ءىس-شاراعا قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى, قازاقستان رەسپۋبليكاسى قارجى مينيسترلىگى مەملەكەتتىك كىرىستەر كوميتەتىنىڭ, نۇر-سۇلتان اكىمدىگىنىڭ جانە ەلوردا كاسىپورىندارىنىڭ باسشىلارى قاتىستى.
ءوز ءسوزىنىڭ باسىندا ءبىرجان نۇرىمبەتوۆ كەزدەسۋگە قاتىسۋشىلاردى قازاقستان كاسىپورىندارىنداعى ەڭبەك قاتىناستارىنىڭ جاي-كۇيى تۋرالى حاباردار ەتتى.
«ەڭبەك زاڭناماسىن ساقتاۋ - كەز-كەلگەن كاسىپورىننىڭ تۇراقتىلىعى مەن تابىستىلىعىنىڭ كەپىلى. وكىنىشكە وراي, بۇگىندە رەسپۋبليكادا 125 كاسىپورىندا 1,6 ملرد تەڭگە جالاقى بويىنشا بەرەشەك بار, 3 ەڭبەك جانجالى ورىن العان, مىندەتتى زەينەتاقى جارنالارى مەن الەۋمەتتىك اۋدارىمدار بويىنشا بەرەشەك سوماسى 5 ملرد تەڭگەنى قۇرايدى, 2,4 مىڭ قىزمەتكەر قىسقارتىلدى, وندىرىستە 749 ادام جاراقات الىپ, ولاردىڭ ىشىندە 82 ادام قايتىس بولدى », – دەدى مينيستر.
مينيستر 2016 جىلى جاڭا ەڭبەك كودەكسىنىڭ قابىلدانۋىمەن مەملەكەت ەڭ تومەن ەڭبەك ستاندارتتارىن, قىزمەتكەرلەرگە تولەنەتىن نەگىزگى كەپىلدىكتەر مەن وتەماقىلار بەلگىلەگەنىن ەسكە سالدى, بۇل رەتتە جۇمىس بەرۋشىلەر تاراپىنان ولاردىڭ ورىندالۋىنا باقىلاۋ قامتاماسىز ەتىلەدى.
«وسى جىلدىڭ 7 ايىندا مەملەكەتتىك ەڭبەك ينسپەكتورلارى 5,5 مىڭ كاسىپورىندا تەكسەرۋ جۇرگىزدى, ونىڭ بارىسىندا 7,9 مىڭ ەڭبەك زاڭناماسى بويىنشا بۇزۋشىلىق انىقتالدى. تەكسەرۋ ناتيجەلەرى بويىنشا زاڭ بۇزۋشىلىقتارعا جول بەرگەن كاسىپورىنداردىڭ باسشىلارىنا 3,2 مىڭ نۇسقاما بەرىلدى, سونىمەن قاتار 217 ميلليون تەڭگەگە 1,6 مىڭ ايىپپۇل سالىندى. ەڭبەك ينسپەكتسياسىنىڭ تالابى بويىنشا جۇمىس بەرۋشىلەر ەڭبەك قاۋىپسىزدىگى جانە ونى قورعاۋ ەرەجەلەرىن بۇزعانى ءۇشىن جاۋاپقا تارتىلعان 11 ادامدى جۇمىستان بوساتتى. 11 جابدىقتى پايدالانۋعا جانە 8 ۇيىمنىڭ قىزمەتىنە تىيىم سالىنادى. 523 ءىس قۇقىق قورعاۋ ورگاندارىنا جولداندى, ولار بويىنشا 79 قىلمىستىق ءىس قوزعالدى », - دەپ تولىقتىردى ب. نۇرىمبەتوۆ.
ەڭبەك جانە حالىقتى الەۋمەتتىك قورعاۋ ءمينيسترى اتاپ وتكەندەي, ەلوردادا 71 مىڭ بەلسەندى كاسىپورىن جۇمىس ىستەيدى, بۇل رەسپۋبليكادا 471 مىڭنان استام ادام جۇمىس ىستەيتىن ۇيىمداردىڭ جالپى سانىنىڭ 16% قۇرايدى. بۇل رەتتە, نۇر-سۇلتان قالاسىنداعى مەملەكەتتىك ينسپەكتورلاردىڭ سانى 11 ادامدى قۇرايدى (رەسپۋبليكادا 260), ياعني ءاربىر ينسپەكتورعا 6 مىڭ كاسىپورىننان كەلەدى.
«ەگەر بۇل كاسىپورىنداردا ەڭبەك تاۋەكەلى انىقتالعان جاعدايدا, ەڭبەك ينسپەكتورلارىنىڭ ولاردى تولىق تەكسەرۋگە وكىلەتتىگى جوق. سوندىقتان اكىمدىك ەڭ الدىمەن, مەملەكەتتىك ەڭبەك ينسپەكتورلارىنىڭ سانىن, بىلىكتىلىگى مەن ماتەريالدىق-تەحنيكالىق جاراقتاندىرىلۋىن ۇلعايتا وتىرىپ, مەملەكەتتىك باقىلاۋدى كۇشەيتۋى قاجەت», – دەدى مينيستر.
