قاسىم-جومارت توقاەۆ ءوز سوزىندە تۇرعىنداردى قۇتقارۋعا جانە ارىس قالاسىن قايتا قالپىنا كەلتىرۋگە اتسالىسقان بارلىق ازاماتقا ريزاشىلىق ءبىلدىردى. پرەزيدەنت 24 ماۋسىم حالقىمىزدىڭ تاعى ءبىر سىناقتان سۇرىنبەي وتكەن كۇنى رەتىندە تاريحتا قالعانىن ايتىپ, ارىس تۇرعىندارىنىڭ تىنىشتىعى بۇزىلعانىمەن, ەلدىڭ رۋحى تۇسپەگەنىن ايتتى.
– قايعىلى جاعداي ەشكىمدى بەيجاي قالدىرمادى. ارىس قالاسىن بۇكىل ەل بولىپ قالپىنا كەلتىردىك. بۇعان قازاقستاننىڭ ءار تۇرعىنى ۇلەس قوستى. پاتريوتيزم مەن شىنايى كومەكتىڭ وسىنداي جارقىن ۇلگىسىنىڭ نەگىزىندە جاستارىمىزدى تاربيەلەۋىمىز كەرەك, – دەدى مەملەكەت باسشىسى.
قاسىم-جومارت توقاەۆ قازىرگى ۋاقىتتا نىسانداردىڭ 97 پايىزىن قايتا قالپىنا كەلتىرۋ جۇمىستارى اياقتالعانىن, ەڭ الدىمەن, كوپ بالالى وتباسىلاردىڭ باسپانالارى قالپىنا كەلتىرىلگەنىن حابارلادى. ءبىلىم كۇنى قارساڭىندا ارىستاعى 16 مەكتەپكە 12 مىڭ وقۋشى قابىلداندى, ونىڭ 2 جارىم مىڭى العاش رەت مەكتەپ تابالدىرىعىن اتتاعان بۇلدىرشىندەر.
قازاقستان پرەزيدەنتى ارىس وقيعاسى حالقىمىزدىڭ قيىن-قىستاۋ كەزدەگى بەكەم بىرلىگى مەن ىنتىماعىن كورسەتكەنىن ايتتى.
– شىن مانىندە, بۇگىنگى جيىنعا قاتىسىپ وتىرعان ازاماتتار – ناعىز باتىرلار. ال وسى زالعا كەلە الماعانداردىڭ ءبارى وردەندەرمەن جانە مەدالدارمەن ماراپاتتالاتىن بولادى, – دەدى مەملەكەت باسشىسى.
سىن ساعاتتا سابىرلىق تانىتىپ, ەرەن ەرلىكتىڭ ۇلگىسىن كورسەتە بىلگەن ازاماتتاردى پرەزيدەنت ەرەكشە اتاپ ءوتتى.
– كولىك جۇرگىزۋشىسى اسقار ابدىحالىقوۆ «ليدەر» بالاباقشاسىنداعى 70 بالانى قاتەردەن قۇتقاردى. ال مەدبيكە كۇمىساي تۇمانوۆا اۋرۋحانادا ەمدەلىپ جاتقان بالالاردى قاۋىپسىز ايماققا جەتكىزدى. ولار سول ساتتە وزدەرىنىڭ ومىرىنە دە قاۋىپ كەلەرىن ويلاماستان تاۋەكەلگە باس تىكتى. مەن تۇرعىنداردى قاۋىپسىز جەرگە كوشىرگەن ازاماتتارعا زور ريزاشىلىعىمدى بىلدىرەمىن. زارداپ شەككەندەردى ەمدەپ, ولاردىڭ ءومىرى ءۇشىن كۇرەسكەن دارىگەرلەرگە العىس ايتامىن, – دەدى مەملەكەت باسشىسى.
بۇدان بولەك, پرەزيدەنت اعا سەرجانت نۇرجان باقتىبايدىڭ ەرلىگىن ەرەكشە اتاپ ءوتتى. ول ءورتتىڭ سالدارىن جويۋ كەزىندە باتىل ارەكەت ەتتى. سونىڭ ارقاسىندا ءبىراز ادام امان قالدى. باپكەر ءارى وقىتۋشى ەۆگەني حيسمەتوۆ قاراعاندى وبلىسىنان ءوز ەركىمەن ارىسقا اتتانعان. ول بىرنەشە ۋچاسكەدە جۇمىس ىستەدى. گۋمانيتارلىق كومەك تاراتىپ, قۇرىلىس جۇمىستارىن اتقاردى. ءسويتىپ جۇزدەگەن ەرىكتىمەن بىرگە قالانى قالپىنا كەلتىرۋگە ءوز ۇلەسىن قوستى.
جارىلىستا ەڭبەك ەتكەن اسكەري قىزمەتكەرلەر, ەرىكتىلەر, بالاباقشا قىزمەتكەرلەرى ءىى جانە ءىىى دارەجەلى «ايبىن» وردەنىمەن, «قۇرمەت» وردەنىمەن, «ەرلىگى ءۇشىن» جانە «جاۋىنگەرلىك ەرلىگى ءۇشىن» مەدالدارىمەن, مەديتسينا قىزمەتكەرلەرى «شاپاعات» مەدالىمەن ماراپاتتالدى.
