جاڭا دەپۋتاتتار انت بەردى
القالى جيىنعا ءماجىلىس توراعاسى نۇرلان نىعماتۋلين توراعالىق ەتتى. ول الدىمەن كۇن تارتىبىندەگى تاقىرىپتارعا توقتالماس بۇرىن, پارلامەنتتىڭ كەزەكتى سەسسياسىنىڭ اشىلۋىندا العاش رەت پرەزيدەنت قاسىم-جومارت توقاەۆتىڭ جولداۋىن جاريالاعانىنا نازار اۋداردى.
– مەملەكەت باسشىسى قاسىم-جومارت توقاەۆ ءوز جولداۋىندا ەلباسىمىز نۇرسۇلتان نازارباەۆتىڭ ساياساتىن جالعاستىرا وتىرىپ, قازاقستانىمىزدى ودان ءارى دامىتۋدىڭ نەگىزگى ماقساتتارىن بەلگىلەپ بەردى. ولاردىڭ بارلىعىن زاڭ جاعىنان قولداۋ ءۇشىن دەپۋتاتتىق كورپۋستىڭ الدىندا دا جاۋاپتى مىندەتتەر تۇر. سول ءۇشىن سەسسيا بارىسىندا ءبىز ءوز ۋاقىتىندا حالىققا قاجەتتى, ساپالى زاڭدار قابىلدايتىن بولامىز. سوندىقتان وسى جاۋاپتى مىندەتتى ابىرويمەن اتقارۋ ءۇشىن بۇگىننەن باستاپ بەلسەنە ىسكە كىرىسۋ قاجەت, – دەدى نۇرلان نىعماتۋلين.
ءماجىلىس توراعاسى ەكونوميكانى جاڭعىرتۋعا, الەۋمەتتىك احۋالدى كۇشەيتۋگە, بيۋدجەت جانە سالىق جۇيەسىن جەتىلدىرۋگە, ازاماتتاردىڭ قۇقىقتارى مەن بوستاندىقتارىن قورعاۋعا, شاعىن جانە ورتا بيزنەستى قولداۋعا, ەكولوگيالىق جانە باسقا دا ماسەلەلەرگە ەرەكشە كوڭىل بولىنەتىنىن اتاپ ءوتتى.
نۇرلان نىعماتۋلين دەپۋتاتتارعا پرەزيدەنتتىڭ جانە ۇكىمەتتىڭ پارلامەنتتەگى وكىلدەرىن تانىستىرىپ, مەملەكەتتىك ورگاندار اراسىنداعى بىرلەسكەن جۇمىستاردى نىعايتۋعا ىقپال ەتەتىنىنە سەنىم ءبىلدىردى. پرەزيدەنتتىڭ وكىلى بولىپ جاڭادان بەيبىت وكسىكباەۆ, ال ۇكىمەتتىڭ وكىلى بولىپ ەرمەك امانشاەۆ تاعايىندالدى.
سونىمەن قاتار وتىرىستا ءماجىلىستىڭ جاڭا دەپۋتاتتارى گۇلشارا ابدىقالىقوۆا, نۇرجان اشىمبەتوۆ جانە جۇلدىز وماربەكوۆا انت بەردى. ولار ىسكە كىرىسەر الدىندا «قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ تۇتاستىعى مەن تاۋەلسىزدىگىن نىعايتۋعا, ونىڭ كونستيتۋتسياسى مەن زاڭدارىنا قاتاڭ باعىنۋعا, دەپۋتاتتىڭ وزىمە جۇكتەلگەن مارتەبەلى مىندەتىن ادال اتقارۋعا انت ەتەمىن» دەدى.
ءماجىلىس توراعاسى نۇرلان نىعماتۋلين پارلامەنت كوميتەتتەرى مەن كوميسسيالارى تۋرالى زاڭنىڭ 8-بابىنا سايكەس ءماجىلىستىڭ الەۋمەتتىك-مادەني دامۋ كوميتەتىنىڭ توراعاسى قىزمەتىنە گۇلشارا ابدىقالىقوۆانىڭ كانديداتۋراسىن ۇسىندى. بۇل ۇسىنىستى 104 دەپۋتات تۇگەل ماقۇلدادى.
