تۇڭعىش رەت ۇيىمداستىرىلعان بۇل فورۋم ازيا قۇرلىعىندا ورنالاسقان ەلدەر اراسىنداعى ادەبي-مادەني بايلانىستاردى نىعايتۋ, ادەبي ۇدەرىستىڭ دامۋىنا قاتىستى ازيا ەلدەرىمەن تاجىريبە الماسۋ سىندى بىرقاتار ماقسات-مىندەتتەردى كوزدەيدى.
بۇل تۋرالى قازاقستان جازۋشىلار وداعىنىڭ توراعاسى ۇلىقبەك ەسداۋلەت بريفينگتە ايتتى. «وڭتۇستىك كورەيا, قاتار جانە موڭعوليا ەلدەرىنەن نوبەل سىيلىعىنا 3 نومينانت كەلە جاتىر. قۇرلىقتاعى 45 مەملەكەتتىڭ 44-ىنەن جازۋشى شاقىردىق. ناتيجەسىندە 35 ەلدەن 80-گە جۋىق قالامگەر كەلمەك. ۇيىمداستىرۋ جۇمىستارىنا مەملەكەت ءوزى قولداۋ كورسەتىپ وتىر. مەملەكەتتىك حاتشى مارات ءتاجين مىرزا شارانى ۇيىمداستىرۋعا تىكەلەي اتسالىسسا, مەملەكەت باسشىسى فورۋمنىڭ اشىلۋىنا قاتىسپاقشى. وسىنىڭ ءوزى ادەبيەتكە دەگەن وڭ كوزقاراس قالىپتاسقانىن كورسەتەدى», – دەدى ۇلىقبەك ەسداۋلەت. مادەنيەت جانە سپورت ۆيتسە-ءمينيسترى نۇرعيسا داۋەشوۆ اتالمىش فورۋمدى 3 جىلدا ءبىر رەت وتكىزۋ ۇسىنىلاتىنىن ايتتى. «ازيا قالامگەرلەرىنە وسى فورۋمدى 3 جىل سايىن ءارتۇرلى مەملەكەتتە وتكىزۋدى ۇسىنباقپىز. سونداي-اق, ازيا جازۋشىلارى كوميتەتىن قۇرىپ, شتاب-پاتەرىن نۇر-سۇلتان قالاسىندا اشۋدى جوسپارلاپ وتىرمىز. اۋدارما ىسىنە, سونىڭ ىشىندە قازاق اۆتورلارىن ازيا تىلدەرىنە اۋدارۋ بويىنشا دا ناقتى ۇسىنىستارىمىز بار. فورۋم بارىسىندا وسى تاقىرىپتاردا پىكىر الماسىپ, كەلىسسوزدەر جۇرگىزەمىز», – دەدى ۆيتسە-مينيستر.
قازاقستان جازۋشىلار وداعى توراعاسىنىڭ ورىنباسارى اقبەرەن ەلگەزەكتىڭ سوزىنشە, ادەبي شارا بارىسىندا پايدالى دارىستەر مەن اشىق پىكىرتالاستار جوسپارلانعان. «فورۋم جۇمىسى 3 كۇنگە سوزىلادى. ەرتەڭ پلەنارلىق وتىرىسى وتەدى. ەكى بولىمدە 11 سپيكەر بايانداما وقيدى. كەلەسى كۇنى TED.9 فورماتىندا ارنايى شارا وتەدى. وندا 10 سپيكەر ءدارىس وقىپ, ەركىن فورماتتا سۇحباتتاسادى. سونداي-اق, اباي كوشەسىنىڭ بويىندا «قالامگەرلەر اللەياسى» اشىلماق. ونىمەن قوسا ورتالىق ازيا قالامگەرلەرىنىڭ كەزدەسۋى وتەدى. فورۋم شەڭبەرىندە جاس ازيا قالامگەرلەرىنىڭ كەزدەسۋى دە جوسپارلانعان», – دەيدى ول.
