مادەنيەت جانە سپورت مينيسترلىگى ۇيىمداستىرعان «رۋحاني قازىنا-2019» فەستيۆالىندە اقكيىزتوعاي اۋىلدىق كىتاپحاناسىنىڭ جۇمىسى «ۇزدىك اۋىلدىق كىتاپحانا» اتالىمى بويىنشا جەڭىمپاز بولىپ تانىلعاندا, تاڭىرقاي قويعانىمىز جوق. سولاي بولۋى ءتيىس تە ەدى.
ۇلتتىق مادەنيەتتى ناسيحاتتاپ, ايماقتىق مادەنيەت ۇيىمدارىنىڭ ءيميدجىن نىعايتۋعا باعىتتالعان ۇزدىك تاجىريبەلەردى كورسەتۋ ماقساتىندا وتكەن فەستيۆالگە اتالعان كىتاپحانانىڭ مەڭگەرۋشىسى ساندۋعاش قاليەۆا قاتىستى. سوڭعى ەكى جىلدا اتقارعان جۇمىستارىن جىپكە تىزگەندەي قىلىپ بايانداپ بەرگەن كىتاپحاناشىنىڭ ءسوزى كوپشىلىكتى ءتانتى ەتتى. وسى بايقاۋدا ول 1 ملن تەڭگە كولەمىندەگى بايگەنى الىپ قانا قويماي, نۇر-سۇلتان قالاسىنداعى ۇلتتىق اكادەميالىق كىتاپحانادا ءبىر ايعا تاجىريبە الماسۋ باعىتىندا جۇمىس ىستەۋ مۇمكىندىگىنە يە بولدى. قاراپايىم عانا اۋىل كىتاپحاناشىسى ءۇشىن بۇدان زور باقىت بولار ما؟ ەلوردادان ولجالى ورالعان ارىپتەستەرىن قۇلسارى تەمىرجول ۆوكزالىنان شاشۋ شاشىپ قارسى العان كىتاپحاناشىلار دا وسى مەرەيلى ءساتتى بولىسۋگە اسىققان.
– وتكەن جىلى اقكيىزتوعاي اۋىلدىق كىتاپحاناسىنىڭ ماتەريالدىق-تەحنيكالىق بازاسى جاڭارتىلىپ, كوۆوركينگ ورتالىعى اشىلدى. جەرگىلىكتى اكىمشىلىكتىڭ جاڭا عيماراتىندا ورنالاسقان كىتاپحانا جايلى ورىنعا اينالدى. قاشان بارساڭىز دا اۋىلدىڭ ۇلكەن-كىشىسى ساندۋعاشتىڭ جانىندا جۇرگەنىن كورەسىز. بالاباقشامەن, مەكتەپپەن بىرلەسىپ, كوۆوركينگ ورتالىعىندا دا ءتۇرلى شارالار ۇيىمداستىرىپ جاتادى, – دەيدى جىلىوي اۋداندىق ورتالىق كىتاپحاناسىنىڭ باسشىسى بالزيا كەنجەبەكوۆا. كىتاپحاناعا كەلىپ, مەرزىمدى باسىلىمدارمەن, جاڭا ادەبيەتتەرمەن ۇنەمى تانىسىپ وتىراتىن اۋىل تۇرعىندارى كوۆوركينگ ورتالىعىندا ۋاقىتتارىن ءتيىمدى وتكىزۋگە مۇمكىندىك الدى. جەرگىلىكتى حالىق ءبىر انىقتاما ءۇشىن بۇرىنعىداي اۋدان ورتالىعىنا بارىپ شارشامايدى, وسى ورتالىققا كەلىپ, شارۋالارىن رەتتەي الادى. قاشان دا قايناعان تىرلىكتىڭ ورتاسىندا, بىرىنە انىقتاما الۋعا جاردەمدەسىپ, بىرىنە قاجەت ادەبيەتتەرىن تاۋىپ بەرىپ, بىرىنە جاڭا كىتاپ تۋرالى بايانداپ كىتاپحاناشى ساندۋعاشتىڭ جۇرگەنىن كورەسىز. ءبىز كوبىنە ۇلكەن ىستەر تۋرالى عانا ايتىپ, وسىنداي قاراپايىم ەڭبەك ادامدارىن قاپەرىمىزدەن تىس قالدىرىپ جاتامىز. ەڭبەكتىڭ ۇلكەن-كىشىسى جوق. باستىسى, جانىڭ قالاعان, ءوزىڭ جەتىك مەڭگەرگەن ماماندىقتىڭ ناعىز شەبەرى بولۋ. اقكيىزتوعاي اۋىلىندا وسىنداي كىتاپحاناشى تۇرادى.
اتىراۋ
