ايىپتاۋ اكتىسىنە سايكەس, ايىپتالۋشىلاردىڭ ۇشەۋى – بەرىك احمەتوۆ, قايرات اقشانوۆ جانە نۇرلان شۇكىلدىكوۆ «وحوتزووپروم» ينسپەكتورى ەرلان نۇرعاليەۆتى ءولتىردى جانە ونىڭ ارىپتەسى پەتر نيتسىكقا قاستاندىق جاسادى, اقبوكەندەردى زاڭسىز اۋلادى دەپ ايىپتالۋدا. ال ولاردىڭ سەرىكتەستەرى – بەردەن بازاروۆ, باتىربەك قايىربەكوۆ, جاراسحان مىرزاباەۆ جانە ايدوس اكىموۆكە تەك زاڭسىز اڭ اۋلاعانى ءۇشىن ايىپ تاعىلىپ وتىر.
الدىن الا تىڭدالىم بارىسىندا جابىرلەنۋشىلەر مەن سوتتالۋشىلاردىڭ وكىلدەرى سوتقا دەيىنگى تەرگەۋ ءۇستىرت جۇرگىزىلدى دەپ سانايتىندارىن ايتىپ, قىلمىستىق ءىستى پروكۋرورعا قايتارۋدى سۇرادى.
سوتتا مارقۇم قورىقشىنىڭ ۇلى مەدەت نۇرعاليەۆتىڭ جانە ينسپەكتور پەتر نيتسىكتىڭ ءسوزىن سويلەگەن ادۆوكات المات قاسقىرباي قاستاندىق جاساعانداردىڭ قاتارىنا كىرمەگەن ءتورت ايىپتالۋشىنىڭ ءىسىن قايتا قاراۋدى سۇرادى. ادۆوكاتتىڭ ايتۋىنشا, بۇل تورتەۋ قىلمىستىق كودەكستىڭ 432, 434-باپتارى بويىنشا اسا اۋىر قىلمىستى جاسىرعانى ءۇشىن جانە دەر كەزىندە قىلمىستى جاريا ەتپەگەنى ءۇشىن ايىپتالۋى كەرەك. ولاردىڭ بۇل كىنالارى بۇلتارتپاس فاكتىلەرمەن ايعاقتالعان. بىرىنشىدەن, ولار قىلمىس ورنىندا وقيعاعا كۋا. ودان كەيىن ءبارى بىرگە ءبىر ۇيدە تۇنەگەن جانە پوليتسياعا جاعداي تۋرالى حابارلاۋعا مۇمكىندىكتەرى بولدى.
قورعاۋشىنىڭ ءسوزىن مارقۇمنىڭ دوسى جانە ونىڭ ۇلىنىڭ زاڭدى وكىلى عالىمجان تاۋەكەلوۆ تە قۇپتادى. ول ەگەر الگى تورتەۋ دەر كەزىندە پوليتسياعا جۇگىنگەندە, قورىقشى ەرلان نۇرعاليەۆتىڭ ءومىرىن ساقتاپ قالۋعا بولاتىن ەدى دەگەن وكىنىشىن ءبىلدىردى. جابىرلەنۋشى تاراپ بۇل ادامداردىڭ ارەكەتتەرىنە دە اۋىر جازا قاراستىرىلۋ كەرەك ەكەندىگىن مالىمدەدى.
سونىمەن قاتار سوتتالۋشى تاراپتىڭ اۆدوكاتتارى دا قىلمىستىق ءىستى پروكۋرورعا قايتارىپ, تەرگەۋدى قايتا جۇرگىزۋدى سۇرادى. ادام ولىمىمەن ايىپتالۋشىلاردىڭ ءبىرى ق.اقشانوۆتىڭ قورعاۋشىسى تەرگەۋ ورگانىنىڭ ايىپتاۋ اكتىسىندە قىلمىس ورنىنىڭ تولىق مالىمەتتەرىن كورسەتپەگەنىن جانە زاڭسىز اڭ اۋلاۋ سالدارىنان كەلتىرىلگەن زالالدىڭ مولشەرىمەن كەلىسپەيتىنىن ايتتى.
