وسىنداي ىزگىلىكتى ءىستىڭ ءبىر پاراسى اقمولا وبلىسىنىڭ قورعالجىن اۋدانىندا ءوتتى. ەلىمىز بويىنشا بيىل تۇڭعىش پرەزيدەنت قورى وقۋشىلارعا مەكتەپكە قاجەتتى 500 سومكە ازىرلەپ, تاراتتى. ارينە, ولاردىڭ ءبىر بولىگى وسى ايتۋلى شارا ۇيىمداستىرىلعان قورعالجىندىق وقۋشىلارعا ءتيدى.
بيىلعى سىيلىقتىڭ جىلداعىدان ءبىر ەرەكشەلىگى – سومكە ءىشى بالالاردىڭ سپورتتىق كيىمىمەن تولىقتىرىلعان. وعان قوسا, سومكەلەر جارىق شاعىلىستىراتىن ەلەمەنتتەرمەن جابدىقتالعان ەكەن. بۇل ەرەكشەلىك بالانىڭ جولدان وتەردەگى قاۋىپسىزدىگىنە اسا قاجەت دۇنيە. سونداي-اق ءار سومكەگە توتەنشە جاعداي كەزىندە قاجەت قاۋىپسىزدىك جادىناماسى, قالتا شامى, دابىل قۇرالى (ىسقىرىق) سالىنعان.
وسى شارۋانىڭ باسى-قاسىندا جۇرگەن قازاقستاننىڭ تۇڭعىش پرەزيدەنتى – ەلباسى قورىنىڭ اعا ۇيلەستىرۋشىسى گۇلنارا ەرشىمانوۆا از قامتاماسىز ەتىلگەن جانە كوپ بالالى وتباسىلاردان شىققان وقۋشىلاردى بارىنشا قامتۋ داستۇرگە اينالعانىن جەتكىزدى.
– قازاقستاننىڭ تۇڭعىش پرەزيدەنتى – ەلباسى قورى سوڭعى 10 جىل ىشىندە «مەكتەپكە جول» اكتسياسى اياسىندا ەلىمىزدىڭ بارلىق ايماقتارىنان 9 مىڭ بالاعا مەكتەپ سومكەلەرى مەن كەڭسە تاۋارلارى تۇرىندە ماتەريالدىق كومەك كورسەتتى. مەكتەپ سومكەلەرى تەك قالالار عانا ەمەس, سونىمەن قاتار ەلىمىزدىڭ وسى ايماقتارىنىڭ شالعايداعى اۋىلدارىنا دا جەتكىزىلدى, – دەدى گ.ەرشىمانوۆا.
بيىل «مەكتەپكە جول» كەڭ اۋقىمدى اكتسياسى اقمولا وبلىسى قورعالجىن اۋىلىندا ۇيىمداستىرىلعان « ۇلى دالا مادەنيەتىندەگى قۇستاردىڭ سيمۆوليكاسى» اتتى رەسپۋبليكالىق شىعارماشىلىق فەستيۆالى بارىسىندا ۇيىمداستىرىلدى. فەستيۆالگە رەسەي فەدەراتسياسى جانە قىرعىز رەسپۋبليكاسىنىڭ وكىلدەرىن قوسقاندا 150 بالا قاتىستى.
جوبا – ەلباسى قورىنىڭ ۇكىمەتتىك ەمەس ۇيىمدارعا ارنالعان جىل سايىنعى الەۋمەتتىك يدەيالار جانە جوبالار ءىس-شاراسىنىڭ 2018 جىلعى جەڭىمپازى. فەستيۆال بالالاردىڭ دۇنيەتانىمىن, جاستاردىڭ گۋمانيستىك تاربيەسىن قالىپتاستىرۋعا, ۇلتتىق مادەنيەتتى ناسيحاتتاۋعا, پاتريوتتىق سەزىمدى قالىپتاستىرۋعا, بالالار مەن جاستاردىڭ شىعارماشىلىق, ينتەللەكتۋالدىق, رۋحاني, فيزيكالىق دامۋىنا ىقپال ەتۋگە باعىتتالعان.
قازىرگى الەمدەگى بۇل فاكتور عىلىم مەن گۋمانيتارلىق عىلىمداردىڭ ءوزارا ارەكەتتەسۋىن ارتتىرۋ-دا وتە ماڭىزدى.
– الەۋمەتتىك يدەيالار جارمەڭكەسى باستالعان كەزدەن 250 الەۋمەتتىك جوبا ىسكە اسىرىلدى. فەستيۆالدىڭ بىرەگەيلىگى بالالاردىڭ ەكولوگياعا نازارىن اۋدارىپ, جاستاردىڭ بويىنا ادامگەرشىلىك سەزىمىن ءسىڭىرۋ. قازىرگى زاماندا بۇل عىلىمي-جاراتىلىستانۋ جانە گۋمانيتارلىق بىلىمدەردىڭ ىنتىماقتاستىعىنىڭ بىردەن ءبىر كۇشى, – دەيدى قازاقستاننىڭ تۇڭعىش پرەزيدەنتى – ەلباسى قورىنىڭ اعا ۇيلەستىرۋشىسى.
ءىس-شارا بارىسىندا قىزىقتى ترەنينگتەر, ءتۇرلى سەمينارلار جانە سپورتتىق تۋرنيرلەر ءوتتى. قولونەر دۇكەنىندە شەبەرلەر قولونەر بويىنشا ساباق وتكىزدى. اۋدان ستاديونىندا سپورتتىق ويىندار ءوتتى.
سونىمەن قاتار وبلىس اكىمىنىڭ كۋبوگى ءۇشىن جاستار اراسىندا سپورتتىق تۋريزم بويىنشا تۋرنير ۇيىمداستىرىلدى. فەستيۆال قوناقتارى جەرگىلىكتى باعدارلاۋ بويىنشا جالپى ءبىلىم الىپ, جارىستارعا دا قاتىستى.
بارلىق سايىستاردىڭ جەڭىمپازدارىنا العىس حاتتار مەن ەستەلىك سىيلىقتار تابىس ەتىلدى.
