۇنى وتەتىن جالپىحالىقتىق اس شاراسىندا, قازاق كۇرەسى, الامان بايگە, جازبا اقىندار ءمۇشايراسى, ۇلتتىق سپورت تۇرلەرىنەن ءتۇرلى سايىستار جوعارى دەڭگەيدە وتەدى دەپ كۇتىلۋدە. قازىرگى ۋاقىتتا سيسەم اتاعا ارنايى مۋلتيمەديالىق ينتەراكتيۆتى كارتا جاساقتالىپ جاتىر, ياعني ۇيالى تەلەفونمەن QR كود ارقىلى سيسەم اتا تۋرالى بارلىق مالىمەتتەردى كورۋگە بولادى, دەيدى ۇيىمداستىرۋشىلار.
رۋحاني شارا وتەس ەلدى مەكەنىنەن 2 شاقىرىم جەردە وتەدى. تاڭداپ الىنعان ارنايى ورىن كۇرە جولدان 500 مەتردەي قاشىقتىقتا ورنالاسقان. اسقا 130-عا جۋىق ءۇي تىگىلىپ, 5 مىڭ ادام قاتىسادى دەپ جوسپارلانعان.
ايتا كەتەيىك, قازاقستاننىڭ باتىسىندا ورنالاسقان سيسەم اتا قورىمى رەسپۋبليكالىق دارەجەدەگى قورعاۋعا الىنعان ماڭىزدى ەسكەرتكىشتەردىڭ قاتارىنا كىرەدى.
ماڭعىستاۋ وبلىسى
