كلۋبتىڭ جىلدىق بيۋدجەتى 32-35 ميلليون اقش دوللارىن قۇرايدى. سول قىرۋار قارجى-قاراجاتتىڭ باسىم بولىگى شەتەلدىكتەردىڭ ەسەپشوتىنا ءتۇسىپ وتىرعانى دا بەلگىلى. وكىنىشكە قاراي, «استانانىڭ» اتى وزىمىزدىكى بولعانىمەن, زاتى باسقا بولىپ تۇر. بۇلاي دەيتىنىمىز, وسى كوماندانىڭ پرەزيدەنتى پول ەشۋورت ( ۇلىبريتانيا) پەن باس باپكەرى رومان گريگورچۋك (ۋكراينا) مىرزالاردان باستاپ, وعان مۇشە 18 ويىنشىنىڭ تەڭ جارتىسى – لەگيونەرلەر.
سانامالاپ كورەتىن بولساق, قورعاۋشىلار انتونيو رۋكاۆينا (№2) – سەربيا, جاركو توماشەۆيچ (№6) – بوسنيا جانە چەرنوگوريا, جارتىلاي قورعاۋشىلار دورين روتاريۋ (№9) – رۋمىنيا, رۋنار مار سيگۋرونسسون (№10) – يسلانديا, مارين توماسوۆ (№14) پەن لۋكا شيمۋنوۆيچ (№24) – حورۆاتيا, يۆان ماەۆسكي (№18) – بەلارۋس, شابۋىلشىلار فيرمين مۋبەلە (№19) – كونگو دەموكراتيالىق رەسپۋبليكاسى, رانگەلو يانگا (№32) – نيدەرلاند ەلدەرىنىڭ ازاماتى. تاعى ەكەۋىنە, دالىرەگى سەربيالىق قاقپاشى نەناد ەريچ (№1) پەن رەسەيلىك قورعاۋشى ەۆگەني پوستنيكوۆقا (№44) قازاقستان ازاماتتىعى بەرىلگەن. بۇعان تۇركيانىڭ كونيا قالاسىنداعى «كونياسپور» كلۋبىنا تاياۋدا عانا اۋىسقان بوسنيا جانە گەرتسەگوۆينانىڭ وكىلى مارين ءانيچيچتى قوسىڭىزدار.
قالعان جەتەۋى عانا تازا قازاقستاندىق, سونىڭ ىشىندە ەكەۋى عانا ناعىز قازاق. ولار – قاقپاشى الەكساندر موكين (№35), قورعاۋشىلار – ابزال بەيسەبەكوۆ (№15), يۋري لوگۆينەنكو (№27), دميتري شومكو (№77), جارتىلاي قورعاۋشىلار – سەرىكجان مۇجىقوۆ (№7), يۋري پەرتسۋك (№28), شابۋىلشى – رومان مۋرتازاەۆ (№45). كەيدە سول قوس قانداسىمىزدى دا جاسىل الاڭعا شىعارماي قويادى. بىراۋىق بىزگە ەلوردالىق كلۋبتىڭ ويىنشىلارى: «بارلىق ەلدەردىڭ لەگيونەرلەرى, بىرىگىڭدەر!» دەپ ۇراندايتىنداي سىڭايلى كورىنەدى. اينالايىن, اعايىن, ادىلدىگىن ايتىڭىزدارشى, سوندا «استانا» قاي ەلدىڭ كومانداسى بولعانى؟!
كەزىندە قازاقستان فۋتبول فەدەراتسياسى شىمكەنتتىڭ «ورداباسى» كاسىبي فۋتبول كلۋبىنا كورسەتىلگەن ليميتتەن ارتىق لەگيونەرلەر الىپ قويعانى ءۇشىن قوماقتى كولەمدە قارجىلاي ايىپپۇل سالۋمەن بىرگە ەۋروكۋبوك باسەكەلەرىنەن شەتتەتكەنى ەستەرىڭىزدە شىعار. ءدال سونداي تارتىپتىك جازالاۋ شارالارى «استاناعا» كەلگەندە نەلىكتەن جۇزەگە اسپاي قالاتىنى تۇسىنىكسىز. سىزدەر بۇعان نە دەيسىزدەر, جانكۇيەر قاۋىم؟!
ءابدىساتتار ءالىپ,
سپورت جۋرناليستەرى اراسىنداعى رەسپۋبليكالىق شىعارماشىلىق كونكۋرستىڭ لاۋرەاتى
شىمكەنت
