كوپبالالى ءۇيدىڭ وتاعاسى سەرىك جادىگەر 2017 جىلى ەلدىڭ سولتۇستىك وڭىرلەرىنىڭ بىرىنە كوشۋ تۋرالى شەشىم قابىلدادى. قونىس اۋدارۋعا, بىردەن ءبىر سەبەپ بالا كەزىنەن مۇگەدەكتىگى بار, 5 كۇردەلى وتا جاساتقان 5 سىنىپ وقۋشىسى قىزى اسەماي كارىم بولدى. قىز بالانىڭ دەنساۋلىعى شۇعىل تۇردە كليمات جاعدايىنىڭ اۋىسۋىن قاجەت ەتتى.
ء«بىزدىڭ التى بالامىز بار. بيىلعى جىلدىڭ ءساۋىر ايىندا بىزگە 1 ملن 567 مىڭ 200 تەڭگە سوماسىندا اتاۋلى الەۋمەتتىك كومەك تاعايىندالدى, اي سايىن 130 مىڭ 600 تەڭگە الامىز. سونداي-اق بىزگە جەكە قوسالقى شارۋاشىلىقتى دامىتۋعا 176 مىڭ 750 تەڭگە كولەمىندە كومەك كورسەتىلدى. بۇل اقشاعا ءبىز سيىر ساتىپ الدىق. ەندى دۇكەننەن ءسۇت ونىمدەرىن ساتىپ المايمىز – ءبارى تابيعي. تاعى بىزگە «وتاۋ تۆ» تەلەۆيزيالىق پريستاۆكاسىن ورناتىپ بەردى. ارينە, تۋعان ولكەمىزدى ساعىنامىز, بىراق بۇل جاقتا دا بىزگە وتە ۇنايدى», – دەدى سەرىكتىڭ جۇبايى مارجان نالىباەۆا.
ەرتىس اۋداندىق ءماسليحاتىنىڭ شەشىمى بويىنشا بۇل كوپ بالالى وتباسىنىڭ 4 بالاسىن مەكتەپكە دايىنداۋعا 50 مىڭ 500 تەڭگە كولەمىندە بىرجولعى الەۋمەتتىك تولەم كورسەتىلدى.
«سەرىك جادىگەر تۇراقتى جۇمىسپەن قامتاماسىز ەتىلدى. ەندى ول «مايقوڭىر اۋىلى اكىمىنىڭ اپپاراتى» كمم-دە جۇرگىزۋشى بولىپ جۇمىس ىستەيدى. ونىڭ جۇبايى مارجان نالىباەۆا مايقوڭىر اۋىلدىق كلۋبىنا تەحنيكالىق قىزمەتكەر بولىپ جۇمىسقا تۇرعىزىلدى», – دەپ حابارلادى پاۆلودار وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ورىنباسارى گۇلنار كامالوۆا.
سونىمەن قاتار, ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىنىڭ ەكىنشى باعىتى اياسىندا سەرىك جادىگەرگە مال ءوسىرۋ ءۇشىن 1 ملن 500 مىڭ تەڭگە سوماسىندا ميكروكرەديت الۋعا كومەك كورسەتىلدى. بۇل قاراجاتقا ول ءوزىنىڭ جەكە قوسالقى شارۋاشىلىعى ءۇشىن 50 باس قوي ساتىپ الدى.
ء«بىزدىڭ وتباسىمىزعا جاڭا ورىندا ناقتى كومەك كورسەتىلدى, بالالاردىڭ مەكتەپكە كەرەك-جاراعىن دا الۋعا دا كومەكتەستى, جۇمىسقا دا ورنالاستىردى. ال ااك-ءتىڭ كومەگىمەن وتباسىمنىڭ ءال-اۋقاتى ايتارلىقتاي جاقساردى. ەندى ءبىز جاقسى ءومىر ءسۇرىپ جاتىرمىز دەپ ايتا الامىن», دەپ سەرىك جادىگەر ءوز ويىمەن ءبولىستى.
پاۆلودار وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ اقپاراتى بويىنشا, قازىرگى ۋاقىتتا 59 وتباسى جالپى سوماسى 19 ملن 200 مىڭ تەڭگە سوماسىندا الەۋمەتتىك كومەك الادى, ونىڭ ىشىندە 42 وتباسىعا 100 اەك كولەمىندە, جالپى سوماسى 10 ميلليون 600 مىڭ تەڭگە, 17 وتباسىعا ارقايسىسىنا 200 اەك-تەن, جالپى سوماسى 8 ميلليون 600 مىڭ تەڭگە تولەنەدى.
ەستەرىڭىزگە سالا كەتەيىك, اعىمداعى جىلعى 15 تامىزداعى جاعداي بويىنشا اتاۋلى الەۋمەتتىك كومەكپەن 1,8 ملن قازاقستاندىق قامتىلعان. جاردەماقى الۋشىلاردىڭ ەڭ كوپ سانى تۇركىستان وبلىسىندا – 498,7 مىڭ ادام, الماتى وبلىسىندا – 225,4 مىڭ ادام, شىمكەنت قالاسىندا – 216,3 مىڭ ادام تۇرادى. اعىمداعى جىلعى 1 تامىزداعى جاعداي بويىنشا 103 ملرد تەڭگە كولەمىندە ااك تولەندى. ءبىر وتباسىنا تولەمنىڭ ورتاشا مولشەرى ايىنا 86 مىڭ تەڭگەنى قۇراپ وتىر.
