فورۋمعا پارلامەنت ءماجىلىسىنىڭ دەپۋتاتى مايرا ايسينا, ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اقمادي سارباسوۆ, ۇلتتىق ەكونوميكا ۆيتسە-ءمينيسترى ايگۇل شايىموۆا, «جاسىل» ەكونوميكا جانە Global دامىتۋ كواليتسياسى» زاڭدى تۇلعالار بىرلەستىگىنىڭ باسقارما ءتورايىمى سالتانات راقىمبەكوۆا جانە اقمولا وبلىسى اكىمىنىڭ ورىنباسارى اينا ءمىسىرالىموۆا قاتىستى. وسىنداي شارا وبلىستا ەكىنشى رەت وتكىزىلىپ وتىر. ونى «Coca-cola» حالىقارالىق قورى مەن پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن اقمولا وبلىسىنىڭ اكىمدىگى, G-Global حالىقارالىق حاتشىلىعى, «جاسىل» ەكونوميكا جانە Global-دى دامىتۋ كواليتسياسى» جانە «قازاقستان ايەلدەرىنىڭ اگرارلىق وداعى» بىرلەستىكتەرى ۇيىمداستىردى.
ءماجىلىس دەپۋتاتى مايرا ايسينا بۇگىندە ەل تۇرعىندارىنىڭ 52, نۇروتاندىقتاردىڭ 56 پايىزىن نازىك جاندىلار قۇرايتىنى جايلى دەرەكتەردى كەلتىردى. ايەلدەر قاي سالادا ەڭبەك ەتسە دە, بەلسەندىلىك تانىتۋدا. Nur Otan پارتياسىنىڭ سايلاۋالدى باعدارلاماسى ء«ار حالىقتىڭ ومىرىندە ءوزىنىڭ ناعىز ۇلتتىق بولمىسىن, ۇلتتىق نامىسىن كورسەتەتىن كەزەڭ كەلەدى» دەگەن ماعىنالى سوزدەرمەن باستالادى. مەنىڭ ويىمشا ءبىز, ايەلدەر قاۋىمى وسى سوزدەرگە ءمان بەرۋىمىز كەرەك. بۇگىندە ەكونوميكا سالاسىندا ايەلدەردىڭ ءرولى ايرىقشا. حالىقارالىق ۆاليۋتا قورى ساراپشىلارىنىڭ تۇجىرىمى بويىنشا سۇلۋلىق الەمدى عانا ەمەس, جاھاندىق ەكونوميكانى دا قۇتقارا الادى. مۇنىمەن كەلىسپەۋ مۇمكىن ەمەس. قازىرگى تاڭدا ەلىمىزدەگى ەڭبەككە قابىلەتتى 9 ميلليون ادامنىڭ شامامەن 40 پايىزىن ايەلدەر قاۋىمى قۇرايدى. ىشكى جالپى ءونىمنىڭ ءاربىر ءۇشىنشى بولىگىن سولار شىعارادى. سول سەبەپتى ايەلدەردىڭ الەۋەتىن مەيلىنشە كوبىرەك قولدانا ءبىلۋىمىز كەرەك. «Coca-cola» حالىقارالىق قورى 2020 جىلعا دەيىن الەم بويىنشا 5 ملن-عا جۋىق جۇمىسسىز ايەلدى وقىتۋدى قولعا الدى. سولارمەن بىرلەسىپ, جەتى جىلدان بەرى اۋىلدىق جەرلەردە تۇراتىن 11 مىڭعا جۋىق جۇمىسسىز ايەلدى كاسىپكەرلىك نەگىزدەرىنە وقىتتىق. ءبىرازىنا ءوز كاسىبىن اشۋعا قايتارىمسىز گرانت ءبولىندى, – دەي كەلە, مايرا اراپقىزى «اۋىل – ەل بەسىگى» جوباسىنا توقتالدى.
فورۋمدا اۋىلدارعا «جاسىل» تەحنولوگيالاردى بىرەۋ اكەلىپ ەنگىزەدى دەپ كۇتىپ وتىرماي, تۇرعىندار ءوز كۇشتەرىن, قابىلەتتەرىن پايدالانىپ, ۇيدە, مەكتەپتەردە قولدانۋعا بولاتىنى كەڭىنەن ءسوز بولدى. اسىرەسە ارشالى اۋدانىنا قاراستى ارناساي اۋلىندا اشىلعان «جاسىل» تەحنولوگيالاردىڭ ۇلتتىق اكادەمياسى» ورتالىعى جايلى كوپتەگەن وڭ مىسال كەلتىرىلدى.
– ەلباسىمىز نۇرسۇلتان نازارباەۆ 2018 جىلى قازاقستان حالقىنا ارناعان جولداۋىندا «اۋىل – ەل بەسىگى» جوباسىن ىسكە اسىرۋدى تاپسىرعان بولاتىن. «اۋىلىم – التىن بەسىك» دەپ بىلەتىن تۇرعىندار ءۇشىن بۇل جوبانىڭ ورنى ەرەكشە. وسىعان سايكەس وبلىسىمىزدا ناقتى ىستەر قولعا الىندى. بۇگىندە ارشالى, استراحان, زەرەندى اۋداندارىندا باعدارلاما اياسىندا كەشەندى جۇمىستار باستالدى, – دەدى وبلىس اكىمىنىڭ ورىنباسارى اينا ءمىسىرالىموۆا.
وڭىردە مەملەكەتتىك باسقارۋ ورگاندارىندا ەڭبەك ەتەتىن ايەلدەردىڭ ۇلەسى ارتىپ كەلەدى. بارلىق دەڭگەيدەگى ماسليحاتتارداعى 276 دەپۋتاتتىڭ 70-ءىن نازىك جاندىلار قۇرايدى. 532 جەرگىلىكتى اتقارۋشى ورگاننىڭ 147-ىسىندە ايەلدەر باسشىلىق قىزمەتتەردە. 56 ايەل اۋىلدىق وكرۋگتەردىڭ اكىمدەرى بولىپ قىزمەت ەتۋدە. شارۋا قوجالىقتارىن باسقارىپ وتىرعان ايەلدەر دە بار. شامامەن 400 ايەل «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» باعدارلاماسى ارقىلى ءوز كاسىپتەرىن دوڭگەلەتىپ وتىر. بيىل 662 ايەل كاسىپكەرلىك نەگىزدەرىنە وقىتىلعان.
فورۋمعا ارنايى كەلگەن باسقا دا مەيماندار ءوز ويلارىن ورتاعا سالىپ, «اۋىلدىق ايماقتاردىڭ الەۋمەتتىك-ەكونوميكالىق دامۋى», «جەرگىلىكتى ءوزىن-ءوزى باسقارۋدى دامىتۋ, بيۋدجەتتىڭ ءتورتىنشى دەڭگەيى» تاقىرىپتارىن پلەنارلىق وتىرىستاردا كەڭىنەن تالقىلادى. اۋدانداردان كەلگەن قاتىسۋشىلار مينيسترلىك وكىلدەرىنە تولعاندىرعان ساۋالدارىن قويىپ, ۇسىنىستارىن جەتكىزدى.
اقمولا وبلىسى
