وقيعا ءساتجان ەسىمدى جاس جازۋشىنىڭ الماتىعا كەلۋىمەن باستالادى. جازۋشىلار وداعىنا قابىلدانىپ, شىعارمالارىمەن بىردەن كوزگە تۇسكەن جاس تالانت عىلىم جولىنا بەت بۇرادى. جابىق تاقىرىپ سانالىپ كەلگەن الاش تاقىرىبىنا ديسسەرتاتسيا جازا باستاعان ول قىسپاققا الىنىپ, قاتاڭ يدەولوگيالىق باقىلاۋدىڭ ۇستەمدىگى جازۋشى مۇراتىن اياقاستى ەتۋگە كۇش سالادى. فيلمدە وتكەن عاسىردىڭ 70-80-جىلدارىنداعى اقىن-جازۋشىلاردىڭ باسىنان كەشكەن جاعدايى باس كەيىپكەر ءساتجان ارقىلى بەينەلەنەدى. ءساتجان – جيىنتىق وبراز. كينوكارتينادا ادەبيەتتىڭ قوعام ىسىنە باتىل ارالاسۋى, ادەبيەتتىڭ تاقىرىپتىق ارناسىنىڭ كەڭەيۋى تۇسىندا اتسالىسقان اقىن-جازۋشىلار وبرازى, وعان قوسا ماحاببات دراماسى وسى ءساتجاننىڭ بويىنا توعىستىرىلعان.
«جازۋشىلار وداعىنىڭ بيىك مىنبەرىندە پارتيانىڭ جالىندى ۇندەۋلەرى جاريالانسا, ىرگەدەگى «قالامگەر» كافەسىندە ايتىلاتىن اڭگىمەلەردىڭ اۋانى ءتىپتى باسقا بولاتىن. كومپارتيا نۇسقاۋلارىنىڭ كۇشى جۇرمەيتىن, تسەنزۋرانىڭ قامىتى قىسپايتىن, جازۋشىلاردىڭ ءازىلى مەن استارلى اڭگىمەسى, قالجىڭى مەن قاعىتپاسى قاتار جۇرەتىن «قالامگەر» كافەسى سول كەزدەگى قوعامنىڭ شىنايى بەت-پەردەسىنىڭ سيمۆولى رەتىندە الىنىپ وتىر», دەيدى فيلم رەجيسسەرى مۇرات بيدوسوۆ. ونىڭ ايتۋىنشا, دراما اتاۋى – قولىنا قالام ۇستاعان جازۋشى قاۋىمدى مەڭزەسە, استارلى ماعىناسىندا ازاتتىققا ۇمتىلعان قالامگەر قاۋىمنىڭ بۇلقىنىسى, ىشكى شەرىن كورسەتەدى. فيلم ومىردە بولعان ادامداردىڭ پروتوتيپتەرى ارقىلى ولار باستان كەشكەن وقيعالارعا سۇيەنە وتىرىپ, سول ءداۋىردىڭ تىنىس-تىرشىلىگىن كورسەتۋدى ماقسات تۇتقان.
– تۋىندىداعى كەيىپكەرلەردىڭ دەنى تاريحي تۇلعالار. باس كەيىپكەر ءساتجان سول داۋىردەگى قالامگەرلەردىڭ جيىنتىق وبرازى بولسا, وعان قارسى تۇراتىن جاعىمسىز كەيىپكەر دە پارتيانىڭ سويىلىن سوققان, ۋاقىتتىڭ قۇربانىنا اينالعان جان, – دەيدى «قالامگەر» ءفيلمىنىڭ ستسەناري اۆتورى سەرجان زاكەر ۇلى.
كارتيناعا كورنەكتى جازۋشى دۋلات يسابەكوۆ, اقىن باقىت بەدەلحان كەڭەسشى رەتىندە تارتىلىپ, تۋىندىنىڭ جالپى مازمۇنى مەن كوركەمدىك تالاپتارىن مۇقيات پىسىقتاعان. باستى رولدەردى سومداعانداردىڭ قاتارىندا باعداۋلەت شايماحان, جالعاس تولعانباي, نارعىز التايباي, ەرگەنباي ابۋەۆ, دوسجان جانبوتاەۆ, بالتاباي سەيىتمامىت, ارنۇر قۇدياربەك بار. 14 بولىمنەن تۇراتىن كوپ سەريالى تۋىندىنىڭ تەلەۆيزيالىق نۇسقاسى تاۋەلسىزدىك كۇنى قارساڭىندا «حابار» ارناسىنان قالىڭ كورەرمەنگە جول تارتادى. جوبا اقپارات جانە قوعامدىق دامۋ مينيسترلىگىنىڭ قولداۋىمەن جۇزەگە اسىرىلىپ, «رۋحاني جاڭعىرۋ» باعدارلاماسى اياسىندا ءتۇسىرىلدى.