ء«بىر توپ ادام قاساقانا ادام ءولتىردى» دەپ ايىپتالعان سوتتالۋشىلاردىڭ قورعاۋشىلارى قىلمىستىق باپتى قايتا كۆاليفيكاتسيالاۋدى تالاپ ەتتى. ولاردىڭ ايتۋىنشا, كۇدىكتىلەر ابايسىزدا ولىمگە اكەپ سوقتىرعان دەنە جاراقاتىن كەلتىرگەن. سەبەبى قورىقشى ەرلان نۇرعاليەۆ وقيعا ورنىندا قازا تاپپاعان, اۋرۋحاناعا جەتكىزگەندە ءتىرى بولعان.
بۇعان قوسا ادۆوكاتتار پوليتسەيلەردىڭ اڭشىلاردىڭ كيىكتى اتقاندارىن دالەلدەي الماعانىن ايتتى. «وحوتزووپروم» ينسپەكتورلارى دالادان اتىلعان 17 جانۋاردى تاۋىپ, ولاردىڭ زالالىن 45 ملن تەڭگە دەپ ەسەپتەدى. بىراق قورعاۋشىلار بۇل سوما اسىرا سىلتەلگەن, زالالدىڭ شىن مانىندەگى سوماسى 17 ملن تەڭگەدەن ءسال اسادى دەگەن پىكىرلەرىن جەتكىزدى. سوتتالۋشى ق.اقشانوۆتىڭ قورعاۋشىسىنىڭ ءوتىنىشىن ب.احمەتوۆ پەن ن.شۇكىلدىكوۆتىڭ ادۆوكاتتارى قولداپ وتىر.
الدىن الا تىڭدالىمنان سوڭ قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى بەكزات شالعىمباەۆ ءىستى پروكۋرورعا قايتارۋ تۋرالى ۇكىم شىعاردى. ونىڭ پايىمداۋىنشا, ءىس ەگجەي-تەگجەيلى زەرتتەلمەگەن, قىلمىستىق ءىس باپتارى دۇرىس قولدانىلماعان, تەرگەۋشىلەر قىلمىستىڭ قاي جەردە, قالاي جاسالعانىن دالەلدەيتىن ماتەريالداردى ايىپتاۋ اكتىسىنە ەنگىزبەگەن. ايىپتاۋلار تەك ەكى تاراپتىڭ اۋىزشا تۇسىنىكتەمەلەرىنە نەگىزدەلىپ جاسالعان. سوندىقتان ايىپتاۋ اكتىسىندە كەرەعار جاۋاپتار ءجيى كەزدەسەدى. كۇدىكتىلەردىڭ ارەكەتتەرىن سارالاۋ تۋرالى شەشىمدە قىلمىستاردىڭ وبەكتيۆتى جاعى سيپاتتالماعان. سونداي-اق اتالعان قىلمىستىق ءىس بويىنشا سوت ءوندىرىسىنىڭ ءتىلى قازاق ءتىلى دەپ تاڭدالعان, الايدا قۇجاتتاردىڭ ءبىر بولىگى زارداپ شەگۋشى پەتر نيتسىك ءۇشىن ورىس تىلىنە اۋدارىلماعان.
بۇل وقيعا جىل باسىندا تىركەلىپ, قاراعاندى وبلىسى نۇرا اۋدانىندا كيىك اتقان براكونەرلەر ەكى ينسپەكتوردى جاراقاتتاعان ەدى. اۋىر جاراقاتتان ەس جيماعان ەرلان نۇرعاليەۆ 15 قاڭتاردا نۇر-سۇلتان قالاسىنىڭ №1 اۋرۋحاناسىندا كوز جۇمدى. قازىر قىلمىستىق ءىس بويىنشا جەتى ادام ايىپتالىپ وتىر. ولاردىڭ ۇشەۋى – قاماۋدا.
