الەمدىك ارەناداعى ساياسي, رۋحاني ءھام مادەني جاھاندانۋ تۇسىندا تۇڭعىش رەت ۇيىمداستىرىلىپ وتىرعان فورۋم ازيا ەلدەرى اراسىنداعى ادەبي-مادەني بايلانىستاردى نىعايتۋ ماقساتىن دىتتەپ وتىر. جيىن بارىسىندا جاھاندىق ماسەلەلەردىڭ قالامگەر شىعارماشىلىعىندا كورىنىس تابۋى جانە جاڭا زامان ادامى وبرازىنىڭ كوركەم شىعارمادا بەينەلەنۋى, كلاسسيكالىق مۇرالارىنىڭ الەمدىك ادەبيەتتەگى ءرولى سىندى ادەبي ماسەلەلەر ورتاعا سالىنباق. ازيالىق ادەبيەتكە كەيىننەن ەنىپ جاتقان پوستمودەرنيستىك باعىت, شىعىس فيلوسوفياسىنىڭ كەڭ ءورىس الۋى, باتىستىق وركەنيەتتىڭ ۇلگىلەرى – ازيالىق ادەبي ۇدەرىستى جانداندىرىپ وتىر. ونىمەن قوسا, ازيا ەلدەرىنىڭ ادەبيەتىن جاقىنداستىراتىن كوركەم ءتىل بولعاندىقتان, كوركەم اۋدارما سالاسى بويىنشا حالىقارالىق بايلانىستاردىڭ قارقىندى دامۋىن جۇيەلەۋ كەرەكتىگى جايلى ورتاق ءبىتىم دە الداعى فورۋمدا تالقىلانباق.
قازىر ازيالىق ادەبيەتتە جاھاندىق ينتەگراتسيالىق ۇردىستەر كەڭىنەن قامتىلىپ, جالپىادامزاتتىق كوركەم مازمۇندى تاقىرىپتار كوبەيۋدە. قالىپتاسقان ءتۇرلى ادەبي فورما مەن جازۋشىلىق ستيل زاماناۋي ادەبيەتتىڭ قارقىندى دامۋىنا ءسوزسىز ۇلەس قوسادى. سونداي-اق ازيا ەلدەرى اقىن-جازۋشىلارىنىڭ ءتىلى, ءدىلى, ۇلتتىق مەنتاليتەتى, كوزقاراسى ءارتۇرلى بولعانىمەن, ادەبيەتتىڭ الىمساقتان بەرگى كوزدەگەن ماقساتى دا, قاۋزاعان تاقىرىبى دا بىرەۋ: ول – ادام تاعدىرى مەن ادامگەرشىلىك مۇرات. قۇرلىقتاعى 44 ەلدەن كەلەتىن ازيالىق 100-گە جۋىق اقىن-جازۋشى مەن قازاق قالامگەرلەرى باس قوساتىن الداعى فورۋم الەمدىك ادەبيەتتە «ازيا ادەبيەتى» ۇعىمىنىڭ قالىپتاسۋىنا سەپ بولاتىنىنا سەنەمىز.
