«رۋحاني جاڭعىرۋ» باعدارلاماسى اياسىندا بيىل 7 قىركۇيەكتە اتاقتى ساركە باتىردىڭ ارۋاعىنا ارناپ قۇران باعىشتالىپ, ءىس-شارا وتكىزىلگەلى وتىر. شاراعا قاتىسۋشىلار ساركە باتىرعا ارنالعان كورمەنى تاماشالاپ, تەاترلاندىرىلعان قويىلىمعا كۋا بولادى. سونداي-اق ساركە باتىرعا ارنالعان ەڭسەلى ەسكەرتكىشتىڭ اشىلۋىنا قاتىسادى. باتىرعا ارنالعان قازاق كۇرەسىنەن تۋرنير مەن ايتىس تا شارانىڭ ابىرويىن اسقاقتاتا تۇسپەكشى.
ساركە باتىر
ۋا, قىزىل ءتىل, كەم سويلەمە, اسىرما,
ساركە بابا – جاعالبايلى ساڭلاعى!
ويران سالعان ون سەگىزىنشى عاسىردا,
كىشى ءجۇزدىڭ قول باستاعان ساردارى!
جوڭعارلاردىڭ دارىماعان سان ۋى,
كەۋدەسىندە ساقتاعان-اۋ كەك كىلتىن.
جۇرەگىنە جانىپ العان قارۋى,
الماس قىلىش – جانارىنداي وتكىر-ءتىن.
ابىلقايىر قول باستاسا قاسقايىپ,
بوكەنبايمەن ۇزەڭگىلەس تۇرىپتى.
جانارىنان كورگەن ەمەس جاس تايىپ,
ساركە باتىر – بابا بيىك رۋحتى!
اڭىراقاي – جوڭعار قىرعان شايقاستا,
ساركە, ەسەت, بوكەنبايداي ەر جۇرەك,
جەڭدى رۋحى, باسىم بولىپ ايقاستا,
«كۇش – بىرلىكتە» – جەڭىس تۋى جەلبىرەپ!
باۋىر ءسوزى شىن باتىردى ەستى ەتپەك,
ساركە دوس قىپ «قايىر» دەگەن ۇعىمدى.
قالماق قۋعان ەلۋ مىڭداي ەستەك كەپ,
شاپانىنىڭ شالعايىنا تىعىلدى.
ەستەكتەردىڭ كەيبىرەۋىن توقتاتىپ,
سۇلۋ جەردە ساركە باتىر تۇردى ءىرى!
العاش تۇسكەن ەستەكتەردىڭ قونىسى,
قوس ەستەك دەپ اتالادى بۇل كۇنى.
جاعالبايلى باتىر تۋدى, اسىل باق,
ساركە باتىر – قايقى قىلىش يەسى.
ۇرپاقتاردىڭ قونا بەرسىن عاسىرلاپ,
بويلارىنا باتىرلىقتىڭ كيەسى!
ەلدىڭ ەرىن تاريح استە ۇمىتپاس,
ۇلتتىڭ ءتىلى, ءدىلى بولعان ۇرانى.
الاشپەنەن جان-تاعىلىمى رۋحتاس,
ساركە باتىر – جادىمىزدا تۇرادى!
سەرىك كاكىمعالي ۇلى سارين
