ناقتى مىندەتتەر جۇكتەيدى

وتىرىستا قازاقستان حالقى اسسامبلەياسى توراعاسىنىڭ ورىنباسارى جانسەيىت تۇيمەباەۆ پرەزيدەنت قاسىم-جومارت توقاەۆتىڭ پارلامەنتتىڭ بىرلەسكەن وتىرىسىندا جاريالاعان «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» تاقىرىبىنداعى جولداۋى تۋرالى باياندادى.

ء«بىزدىڭ جيىنىمىز وسى جولداۋدى تالقىلاۋعا جانە وندا العا قويىلعان مىندەتتەردى ىسكە اسىرۋعا اسسامبلەيانىڭ قاتىسۋى ماسەلەسىنە ارنالىپ وتىر»، – دەگەن ج.تۇيمەباەۆ جولداۋدا كورسەتىلگەن بىرقاتار ماڭىزدى باعىتتارعا باسا ءمان بەرۋ كەرەك ەكەندىگىن اتاپ ءوتتى. ولار: زاماناۋي ءتيىمدى مەملەكەت قۇرۋ، ازاماتتاردىڭ قۇ­قىقتارى مەن قاۋىپسىزدىگىن قامتاماسىز ەتۋ، سەرپىندى جانە ينكليۋزيۆتى ەكونوميكانى قالىپتاستىرۋ، الەۋ­مەتتىك جاڭعىرتۋدى جۇزەگە اسىرۋ، قۋاتتى وڭىرلەردى قالىپ­تاستىرۋ. وسى باعىتتاردىڭ بارلىعى بويىنشا ناقتى مىندەتتەر ايقىندالدى.

قحا توراعاسى ورىنباسارىنىڭ ايتۋىنشا، پرەزيدەنت قاسىم-جومارت توقاەۆتىڭ جولداۋى قازاقستاننىڭ ءوز دامۋىندا جاڭا كەزەڭگە بەت الۋىن سيپاتتايدى دەپ ايتۋعا تولىق نەگىز بار.

قازاقستان رەسپۋبليكاسىنىڭ تاۋەلسىز تاريحىندا مەملەكەت باسشىسىنىڭ حالىققا جولداۋ جاساۋى – جاقسى داستۇرگە اينالعان. بۇل – مەملەكەت دامۋىنىڭ كەلەشەگىن بول­جاي وتىرىپ تۇجىرىمدالاتىن، ەل ىشىندە تاپ سول كەز­دە بار پروبلەمالار ءتۇيىنىن شەشۋدى كوزدەيتىن، دامۋ باعى­تىمىزدى ايقىندايتىن ستراتەگيالىق قۇجات ەكەنى بەلگىلى.

وتىرىسقا قاتىسۋشىلار دا، تىلشىلەرگە بەرگەن سۇحبات­تارىندا قحا ەتنومادەني بىرلەستىكتەرىنىڭ وكىلدەرى دە «قازاقستان پرەزيدەنتى ق.توقاەۆتىڭ جولداۋى ەل ومى­رىندەگى شەشىلۋىن كۇتىپ تۇرعان كوپ ماسەلەلەردى ءدوپ باسقان ماڭىزدى قۇجات بولعانىن» ءسوز ەتتى.

سونداي-اق قحا عىلىمي-ساراپشىلىق كەڭەسىنىڭ وتىرىسىندا ازاماتتاردىڭ وتىنىشتەرىن مەملەكەتتىك ورگانداردىڭ قاراۋ ساپاسى، ەلدە بەيبىت ميتينگىلەردى ەركىن وتكىزۋ، پايدالانىلماي جاتقان اۋىل شارۋاشىلىعى جەرلەرىن قايتارىپ الۋ، مەملەكەتتىك حولدينگتەر مەن ۇلتتىق كومپانيالاردىڭ تيىمدىلىگىنە تالداۋ جۇرگىزۋ سياقتى جولداۋدا ايتىلعان بىرقاتار وزەكتى ماسەلەلەر تالقىعا سالىندى.

قورىتا كەلگەندە، پارلامەنت دەپۋتاتتارى، مينيستر­لىكتەر مەن ەتنومادەني بىرلەستىكتەرىنىڭ وكىلدەرى، قحا مەن عىلىمي-ساراپشىلىق كەڭەس مۇشەلەرى جانە اسسام­بلەيانىڭ جاستار قاناتى قاتىسقان بۇل جيىندا قاسىم-جومارت توقاەۆتىڭ قازاقستان حالقىنا ارناعان جولداۋى قحا تاراپىنان ءبىراۋىزدان قولداۋ تاپتى.

ايتا كەتەيىك، قحا عىلىمي-ساراپشىلىق كەڭەسىنىڭ ماقساتى – ساياسي جاعدايلارعا بولجام جاساي وتىرا، قو­عامدى الاۋىزدىقتان ساقتاۋ. ياعني، حالىق ساناسىنا دەمو­كراتيالىق قۇندىلىقتاردىڭ ءدانىن ەگۋ، جاستاردى وتانسۇيگىشتىككە تاربيەلەپ، ەتنوسارالىق قاتىناستى نىعايتۋ.