الدىمەن جاستار قۇراماسى ەلوردادا بيىل عانا ەۋروپا چەمپيونى اتانعان يسپانيا فۋتبولشىلارىن قابىلداپ, 0:1 ناتيجەسىمەن ەسە جىبەردى. اتاقتى «بارسەلونا», «رەال» سەكىلدى الەمدىك توپ كلۋبتاردىڭ تاربيەلەنۋشىلەرىنەن قۇرالعان يسپانيا قۇراماسىنا ءبىزدىڭ فۋتبولشىلار لايىقتى قارسىلىق كورسەتتى. «استانا ارەنادا» وتكەن كەزدەسۋدىڭ العاشقى 30 مينۋتى تەڭ دارەجەدە ءوتىپ, ەكى قۇراما دا الما-كەزەك شابۋىلداۋمەن بولدى. قارسىلاس كوماندانىڭ كەزەكتى ءبىر شابۋىلىندا قازاقستاندىق فۋتبولشى ويىن ءتارتىبىن بۇزدى دەپ شوتلانديالىق تورەشى نيكولاس ۋولش قازاقستان قۇراماسىنىڭ قاقپاسىنا 11 مەترلىك ايىپ دوبىن بەلگىلەدى. يسپانيا قۇراماسىنىڭ كاپيتانى داني ولمو پەنالتيدى مۇلتىكسىز ورىندادى. فۋتبول جانكۇيەرلەرىنىڭ ەسىندە بولسا, ولمو وسىمەن قازاقستان استاناسىنا ەكىنشى رەت كەلىپ, ەكى ويىندا دا گول سوقتى. حورۆاتيانىڭ «دينامو زاگرەب» كلۋبىنىڭ ويىنشىسى بىلتىر چەمپيوندار ليگاسىنىڭ ىرىكتەۋ كەزەڭىندە «استاناعا» قارسى ويناپ, 84-مينۋتىندا ەريچتى سان سوقتىرىپ كەتكەن بولاتىن. سول ويىندا «دينامو زاگرەب» 0:2 ەسەبىمەن جەڭىسكە جەتكەن-ءدى.
وتانداستارىمىز گول وتكىزىپ العان سوڭ قارسىلاس كوماندانىڭ قاقپاسىنا قاراي شابۋىلدى ۇدەتە تۇسكەنىمەن, ناتيجەلى اياقتايتىن فۋتبولشى تابىلماي جاتتى. كەزدەسۋدىڭ ءبىرىنشى بولىگى يسپانيالىقتاردىڭ ءسال عانا باسىمدىعىمەن اياقتالدى.
ەكىنشى تايمنىڭ باسىندا يسپانيا قۇراماسىنىڭ باس باپكەرى تاكتيكاعا ازداعان وزگەرىس ەنگىزىپ, الاڭعا قوسالقى قۇرامنان ەكى شابۋىلشىنى شىعارۋعا ءماجبۇر بولدى. ارينە 0:1 ەسەبى يسپانيالىقتاردى قاناعاتتاندىرمايدى. ولاردىڭ ماقساتى – مەيىلىنشە كوپ گول سوعۋ بولاتىن. بىراق قازاقستاندىق فۋتبولشىلار يسپانيا قۇراماسىنا ۇش ۇپايدى وڭاي بەرىپ قويمايتىنىن اڭعارتتى. ماتچتىڭ 56-مينۋتىندا باس تورەشى ءبىزدىڭ قاقپامىزعا تاعى دا پەنالتي بەلگىلەدى. ابىروي بولعاندا بۇل جولى قاقپاشى مۇحامەدجان سەيسەن تاماشا سەيۆ جاساپ, كارلەس الەنيا تەپكەن ون ءبىر مەترلىك ايىپ دوبىن قايتاردى. وسىدان كەيىن وتانداستارىمىزدىڭ بويىندا سەنىمدىلىك پايدا بولىپ, ەسەپتى تەڭەستىرۋدىڭ قامىنا كىرىستى. باس باپكەر الەكساندر موسكالەنكو دا جاسىل الاڭعا «استانا» كلۋبىنىڭ شابۋىلشىلارى رامازان كارىموۆ پەن ۆلاديسلاۆ پروكوپەنكولاردى شىعاردى. فۋتبولشىلارىمىز ەسەپتى تەڭەستىرۋگە قانشا تىرىسقانىمەن, يسپانيالىق قورعاۋشىلار گول سوعۋعا ەش مۇمكىندىك بەرمەدى. وسىلايشا, بيىلعى ەۋروپا چەمپيوندارى قازاقستان قۇراماسىن ستاندارتتان سوعىلعان جالعىز گولدىڭ ارقاسىندا جەڭىپ كەتتى.
ەندى جەرلەستەرىمىز 10 قىركۇيەك كۇنى يزرايل قۇراماسىن قابىلدايدى. ءۇش تۋردان كەيىن وتانداستارىمىز 6 ۇپايمەن ءوز توبىندا كوش باستاپ تۇر. بىزدەن ەكى ويىن كەم وتكىزگەن يسپانيا قۇراماسى 3 ۇپايمەن ەكىنشى ورىندا كەلەدى.
