التى جىلدا كونكۋرسقا 15 197 وتباسى قاتىسقان. ولاردىڭ 62%-ى اۋىلدىق جەرلەردەگى وتباسىلار بولسا, 36%-ى كوپ بالالى وتباسىلار بولعان. ال جاس وتاۋلار 18%-ىن, اتادان بالاعا ءبىر ماماندىقتى جالعاستىرعان ەڭبەككەرلەردىڭ شاڭىراعى 17%-دى قۇراعان. اقپارات جانە قوعامدىق دامۋ مينيسترلىگىنىڭ قولداۋىمەن, مادەنيەت جانە سپورت مينيسترلىگى, جەرگىلىكتى اتقارۋشى ورگانداردىڭ ۇيىمداستىرۋىمەن وتەتىن كونكۋرس بىرنەشە كەزەڭنەن تۇرادى. «مەرەيلى وتباسى» ۇلتتىق كونكۋرسىنىڭ لاۋرەاتىن انىقتاۋ جىل سايىن قىركۇيەكتىڭ ەكىنشى جەكسەنبىسى اتاپ وتىلەتىن وتباسى كۇنىنە ورايلاستىرىلادى. بيىل دا وڭىرلىك كونكۋرستاردان قارا ءۇزىپ كەلگەن 17 جەڭىمپاز ەرتەڭ نۇر-سۇلتان قالاسىندا سالتاناتتى ماراپاتتاۋ راسىمىنە قاتىسادى.
ءباسپاسوز ءماسليحاتىندا ءسوز العان پارلامەنت سەناتىنىڭ دەپۋتاتى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمىنىڭ ورىنباسارى ءلاززات سۇلەيمەن وتباسى قۇندىلىعىن ارتتىرۋدا ۇلتتىق كوميسسيا تاراپىنان اتقارىلىپ جاتقان جۇمىستاردىڭ ءبىر پاراسىنا توقتالدى. «مەملەكەت باسشىسى قاسىم-جومارت توقاەۆتىڭ 2 قىركۇيەكتە حالىققا جولداعان «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا مەملەكەت تاراپىنان وتباسى ينستيتۋتىن قولداۋ, انا مەن بالاعا باسا كوڭىل ءبولۋ تۋرالى ايتىلدى. ەل پرەزيدەنتى كوپ بالالى جانە از قامتىلعان وتباسىلاردى الەۋمەتتىك قولداۋدىڭ كەشەندى شارالارىن ۇسىندى جانە وتباسىلىق بيزنەس اشۋ, ونى قارجىلاندىرۋ ماسەلەسى بويىنشا ۇكىمەتكە ناقتى تاپسىرمالار بەردى. ۇلتتىق كوميسسيا وتباسى ينستيتۋتىن نىعايتۋعا باعىتتالعان جۇمىستاردىڭ وڭىرلەردە دە جۇيەلى تۇردە جۇرگىزۋىنە ىقپال ەتىپ وتىرادى. سونداي-اق بالا تاربيەسىندەگى اتا-انا جاۋاپكەرشىلىگىن بىردەي ارتتىرۋ, سونىڭ ىشىندە قوعامدا اكە ابىرويىن نىعايتۋ, ۇلگىلى اكەلەردى ناسيحاتتاۋ ماسەلەسىن دە قازىر العا قويىپ وتىر. وسى تۇرعىدا بالا تاربيەسىندە اكەنىڭ بەدەلىن, حالقىمىزدىڭ ءداستۇرلى تاربيەسىندەگى اكەنىڭ باستى ورنىن اسا بەلسەندى اكەلەردىڭ كۇشىمەن قۇرىلعان رەسپۋبليكالىق اكەلەر وداعى قوعامدىق بىرلەستىگىمەن بىرلەسىپ اتقارىپ وتىر. بۇل قوعامنىڭ بولىمشەلەرى وڭىرلەردە دە قۇرىلىپ جاتىر. قازاق حالقى «وتان – قۋات, وتباسى – شۋاق» دەپ ەكى ۇعىمدى شەندەستىرە سۋرەتتەيدى. كوپتەگەن قوعامدىق ۇيىمدارمەن بىرلەسىپ جۇمىس ىستەپ وتىرمىز. ولاردىڭ قاناتىن كەڭگە جايۋىنا ىقپال ەتۋىمىز كەرەك. سوندا عانا قوعامدا ورىن الىپ جاتقان كوپتەگەن كەلەڭسىزدىكتەردىڭ الدىن الۋعا مۇمكىندىكتەر بولادى», دەدى ول.
