جاستار جىلى اياسىندا «A kind heart» قوعامدىق بىرلەستىگى ۇيىمداستىرعان اۋقىمدى ءىس-شاراعا ازاماتتىق باستامالاردى قولداۋ ورتالىعى مەن اقپارات جانە قوعامدىق دامۋ مينيسترلىگى قولداۋ كورسەتتى.
ءۇش كەزەڭنەن تۇراتىن اتالعان جوبانىڭ العاشقى كەزەڭىندە «مەن قازاقستاننانمىن» اتتى ۆيدەوبلوگ كونكۋرسى ءوتتى. بۇعان قاتىسۋشىلارعا تۋعان قالالارى مەن اۋىلدارى تۋرالى ۆيدەوبلوگ دايىنداپ, ول مەكەندى تۋريستەرگە تارتىمدى ەتىپ كورسەتۋ ءۇشىن بەلگىلى ورىندارى مەن كورىكتى جەرلەرىن ەرەكشە تانىستىرۋى شارت بولدى.
ەكىنشى كەزەڭدە قازاقستاننىڭ بارلىق ايماقتارىنا حالىقارالىق بلوگ-تۋر ۇيىمداستىرىلدى. جوبا اياسىندا ۇلىبريتانيا, اۋستراليا, اقش, يتاليا, رەسەي, تايلاند, ءۇندىستان, گرەكيا, كانادا, كورەيا رەسپۋبليكاسى, تۇركيا جانە فيليپپين ەلدەرىنىڭ تانىمال بلوگەرلەرى ءبىزدىڭ ەلگە تابان تىرەدى. ولار قازاقستاندىق بلوگەرلەرمەن بىرگە وڭىرلەرگە 5 كۇندىك ساياحات جاسادى. وسىدان كەيىن قاتىسۋشىلار قازاقستان تۋرالى بەينە شولۋ ازىرلەپ, ونى الەۋمەتتىك جەلىلەردەگى ءوز ارنالارىندا جاريالادى.
ال سوڭعى كەزەڭدە ايتۋلى جوبانىڭ قورىتىندىسى رەتىندە ەلوردادا ەكى كۇنگە جالعاسقان فورۋم سالتانات قۇردى. بۇل ءىس-شارانىڭ اشىلۋ سالتاناتىندا اقپارات جانە قوعامدىق دامۋ ءمينيسترى داۋرەن اباەۆ جوبانىڭ ماقساتى تالانتتى جاستاردىڭ قابىلەتىن كورسەتۋ, مەديا سالاسىنداعى ىنتىماقتاستىقتى ارتتىرۋ, تاجىريبە الماسۋ جانە ءتۋريزمدى دامىتىپ, قازاقستاننىڭ شەتەلدەگى بەت-بەدەرىن قالىپتاستىرۋ ەكەنىن ايتتى.
– بيىل قازاقستاندا ەلباسىنىڭ باستاماسىمەن جاستار جىلى دەپ جاريالانعان بولاتىن. وسى جىلدىڭ اياسىندا جاستاردى قولداۋعا ارنالعان سان الۋان ءىس-شارا جۇزەگە اسىرىلۋدا. بۇگىنگى باسقوسۋ دا وسىمەن ساباقتاسىپ وتىر. سارىارقانىڭ سامالى جانعا جىلۋ بەرەتىن, جەتىسۋدىڭ تاۋلارى اسقاق رۋح سىيلايتىن, شىعىسى شىرايلى, باتىسى ايبىندى, سولتۇستىگى كورىكتى, وڭتۇستىگى ورىكتى ەلگە تابانى تيگەن əر ادام قاناتتانىپ تۇرادى. قۇس بولىپ ۇشقىسى كەلەدى, جۇيرىك اتقا ءمىنىپ, شاپقىسى كەلەدى. ونداي اسەرگە سىزدەر دە بولەندىڭىزدەر دەپ ويلايمىن. كوشپەندىلەر وركەنيەتىنىڭ تەمىرقازىعى سانالاتىن قازاق ەلىنىڭ قۇشاعى قوناقتارعا əردايىم اشىق. ءƏربىر مەكەنى عانا ەمەس, ءəربىر تاسىنىڭ ءوزى تەرەڭ تاريحتان سىر شەرتەتىن تابيعاتى تاڭعاجايىپ, ۇلى دالانىڭ ءتوسى سىزدەردى سۇلۋلىعىمەن باۋراپ الدى دەپ مەن سەنەمىن, – دەدى داۋرەن اباەۆ.