جاستار قۇراماسىنىڭ ءىزىن الا ەلىمىزدىڭ نەگىزگى قۇراماسى سىرت الاڭدا قازاقستان ءۇشىن الىنبايتىن قامال سانالعان كيپر قۇرماسىمەن كەزدەسىپ, 1:1 ەسەبىمەن تەڭ ءتۇستى. ەكى كوماندا بۇعان دەيىن ەكى رەت كەزدەسىپ, ەكەۋىندە دە كيپر فۋتبولشىلارى باسىم تۇسكەن بولاتىن. ەڭ العاش ەكى كوماندانىڭ جولى 2004 جىلعى حالىقارالىق تۋرنيردە ءتۇيىسىپ, كيپردە وتكەن باسەكەدە الاڭ يەلەرى 2:1 ەسەبىمەن جەڭىسكە جەتكەن بولاتىن. اراعا 13 جىل سالىپ ەكى قۇراما 2017 جىلى جولداستىق كەزدەسۋ وتكىزدى. بۇل ويىندا دا كيپر قۇراماسى 3:1 ناتيجەسىمەن باسىم تۇسكەن-ءدى. مىنە, 2019 جىلى ەۋروپا چەمپيوناتىنىڭ ىرىكتەۋ كەزەڭىندە ەكى قۇراما قايتا جولىعىپ, وتانداستارىمىز العاش رەت قارسىلاس كوماندامەن تەڭ وينادى.
ماتچقا دەيىن كوپشىلىك فۋتبول ماماندارى كيپر-قازاقستان ويىنىنا پىكىر ءبىلدىرىپ, قازاقستان قۇرماسى بۇل جولى دا جەڭىلەدى دەپ بولجاعان-دى. بىراق ويىن كوپشىلىك كۇتكەندەي ەمەس, مۇلدە باسقاشا دەڭگەيدە ءوربىدى. كەزدەسۋدىڭ نەبارى ەكىنشى مينۋتىندا قازاقستاندىقتار ويىنداعى العاشقى شابۋىلىن ۇيىمداستىرىپ, ماتچتاعى ەسەپتى ءبىرىنشى بولىپ اشۋعا مۇمكىندىك الدى. يسلامبەك قۋات باستاعان شابۋىلدى الەكسەي ششەتكين ناتيجەلى اياقتاپ, كومانداسىن ەسەپتە العا شىعاردى. باس باپكەر بيلەك نەگىزگى قۇرامدى جاريالاعاندا قازاقستاندىق جانكۇيەرلەر ششەتكيندى ءبىرىنشى مينۋتتان باستاپ الاڭعا شىعارۋ – باس باپكەردىڭ ەڭ ۇلكەن قاتەلىگى دەپ سىناعان-دى. سول جانكۇيەرلەر ماتچتان سوڭ الەكسەي ششەتكيننىڭ ويىنىنا جاقسى باعا بەرگەنىن نەسىنە جاسىرايىق. سونداي-اق ششەتكين بۇل ماتچتا ۇلتتىق قۇراما تاريحىندا ەڭ جىلدام گول سوققان فۋتبولشى اتاندى. بۇعان دەيىن جىلدام گولدى 2012 جىلى يۋري لوگۆينەنكو قىرعىزستان (5:2) قۇراماسىنىڭ قاقپاسىنا ءتورتىنشى مينۋتتا سالعان ەدى.
كۇتپەگەن جاعدايدا گول وتكىزىپ العان كيپر ويىنشىلارى بىرتە-بىرتە ويىن تىزگىنى قولدارىنا الىپ, دميتري نەپوگودوۆ قورعاعان قاقپانىڭ ماڭايىندا ءجيى قاۋىپتى شابۋىل ۇيىمداستىرۋمەن بولدى. دەگەنمەن قازاقستاندىق ويىنشىلار ءبىرىنشى تايمنىڭ سوڭىنا دەيىن باسىمدىقتى ساقتاپ قالا المادى. ويىننىڭ 39-مينۋتىندا پيوروس سوتيريۋ مەرگەندىگىمەن كوزگە ءتۇسىپ, ەسەپتى تەڭەستىرىپ كەتتى.
كەزدەسۋدىڭ ەكىنشى تايمىن الاڭ يەلەرى بەلسەندى باستادى. ويتكەنى ءتورت ويىندا نەبارى ءۇش-اق ۇپاي ولجالاعان كيپر قۇراماسىنا جەڭىس اۋاداي قاجەت ەدى. ال سىرت الاڭدا ۇپاي ولجالاۋ – وتانداستارىمىزدىڭ باستى ماقساتى بولاتىن. ەكى كوماندا دا ماتچ سوڭىنا دەيىن ماقساتىنا جەتۋ ءۇشىن بارىن سالىپ وينادى. كيپر قۇراماسى ۇنەمى شابۋىلداۋمەن بولسا, قازاقستاندىق فۋتبولشىلار قورعانىسقا كوبىرەك كوڭىل ءبولىپ, قارىمتا شابۋىلعا يەك ارتتى. 90 مينۋتتىڭ قورىتىندىسى بويىنشا كەزدەسۋ 1:1 ەسەبىمەن اياقتالىپ, ەكى قۇراما دا ءبىر-ءبىر ۇپاي يەلەندى. سىرت الاڭدا ءبىر ۇپاي ولجالاعان قازاقستان قۇراماسى 7 ۇپايمەن توپتاعى ءۇشىنشى ورىنىن ساقتاپ قالدى. ال كيپر فۋتبولشىلارى 4 ۇپايمەن بەسىنشى ورىندا كەلەدى.
قازاقستان قۇراماسى كەلەسى كەزدەسۋىن بۇگىن رەسەي قۇراماسىنا قارسى وتكىزەدى. ەستەرىڭىزدە بولسا, قوس قۇراما اراسىندا ەلوردادا وتكەن العاشقى ويىندا جەرلەستەرىمىز 0:4 ەسەبىمەن جەڭىلىپ قالعان بولاتىن. بۇگىن وتانداستارىمىز جىگەرلى ويىن كورسەتىپ, ەسە قايتارادى دەگەن ۇمىتتەمىز.
