القالى جيىنعا پرەزيدەنت كومەكشىسى – قاۋىپسىزدىك كەڭەسىنىڭ حاتشىسى قالمۇحانبەت قاسىموۆ توراعالىق ەتتى. وتىرىسقا اقپاراتتىق قاۋىپسىزدىككە جاۋاپتى مەملەكەتتىك ورگانداردىڭ باسشىلارى, ءال-فارابي اتىنداعى قازاق ۇلتتىق ۋنيۆەرسيتەتى جانە «استانا» حالىقارالىق ۋنيۆەرسيتەتىنىڭ عالىمدارى مەن ساراپشىلارى, قازاقستاندىق اقپاراتتىق قاۋىپسىزدىك اسسوتسياتسياسى, قازاقستاننىڭ ينتەرنەت اسسوتسياتسياسى, قازاقستاندىق مەديا-اليانسى, وڭىرلىك باق-تاردىڭ اليانسى, كيبەرشابۋىلداردى زەرتتەۋ جانە تالداۋ ورتالىعى, سونداي-اق اقپاراتتىق تەحنيكالىق قورعاۋ قۇرالدارىن دايىندايتىن وتاندىق وندىرۋشىلەر وكىلدەرى قاتىستى.
ءسوز تىزگىنىن ۇستاعان قالمۇحانبەت قاسىموۆ اقپاراتتىق قاۋىپسىزدىك مەملەكەتتىڭ ۇلتتىق قاۋىپسىزدىگىنىڭ نەگىزگى ەلەمەنتى ەكەنىن, ونىڭ اتالعان سالانىڭ قاۋىپسىزدىكتىڭ ەكونوميكالىق, قوعامدىق, ساياسي جانە باسقا دا تۇرلەرىنە تىكەلەي اسەر ەتەتىنىن باسا ايتتى.
– بۇل كەشەندى تاقىرىپ ەكى ۇلكەن بلوكتان تۇرادى. ءبىرىنشىسى, اقپاراتتىق كەڭىستىكتىڭ دەسترۋكتيۆتى اسەردەن قورعالۋى بولسا, ەكىنشىسى – بايلانىس جانە اقپارات ارنالارىنىڭ تەحنيكالىق قورعالۋىن قامتاماسىز ەتەتىن كيبەرقاۋىپسىزدىك. ەكى اسپەكتى ءوزارا تىعىز بايلانىستى. سوڭعى جىلدارى ۇلتتىق قاۋىپسىزدىكتىڭ نەگىزىنە اينالعان اقپاراتتىق قاۋىپسىزدىك سالاسىندا ەلەۋلى وزگەرىستەر بولدى. ول قاۋىپسىزدىكتىڭ قوعامدىق, ەكونوميكالىق جانە ساياسي سياقتى باسقا دا تۇرلەرىنە تىكەلەي ىقپالىن تيگىزۋدە. اقپاراتتىق الاڭ قۇرىلىمىنىڭ تۇبەگەيلى وزگەرىسىندە ەڭ الدىمەن الەۋمەتتىك جەلىلەر الەۋەتىنىڭ كۇشەيۋى ماڭىزدى ءرول اتقارادى. ول حالىقتىڭ باسىم بولىگى ءۇشىن اقپارات كوزى جانە قارىم-قاتىناس قۇرالى بولىپ وتىر. ازاماتتار جاڭالىققا وسى الاڭنان قانىعىپ, الەمگە الەۋمەتتىك جەلىلەر ارقىلى قارايدى. الەۋمەتتىك جەلىلەر باسقا باق-تاردان دەسترۋكتيۆتى اسەر ەتۋىمەن ەرەكشەلەنەدى. قازىر كەز كەلگەن پايدالانۋشى حابار تاراتا الادى. مۇنىڭ بارلىعى بۇرمالانعان جانە قاتە اقپارات تاراتۋعا قولايلى جاعداي جاسايدى, – دەدى قاۋىپسىزدىك كەڭەسىنىڭ حاتشىسى.
باسقوسۋدا ساراپشىلار مەملەكەتتىك ورگاندار مەن قوعام اراسىنداعى كوممۋنيكاتسيانىڭ وزەكتى ماسەلەلەرى, مەملەكەتتىك اقپاراتتىق ساياساتتىڭ باسىمدىقتارى, ەلدىڭ اقپاراتتىق قاۋىپسىزدىگىنىڭ تاۋەكەلدەرى مەن سىن-قاتەرلەرى تۋرالى ويلارىن تالقىعا سالدى.
اقپارات جانە قوعامدىق دامۋ مينيسترلىگى بيلىك پەن قوعام اراسىنداعى ديالوگتى نىعايتۋ, قازاقستاندىق باق-تاردىڭ باسەكەلەستىگىن ارتتىرۋ جانە مەديا كەڭىستىگىن رەتتەۋ ماسەلەلەرىنىڭ زامانعا ساي جاڭا تاسىلدەرى تۋرالى كەڭىنەن باياندادى.
ال قازاقستاندىق مەديا-قوعامنىڭ جانە ينتەرنەت-قاۋىمداستىقتارىنىڭ وكىلدەرى الەۋمەتتىك جەلىلەردىڭ بۇقارالىق اقپارات قۇرالدارىنا بالاما رەتىندە ارتىپ كەلە جاتقان رولىنە نازار اۋداردى. بۇگىنگى تاڭدا الەۋمەتتىك جەلىلەر حالىق ءۇشىن ەڭ قولايلى كوممۋنيكاتسيا قۇرالى بولىپ وتىر. سونىمەن قاتار ونىڭ تەرىس اسەرى بار ەكەنى راس. وسىعان قاراي تۇراقسىزدىق تۋىنداتاتىن جالعان اقپاراتتار ماسەلەسىنە دە ءمان بەرىلدى. اتالعان باعىتتا ساراپشىلىق كەڭەس مەديا-قوعامداستىقتىڭ اقپاراتتى جاساۋ جانە تاراتۋ ماسەلەسىندە جاۋاپكەرشىلىكتەرىن كوتەرۋگە شاقىردى.
قاۋىپسىزدىك كەڭەسىنىڭ حاتشىسى قالمۇحانبەت قاسىموۆ قازاقستاننىڭ دامۋ جولىنداعى كۇردەلى تاريحي كەزەڭىندە مەملەكەتكە جانە قوعامدىق ينستيتۋتتارعا بىرلەسىپ اقپاراتتىق كەڭىستىكتىڭ تۇراقتى دامۋىن قامتاماسىز ەتۋ, سىرتقى تەرىس ىقپالدارعا جول بەرمەۋ ماسەلەلەرى ماڭىزدى ەكەنىن اتاپ ءوتتى. ساراپشىلىق كەڭەستىڭ قورىتىندىسى بويىنشا جەتەكشى ماماندار اقپاراتتىق قاۋىپسىزدىك سالاسىنداعى مەملەكەتتىك ساياساتتى جەتىلدىرۋگە باعىتتالعان ۇسىنىستار كەشەنىن پىسىقتادى.
