جيىنعا قاتىسقان مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆا, پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى ەرلان ءابىل, پرەزيدەنتتىك جاستار كادرلىق رەزەرۆىن ىرىكتەۋدىڭ اقپاراتتىق جۇيەسىن جاساۋشى دانا دجاكۋپوۆا وزدەرىنىڭ كادرلىق رەزەرۆ كوميسسياسىنىڭ مۇشەلەرى ەكەنىن دە حابارلادى. انار جايىلعانوۆانىڭ ايتۋىنشا, كەمىندە 5 جىل جۇمىس ءوتىلى بار, 35 جاسقا تولماعان قازاقستان رەسپۋبليكاسىنىڭ جوعارى ءبىلىمدى ازاماتى ۇمىتكەر بولا الادى. ءوتىنىش ءبىلدىرۋشىنىڭ ەلدە بولۋى شارت ەمەس. ياعني, شەتەلدەگى جاستارىمىزدىڭ دا باعىن سىناۋعا مۇمكىندىگى بار.
تىركەۋ ونلاين پلاتفورمادا جۇرگىزىلمەك. بىرنەشە كەزەڭنەن تۇراتىن ىرىكتەۋدە ۇمىتكەرلەر الدىمەن تەستەن ءوتىپ, ەسسە جازادى. بۇل قاتىسۋشىلاردىڭ وي-ءورىسىن, جازۋ قابىلەتىن, اقپاراتتى ساراپتاي الۋى مەن جەكە قاسيەتتەرىن باعالاۋعا مۇمكىندىك بەرەدى. العاشقى كەزەڭنەن سۇرىنبەي وتكەندەر بەينەجازبالار ارقىلى ءوز جوبالارىن قورعايدى. جوبالاردىڭ الەۋمەتتىك ماڭىزى بولۋى شارت. ءار كەزەڭنىڭ باعاسى ەسەپكە الىنىپ, ۇمىتكەرگە ورتاشا ۇپاي قويىلادى. وزىپ شىققاندارمەن ەكسپەرتتىك كوميسسيا جەكە كەزدەسۋ وتكىزەدى. ەڭ كوپ بالل جيناعان قاتىسۋشىلاردىڭ كانديداتۋراسى پرەزيدەنتتىڭ جاستار كادرلىق رەزەرۆىنىڭ ۇلتتىق كوميسسياسىنىڭ وتىرىسىندا بەلگىلى بولادى.
ۇمىتكەرلەردى ىرىكتەۋ جۇيەسىندە حالىقارالىق ستاندارتتار پايدالانىلادى. ياعني, كوميسسيا قاتىسۋشىنىڭ اتى-ءجونىن بىلمەيدى, تەك ارنايى كود ارقىلى تاڭدايدى. ول ساندار ءار كەزەڭدە اۋىسىپ وتىرادى. انار جايىلعانوۆا ۇمىتكەرلەرگە قازىردەن سەنىمنىڭ مول ەكەنىن اتاپ ءوتتى. «پرەزيدەنتتىك جاستار كادرلىق رەزەرۆىن قۇرۋداعى باستى ماقسات – جاستار ءۇشىن ءتيىمدى ءارى اشىق الەۋمەتتىك ليفت قۇرۋ ەكەنىن اتاپ وتكىم كەلەدى. بۇل ازاماتتارعا زور ءۇمىت ارتىلىپ وتىر. ولار الداعى رەفورمالاردىڭ قوزعاۋشى كۇشى بولۋى كەرەك. پرەزيدەنتتىك جاستار كادرلىق رەزەرۆىنە ىرىكتەۋ ەرەجەسى مەن ءتارتىبى پرەزيدەنت جارلىعىمەن رەتتەلدى», دەدى ول.
كونكۋرستىڭ نەگىزگى كەزەڭدەرى بيىلعى قازاندا وتەدى. العاشقى تەستىلەۋ 12 قازانعا بەلگىلەنگەن. اقپاراتقا سۇيەنسەك, ءار كەزەڭ تاپسىرماسىنىڭ ورىندالۋ ۋاقىتى شەكتەۋلى. جەكە سۇحباتتار قاراشانىڭ سوڭىنا جوسپارلانعان. ال ۇلتتىق كوميسسيانىڭ وتىرىسى 25 جەلتوقساندا وتەدى. ياعني, ۇزدىك جاستار 2020 جىلدان باستاپ جاڭا قىزمەتتەرىنە كىرىسە الماق.
پرەزيدەنتتىك جاستار كادرلىق رەزەرۆىن ىرىكتەۋدىڭ اقپاراتتىق جۇيەسىن جاساۋشى دانا دجاكۋپوۆا ۇمىتكەرلەردىڭ ءتىزىمى مەن ولار تۋرالى اقپارات بارلىعىنا اشىق بولاتىنىن ايتتى. ءتىپتى ازاماتتارىمىزدىڭ قاتىسۋشى تۋرالى پىكىر قالدىرۋعا دا مۇمكىندىگى بولادى.
كوميسسيا مۇشەلەرى كونكۋرستىڭ ءادىل ءوتۋىن باقىلاۋ ءۇشىن قوعام بەلسەندىلەرىنىڭ شاقىرىلاتىنىن حابارلادى.