سونداي-اق جاڭا دەپۋتاتتار نۇرجان اشىمبەتوۆ اگرارلىق ماسەلەلەر كوميتەتىنىڭ, جۇلدىز وماربەكوۆا زاڭناما جانە سوت-قۇقىقتىق رەفورما كوميتەتىنىڭ قۇرامىنا سايلانىپ, ءتيىستى قاۋلىلار قابىلداندى.
بۇعان قوسا جالپى وتىرىستا ءماجىلىس دەپۋتاتتارى باقتيار ماكەن مەن گۇلنار يكسانوۆانىڭ وكىلەتتىكتەرى مەرزىمىنەن بۇرىن توقتاتىلدى.
زاڭ جوبالارىن ازىرلەۋ جايى تالقىلاندى
ءماجىلىس وتىرىسىنىڭ كۇن تارتىبىندە بىرقاتار زاڭ جوباسى جونىندە قورىتىندى ازىرلەۋ تۋرالى ماسەلەلەر قارالدى. الدىمەن قارجى جانە بيۋدجەت كوميتەتىنىڭ توراعاسى گۇلجان قاراقۇسوۆا دەپۋتاتتار نازارىنا زاڭ جوبالارىنا وزگەرىستەر مەن تولىقتىرۋلار ەنگىزۋدى ۇسىندى. ونىڭ ءبىرىنشىسى «استانا» حالىقارالىق قارجى ورتالىعىنا قاتىستى بولدى. ودان كەيىن ۇلتتىق قوردان 2020-2022 جىلدارعا ارنالعان كەپىلدەندىرىلگەن ترانسفەرت تۋرالى ۇسىنىسىن جەتكىزدى.
– اتالعان زاڭ جوباسىندا ۇلتتىق قوردان 2020-2022 جىلدارعا ارنالعان رەسپۋبليكالىق بيۋدجەتكە بەرىلەتىن كەپىلدەندىرىلگەن ترانسفەرت مولشەرلەرىن بەكىتۋ كوزدەلەدى. مۇنىڭ كولەمى 2020-2021 جىلدارى 2,7 ترلن تەڭگە مولشەرىندە انىقتالادى. 2022 جىلى 2,6 ترلن تەڭگەگە دەيىن تومەندەتىلەدى. قارجى جانە بيۋدجەت كوميتەتى بۇل زاڭ جوباسى بويىنشا 2019 جىلى 6 قاراشاعا دەيىن قورىتىندى ازىرلەۋگە دايىن, – دەدى گۇلجان قاراقۇسوۆا.
سونىمەن بىرگە 2020-2022 جىلدارعا ارنالعان رەسپۋبليكالىق بيۋدجەت تۋرالى زاڭ جوباسى ازىرلەنەدى. سونداي-اق كەيبىر زاڭنامالىق اكتىلەرگە قىلمىستىق جولمەن الىنعان كىرىستەردى زاڭداستىرۋعا جانە تەرروريزمدى قارجىلاندىرۋعا قارسى ءىس-قيمىل بويىنشا جوبا قارالدى.
