اتالعان باسقوسۋعا پرەزيدەنت اكىمشىلىگىنىڭ باسشىسى, ۇلتتىق كەڭەس توراعاسىنىڭ ورىنباسارى قىرىمبەك كوشەرباەۆ جەتەكشىلىك ەتتى. الداعى جۇمىس بارىسىن ۇيىمداستىرۋ تۋراسىنداعى جيىنعا كەڭەس مۇشەلەرى تۇگەل قاتىستى.
وتىرىس كەزىندە ۇلتتىق كەڭەستىڭ قىزمەتى مەن باعىت-باعدارى كەڭىنەن تالقىلانىپ, مەملەكەت باسشىسىنىڭ قاتىسۋىمەن وتەتىن العاشقى جيىنعا دايىندىق پىسىقتالدى. سونداي-اق قوردالانعان ماسەلەلەردى جۇيەلى تۇردە قاراستىرۋ ءۇشىن ارناۋلى جۇمىس توپتارى قۇرىلدى. ول ءۇشىن جيىن بارىسىندا كەڭەس مۇشەلەرى جۇمىس توپتارىنىڭ قانداي تاقىرىپتار بويىنشا جىكتەلۋى كەرەك ەكەنى تۋرالى پىكىرلەرىن ورتاعا سالدى.
قازاقستان رەسپۋبليكاسى پرەزيدەنتىنىڭ 2019 جىلعى 17 شىلدەدەگى №63 جارلىعىمەن بەكىتىلگەن قازاقستان رەسپۋبليكاسى پرەزيدەنتىنىڭ جانىنداعى ۇلتتىق قوعامدىق سەنىم كەڭەسى تۋرالى ەرەجەگە سايكەس ۇلتتىق كەڭەس مۇشەلەرىنە كۋالىكتەر تاپسىرىلدى.
پرەزيدەنت جانىنداعى ۇلتتىق قوعامدىق سەنىم كەڭەسىنىڭ ءبىرىنشى وتىرىسىن 2019 جىلدىڭ 6 قىركۇيەگىندە نۇر-سۇلتان قالاسىندا وتكىزۋ جوسپارلاندى.
