«تاڭعالارلىعى, بۇل مۋزىكا فەستيۆالى ماتەريالدىق ەمەس قۇندىلىق رەتىندە يۋنەسكو تىزىلىمىنە ەنىپ, ەكى جىلدا ءبىر رەت وتكىزىلەتىن وزبەكستان ۇكىمەتىنىڭ اسا ءىرى مەملەكەتتىك ءىس-شاراسى ەكەن. ءتورت كۇنگە سوزىلعان فەستيۆالعا الەمنىڭ 33 مەملەكەتىنىڭ 300-دەن استام ءداستۇرلى ونەرپازى قاتىستى. وتىز ءۇش مەملەكەتتىڭ ونەرپازدارىنىڭ جيىرما مينۋتتىق ونەرىن ءتورت كۇن بويى ون ادامنان قۇرالعان تاۋەلسىز قازىلار القاسى ساراپتادى. ءبىزدىڭ «بابالار سازى» ەتنو ءانسامبلى فەستيۆالدىڭ ءۇشىنشى كۇنى ساحناعا شىقتى. حالقىمىزدىڭ قارا دومبىراسىن باس قىلىپ, قىل قوبىزىن, جەتىگەنى مەن شەرتەرىن, شاڭقوبىزى مەن سازسىرنايىن, ورتەكەسىن ورعىتىپ, التاي-تارباعاتاي ءان-كۇي مەكتەبىنەن حالىق كۇيلەرى «بۇلعىن سۋسار» مەن «قارا جورعانى», ءداستۇرلى ءانشى ە.قۇجيمانوۆ ء«ۇش تەكە», داۋلەتكەرەيدىڭ «كوروعلى», جامبىلدىڭ «اقىندارعا ارناۋىن», ت.شاكارىموۆ پەن ا.احات ۇلى «دومبىرا» شىعارماسىن ورىندادى. بۇل فەستيۆالعا قاتىسقانداردىڭ بارلىعى دەرلىك وبلىستىق, رەسپۋبليكالىق دەڭگەيدەگى فيلارمونيا, ونەر ۇجىمدارى ەكەنىن ايتا كەتكەن ورىندى. قاعىس دىبىستى قالت ەتكىزبەيتىن قازىلار الدىندا تارباعاتايلىق ونەرپازداردىڭ ونەر كورسەتۋى وڭايعا تۇسكەن جوق. «بابالار سازى» ەتنو توبى – الىس اۋىلداعى قاراپايىم مادەنيەت ءۇيىنىڭ ونەرپازدارى. ۇلتتىق اسپاپتارىمىزدىڭ ءۇنىن الەم ەلدەرى ۇنىنە ۇلاستىرىپ قايتقان ونەرپاز ۇجىم ءۇشىن بۇل بايقاۋ شەبەرلىك مەكتەبىنەن ءوتۋدىڭ ۇلگىسى بولدى», دەيدى ەتنو انسامبلدىڭ جەتەكشىسى, اقسۋاتتاعى مادەنيەت ءۇيىنىڭ ديرەكتورى شاكەن كوپشىكباەۆا.
فەستيۆال قورىتىندىسىندا «بابالار سازى» يران ەلىنىڭ «ساراي حانىمدارى», ءۇندىستاننىڭ «سامانۆايا» انسامبلدەرىمەن بىرگە ء«داستۇردى جالعاستىرۋشىلار» ارنايى اتالىمىمەن (500 اقش دوللارى) ماراپاتتالىپتى. ورايى كەلگەندە ايتا كەتەيىك, بۇل ونەر ۇجىمى بۇعان دەيىن قىتايدىڭ شاۋەشەك قالاسىندا, يران يسلام رەسپۋبليكاسىندا, تۇركيا ەلىنىڭ انكارا, بۋرسا شاھارلارىندا وتكەن حالىقارالىق فەستيۆالدارعا قاتىسىپ قايتقان بولاتىن.
شىعىس قازاقستان وبلىسى,
تارباعاتاي اۋدانى,
اقسۋات اۋىلى