– «پەداگوگ مارتەبەسى تۋرالى» زاڭ جوباسى تۇڭعىش پرەزيدەنتتىڭ 2018 جىلدىڭ 5 قازانىنداعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىنا سايكەس ازىرلەندى. زاڭ جوباسى ءبىلىم بەرۋدىڭ بارلىق دەڭگەيدەگى ۇيىمدارى سالاسىندا تۋىندايتىن قارىم-قاتىناستاردى رەتتەۋدى قامتاماسىز ەتەتىن قۇقىقتىق تەتىكتى جەتىلدىرۋگە, پەداگوگ قىزمەتىنىڭ وزەكتى الەۋمەتتىك جانە كاسىبي ماسەلەلەرىن ءتيىمدى شەشۋگە باعىتتالعان. سونداي-اق پەداگوگتاردىڭ ەڭبەگىن ىنتالاندىرۋ, ونىڭ ىشىندە قوسىمشا اقىلاردى ارتتىرۋ, وزدەرىنە ءتان ەمەس فۋنكتسيالاردان بوساتۋ شارالارى كوزدەلگەن. كوميتەت وسى زاڭ بويىنشا جۇمىس ىستەۋگە جانە 25 جەلتوقسانعا دەيىن قورىتىندى شىعارۋعا دايىن, – دەدى الەۋمەتتىك-مادەني دامۋ كوميتەتىنىڭ حاتشىسى بەيبىت مامراەۆ.
سونىمەن قاتار جالپى وتىرىستا بىرقاتار حالىقارالىق كەلىسىمشارتتى راتيفيكاتسيالاۋ تۋرالى زاڭ جوبالارىن دايىنداۋ قاراستىرىلدى. سولاردىڭ قاتارىندا قازاقستان ۇكىمەتى مەن ارمەنيا ۇكىمەتى اراسىنداعى ازاماتتىق قورعانىس, توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدى قابىلداۋ ماسەلەسى تالقىعا سالىندى. بۇل زاڭ جوباسىن ىشكى ىستەر ءمينيسترى ەرلان تۇرعىمباەۆ تانىستىردى.
– كەلىسىمدى راتيفيكاتسيالاۋ ەڭ الدىمەن توتەنشە جاعدايدى بولجاۋ سالاسىندا تاجىريبە الماسۋعا, قاۋىپ تونگەن جانە تۋىنداعان جاعدايدا حالىقتى دايىنداۋعا سەپتىگىن تيگىزەدى. ەكىنشىدەن, تاراپتاردىڭ وقۋ ورىندارىندا ازاماتتىق قورعاۋ سالاسىندا مامانداردى وقىتۋعا, ۇشىنشىدەن, تاراپتار اۋماعىندا بولعان توتەنشە جاعدايلاردى جويۋدا كومەك كورسەتۋگە مۇمكىندىك بەرەدى. قر زاڭناماسى شەڭبەرىندە كەلىسىمدە كومەك كورسەتۋ مەن جەدەل ارەكەت ەتۋ, قۇتقارۋ بولىمشەلەرىنىڭ شەكارانى جەڭىلدەتىپ كەسىپ ءوتۋ جانە تاراپتار اۋماعىندا بولۋ شارتتارى بار. توتەنشە جاعدايدى جويۋدا قۇتقارۋ قۇرالدارىن الىپ كىرۋ ماسەلەسى رەتتەلگەن. بۇعان دەيىن مۇنداي كەلىسىم رەسەي, بەلارۋس, قىرعىزستان, ازەربايجان, تاجىكستان, ۋكراينا, گرۋزيا مەملەكەتتەرىمەن جاسالعان. بارلىعى 17 ەكىجاقتى, 13 كوپجاقتى كەلىسىم بار, – دەدى مينيستر.
سونداي-اق ەرلان تۇرعىمباەۆ اتالعان كەلىسىم شەڭبەرىندە ارميان تاراپىمەن سەيسميكالىق قاۋىپسىزدىكتى, ونىڭ ىشىندە جەدەل حابارلاۋ مەن حالىقتى ەۆاكۋاتسيالاۋدى ارتتىرۋ جونىندە تاجىريبە الماسۋ قاراستىرىلعانىن, زاڭ جوباسىنىڭ كەرى اسەرى جوقتىعىن جانە قوسىمشا قارجىلاي شىعىندى تالاپ ەتپەيتىنىن ايتتى.
بۇل زاڭ جوباسى تۋرالى ۇسىنىستى تىڭداعان 104 دەپۋتات قولداۋ ءبىلدىرىپ, قاۋلى قابىلدادى.
