وسىدان ءبىر جىل بۇرىن ۇكىمەتتىڭ قاۋلىسىمەن «بوتاي» مەملەكەتتىك تاريحي-مادەني مۋزەي-قورىعى» رەسپۋبليكالىق مەملەكەتتىك قازىنالىق كاسىپورنى قۇرىلعان بولاتىن. ادامداردىڭ ەجەلگى تۇراعى وتىرىقشىلىق تۇرمىس سالتىمەن ەرەكشەلەنەدى. جارتىلاي جەر ۇستىنە تۇرعىزىلعان ۇيلەر اعاشتان, ساز بالشىقتان, جىلقى سۇيەگىنەن, قايىڭنىڭ قابىعىنان جانە شىمنان سالىنعان. ولاردىڭ ءپىشىنى كوپبۇرىشتى, ال توبەلەرى كۇمبەز ءتارىزدى بولعان. بوتايلىقتار قولا داۋىرىنە دەيىن ەكى مىڭ جىل بۇرىن مىستان جاسالعان قۇرال-سايماندار مەن ءارتۇرلى زاتتاردى پايدالانعان. العاش رەت جىلقى تۇلەگىن قولعا ۇيرەتىپ, قىمىز اشىتقان. 15 گەكتار جەردى الىپ جاتقان «بوتاي» قونىسىنان 158 باسپانانىڭ ورنىن بەلگىلى ارحەولوگ, تاريح عىلىمدارىنىڭ دوكتورى ۆيكتور زايبەرت جەتەكشىلىك ەتكەن ەكسپەديتسيا تاۋىپ, تورتكۇل دۇنيەگە تانىتقان.
«بوتاي» مۋزەي-قورىعىنىڭ الداعى جوسپارلارى مەن تۋريستىك سالانىڭ دامۋىنا قوساتىن ۇلەسىن تالقىلاۋعا ارنالعان جيىندى ايىرتاۋ اۋدانىنىڭ اكىمى بەيبىت يسمانوۆ كىرىسپە سوزبەن اشتى. ۆيكتور زايبەرت, مادەنيەت جانە ونەر ىستەرى دەپارتامەنتى تاريحي-مادەني مۇرا باسقارماسىنىڭ باس ساراپشىسى ازامات جولاەۆ, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, بيولوگيا عىلىمدارىنىڭ دوكتورى مۇرات نۇرىشەۆ, اقمولا وبلىستىق تاريحي-ولكەتانۋ مۇراجايىنىڭ ديرەكتورى قۋانىش شاقشاقوۆ, تاعى باسقالارى ەجەلگى بوتاي مادەنيەتىنىڭ ماڭىزدىلىعىن, قازاق حالقىنىڭ تاريحى تەرەڭدە جاتقانىن ايرىقشا اتاپ ءوتتى. اتقا ءمىنۋ مادەنيەتى مەن جىلقى شارۋاشىلىعى جەر جۇزىنە ۇلى دالادان تاراعانىنا ناقتى مىسالدار كەلتىردى.
ۆ. زايبەرتتىڭ «بوتاي مادەنيەتىنىڭ ساكرالدى كونتەكستەرى» اتتى جاڭا كىتابىنىڭ تۇساۋى كەسىلدى. «بوتاي» مەملەكەتتىك تاريحي-مادەني مۋزەي-قورىعى» رەسپۋبليكالىق مەملەكەتتىك قازىنالىق كاسىپورنىنىڭ ديرەكتورى ءۋاليحان قۇلباەۆ اتقارىلعان جۇمىستار مەن الداعى جوسپارلار جايلى ەسەپ بەردى.
مۇراجاي-قورىعىنىڭ مادەني دامۋىنا قوسقان ەلەۋلى ۇلەسى ءۇشىن عىلىمي-قور جۇمىسى جانە ەكسكۋرسيالىق قىزمەت كورسەتۋ ءبولىمىنىڭ جەتەكشىسى سابينا ءامىروۆا, عىلىمي-قور جۇمىسى جانە ەكسكۋرسيالىق قىزمەت كورسەتۋ ءبولىمىنىڭ ەكسكۋرسيا جۇرگىزۋشىسى ومىرسەرىك ەرعاليەۆ, نىسانداردى قورعاۋ جانە پايدالانۋ ءبولىمىنىڭ قىز ەتكەرى ۆلاديمير ماتيۋشينا العىس حاتتارمەن ماراپاتتالىپ, باعالى سىيلىقتار تابىس ەتىلدى.
پلەنارلىق ماجىلىستەن كەيىن دوڭگەلەك ۇستەلگە قاتىسۋشىلار نيكولسكوە اۋىلى جانىنداعى «بوتاي» ارحەولوگيالىق قازبا جۇمىستارىنىڭ بارىسىمەن تانىسىپ, كورمەنى تاماشالادى.
سولتۇستىك قازاقستان وبلىسى