فورۋم بارىسىندا جان-جاقتى ماعلۇمات بەرەتىن «ترەۆەل بلوگينگ», «YouTube-بلوگەر ءپروفيلىن دامىتۋ», «بيزنەس-بلوگينگ», «Instagram-بلوگەر ءپروفيلىن دامىتۋ», «Qazaq Instagram» اتتى شەبەرلىك ساباقتارى ءوتىپ, قىزىعۋشىلىق تانىتىپ كەلگەن جاستار بلوگينگتىڭ ءبىراز قىر-سىرىنا قانىقتى. اسىرەسە تىسقاققان بلوگەرلەر Instagram مەن YouTube-تا ساپالى كونتەنت جاساۋدىڭ, ءوز برەندىن قالىپتاستىرۋدىڭ جولىن ءتۇسىندىردى.
قازاقستاننىڭ كورىكتى جەرلەرىن ارالاپ شىققان تانىمال بلوگەرلەر فورۋمدا ديالوگ الاڭىن قۇرىپ, العان اسەرلەرىمەن ءبولىستى. سولاردىڭ ءبىرى Forbes-تىڭ نۇسقاسى بويىنشا الەمدەگى ەڭ تانىمال ۇزدىك ۇشتىككە كىرەتىن ساياحاتشى-بلوگەر مۋراد وسمانن وسىنداي تاماشا جوبانىڭ ورتاسىنان تابىلعانىنا, جاڭا دوستارمەن تانىسقانىنا قۋانىشتى ەكەنىن جانە بۇل ەلگە بىرنەشە رەت كەلسە دە, تاڭدانۋدان تانبايتىنىن جەتكىزدى.
سونداي-اق اقش-تان كەلگەن ساياحاتشى, رەجيسسەر, الەۋمەتتىك جەلىلەردە FunForLouis اتىمەن تانىمال, YouTube-تاعى ارناسىندا الەم ەلدەرىنە جاساعان ساپارلارىن تۇراقتى تۇردە جاريالاپ تۇراتىن لۋي دجون كوۋلل دا قازاقستانعا قۇرمەتى ەرەكشە ەكەنىن, بۇل ساپاردا تانىمى كەڭەيگەنىن ايتىپ, وڭ پىكىرىن ءبىلدىردى.
فورۋمنىڭ ەكىنشى كۇنىندە «مەن قازاقستاننانمىن» اتتى ۆيدەوبلوگەرلەر بايقاۋىنىڭ جەڭىمپازدارىن ماراپاتتاۋ ءراسىمى ءوتتى. كونكۋرسقا قاتىسۋعا 1000-عا جۋىق ءوتىنىم ءتۇسىپ, 200-دەن اسا جۇمىس قابىلداندى. فينالعا 15 ۆيدەوبلوگەر ءوتتى. قاتىسۋشىلاردىڭ جوبالارىن الىشەر ەلىكباەۆ, ءبىرجان ءاشىم, لۋي كوۋلل جانە مۋراد وسمانن سياقتى ەلىمىزدىڭ جانە شەتەلدەردىڭ اتاقتى بلوگەرلەرى قاراپ, جەڭىمپازداردى انىقتادى.
سونىمەن الاكولدى ايرىقشا تانىستىرعان ديدار مۇراتوۆ «مىڭنان تۇلپار» شىعىپ, 1 ميلليون تەڭگەنى ەنشىلەدى. ال 500 مىڭ تەڭگەلىك ەكىنشى ورىندى اق باۋىر پەتروگليفتەرى تۋرالى ۆيدەوسىمەن دميتري موسكالەنكو جەڭىپ الدى. ۇزدىك ۇشتىككە ىلىنگەن الديار بايراقىموۆ كوك جايلاۋدى ەرەكشەلەپ كورسەتىپ, 200 مىڭ تەڭگە يەلەندى. سونداي-اق «اۆياتا» كومپانياسىنىڭ ارنايى نوميناتسياسى الماتى تۋرالى بلوگىمەن جاسۇلان باقىتجانوۆقا جانە «Sevens» اۋىزسۋىنىڭ سىيلىعى اسسى جايلاۋىن اسپەتتەگەن ايدا تاستەمىروۆاعا تاپسىرىلدى.
