قوعام • 03 قىركۇيەك، 2019

حالىقپەن ۇنقاتىسۋعا ءازىر ەكەنىن كورسەتتى

26 رەتكورسەتىلدى

مەملەكەت باسشىسى قاسىم-جومارت توقاەۆتىڭ جولداۋىندا ەلىمىزدەگى ماڭىزدى دەگەن ساياسي، الەۋمەتتىك جانە ەكونوميكالىق ماسەلەلەر كوتەرىلدى. بۇل تۇرعىدا پرەزيدەنت جاڭا رەفورمالاردىڭ تەك رەفورما جاساۋ ءۇشىن عانا ەمەس، ناقتى ناتيجە ءۇشىن جاسالۋى كەرەكتىگىن باسا ايتتى. جانە جاڭا باستامالاردىڭ كوشەدە ەمەس، پارلامەنت قابىرعاسىندا قارالۋى كەرەكتىگىنە توقتالدى.

بۇگىنگى تاڭدا ازاماتتاردىڭ ساياسي ساۋاتى ارتقانى، قوعامدا پىكىر الۋاندىعى پايدا بولعانى بايقالىپ وتىر. مەملەكەت باسشىسى وسى ورايدا ءتۇرلى پىكىرلەرگە اشىق، ماسەلەنى قوعام بولىپ تالقىلاۋعا دايىن ەكەندىگىن ءبىلدىردى. قازىر ەلىمىزدە الەۋمەتتىك ماسەلەلەر بار، پروبلەمانى جاسىرۋدىڭ ءجونى جوق. «اۋرۋىن جاسىرعان ولەدى» دەگەن بار. سول سەبەپتى، قوردالانعان ماسەلەلەردىڭ شەشىمى جولداۋدا ايتىلدى. مىسالى، ازاماتتاردىڭ زەينەتاقى جيناقتارىن پاتەر الۋعا نەمەسە ءبىلىم الۋعا پايدالانۋىنا رۇقسات ەتۋگە قاتىستى پرەزيدەنتتىڭ ۇكىمەتكە بەرگەن تاپسىرماسى حالىقتىڭ قولداۋىنا يە بولاتىنى انىق. بۇل بىرقاتار الەۋمەتتىك ماسەلەلەردىڭ شەشىمىن تابۋعا مۇمكىندىك بەرەر ەدى. سونىمەن قاتار اتالعان تاقىرىپتى ءالى دە تالقىعا سالىپ، قوعاممەن اقىلداسۋ كەرەك. مەملەكەت باسشىسىنىڭ ءتيىستى زاڭناما بويىنشا بەيبىت ميتينگ وتكىزۋگە رۇقسات ەتۋ كەرەك دەگەنى دە بيلىكتىڭ حالىقپەن ديالوگ قۇرۋعا ءازىر ەكەنىن كورسەتتى.

جالپى، بۇل جولداۋدى تاريحي وقيعا دەۋگە نەگىز بار. پرەزيدەنت قازاقستاننىڭ ەكونوميكالىق-الەۋمەتتىك دامۋدىڭ جاڭا بەلەسىنە شىققانىن ايتتى. تاۋەلسىزدىك جىلدارىندا ەلىمىز ايتۋلى بەلەستەردى باعىندىردى. دەگەنمەن، ءالى دە اتقارىلار جۇمىستار از ەمەس. بۇل تۋرالى اشىق جانە ءادىل ايتۋ كەرەك. وزىمىزگە ءوزىمىز وتكىر ساۋالدار قويىپ، اقىلعا قونىمدى جاۋاپ تابا العانىمىز ءجون.

جاڭا كەزەڭ ۇكىمەتتەن جاڭاشا جولدى تالاپ ەتەدى. بۇگىنگە دەيىن ۇكىمەت حالىق ءۇشىن نە قاجەت ەكەنىن جاقسى بىلەدى دەگەن پىكىر باسىم بولىپ كەلدى. مۇنداي جاعداي بارلىق مەملەكەتتىڭ باسىنان وتكەن. قازىر ۇلت بولىپ ۇيىسىپ، بىرلەسە جۇمىس ىستەيتىن ۋاقىت كەلدى.

ەرلان سايروۆ،

الەۋمەتتانۋشى

سوڭعى جاڭالىقتار

ۇقساس جاڭالىقتار