ءيا, اباي اۋدانى تۋرالى بەكەرگە ءسوز قوزعاپ وتىرعان جوقپىز. بىلتىر اۋدان ورتالىعى – قاراۋىل اۋىلىندا شاكارىم قۇدايبەرديەۆتىڭ 160 جىلدىق مەرەيتويىندا اباي اۋدانىنىڭ تاريحىنداعى تۇڭعىش باسسەين سالتاناتتى تۇردە اشىلعان-دى.
جاقىندا شەجىرەلى ولكەگە جاساعان جۇمىس ساپارى بارىسىندا باسسەيندى ارنايى بارىپ كوردىك. «بۇل باسسەين وبلىس اكىمى دانيال احمەتوۆتىڭ باستاماسىمەن سالىنعان. ول كىسى اۋدانعا ءبىر كەلگەنىندە: «شالعايدا جاتقان اۋىل بالالارى قالانىڭ بالالارىنان كەم بولماۋى كەرەك. سوندىقتان زاماناۋي باسسەين سالامىز» دەپ ەل الدىندا ۋادە بەرگەن بولاتىن. كوپ جەرلەردە باسسەيندەردىڭ ۇزىندىعى 25 مەتر بولعانىمەن جولاقتار سانى از. ال قاراۋىلداعى باسسەين بەس جولاقتى. قالا ستاندارتىنا ساي جاسالىنعان. باسسەيندى سالۋعا وبلىستىق بيۋدجەتتەن 262 ميلليون تەڭگە قارجى ءبولىندى», دەدى ءبىزدى باسسەينگە باستاپ اكەلگەن اباي اۋداندىق ىشكى ساياسات ءبولىمىنىڭ باسشىسى ۇلان ساعاديەۆ.
ءبىز باسسەينگە كەلگەندە جاتتىقتىرۋشىلار جۇمىسقا ءالى كەلمەگەن ەكەن. الايدا ءبىزدى باسسەيننىڭ كىرەبەرىسىندە قارسى العان, وسىندا وپەراتور-لابورانت بولىپ جۇمىس ىستەيتىن دانا سايلاۋحانقىزى ابايلىقتارعا تاڭسىق عيمارات جايلى اڭگىمەلەپ, نىساننىڭ ءىشىن ارالاتىپ كورسەتتى. مۇندا بەس جولاقتى باسسەيننەن بولەك مونشا, جاتتىقتىرۋشىلار بولمەسى, جاتتىعۋ زالى, زەرتحانا قاراستىرىلعان. «مەن زەرتحانادا جۇمىس ىستەيمىن. سۋ قۇرامىن كۇنىنە بىرنەشە مارتە تەكسەرىپ وتىرامىز. وسكەمەندەگى ورتالىق باسسەينگە ارنايى بارىپ, ونداعى زەرتحانانىڭ جۇمىسىمەن تانىسىپ قايتتىق. بۇل باسسەينگە بالالاردى 6 جاستان 15 جاسقا دەيىن قابىلدايمىز. تۇسكە دەيىن, تۇستەن كەيىن ەكى مەزگىل ءبىر ساعات سۋعا تۇسەدى. بيىل مامىر ايىندا اۋدان تاريحىنداعى سۋعا جۇزۋدەن تۇڭعىش جارىس ءوتتى. مۇنداي سايىستى بۇرىن-سوڭدى كورمەگەندىكتەن ءبارىمىز قىزىعا تاماشالادىق. مەنىڭ بىلۋىمشە, وسىنداي باسسەين وبلىسىمىزدا زايسان مەن اباي اۋدانىندا عانا بار» دەگەن دانا سايلاۋحانقىزى باسسەينگە ەرەسەك ادامدار كەشكىلىكتە اقىلى تۇردە تۇسەتىندىگىن جەتكىزدى.
باسسەينگە وبلىس ورتالىعى – وسكەمەننەن ارنايى جاتتىقتىرۋشىلار شاقىرىلىپتى. ەرلى-زايىپتى جانات پەن مەرۋەرتكە «ديپلوممەن – اۋىلعا!» باعدارلاماسى ارقىلى باسپانا بەرىلىپ, كوتەرمەاقى تولەنىپتى. قاراۋىلدىڭ بالالارىن سۋعا جۇزۋگە باۋلىپ جاتقان جاتتىقتىرۋشى, زايسان اۋدانىنىڭ تۋماسى مەرۋەرت تەلەمەديەۆا بۇعان دەيىن وسكەمەندەگى ولگا رىپاكوۆا اتىنداعى جەڭىل اتلەتيكا سارايىندا جۇمىس ىستەگەن ەكەن. بيىلعى وقۋ جىلىنىڭ سوڭىندا وتكەن جارىسقا 30-عا تارتا بالا قاتىسىپ, ەركىن جانە شالقالاپ ءجۇزۋ ادىستەرىمەن 25 مەتر قاشىقتىقتا باقتارىن سىناپ كورىپتى. «العاشقى جارىس بولعاننان كەيىن 25 مەتردى ءجون دەپ شەشتىك. سۋدا ەمىن-ەركىن ءجۇزىپ, تەحنيكا قالىپتاستىرۋ ءۇشىن كەم دەگەندە ءبىر-ەكى جىل ۋاقىت كەرەك. بولاشاعىنان ءۇمىت كۇتتىرەتىن تالاپتى, ىنتالى بالالار بار. ولاردى جاڭا وقۋ جىلىنان باستاپ بىرتىندەپ وسكەمەن مەن سەمەيدە وتەتىن جارىستارعا قاتىستىرامىز», دەيدى مەرۋەرت.
شىعىس قازاقستان وبلىسى,
اباي اۋدانى,
قاراۋىل اۋىلى
