اكەدەن دارىعان اتا كاسىپ

ايماقتار • 19 تامىز، 2019

اكەدەن دارىعان اتا كاسىپ

تۋعان ولكەنىڭ تاۋ-تاسىندا ات قۇلاعىندا ويناپ وسكەن ەركەبۇلان ءۇشىن شىعارماشىلىق ويدىڭ ەركىندىگى اسا ماڭىزدى. الماتى وبلىسىنىڭ تاساشى باۋرايىندا بالالىق شاعىن وتكەرگەن ول شەبەرلىكتىڭ اكەسىنەن دارىعانىن ايتادى. «اكەم سوۆەتبەكتىڭ ىسمەرلىگىنە اۋىل ءتانتى بولاتىن. تۇرمىستىق بۇيىمداردى جاساتۋعا كەلگەندەردىڭ مەسەلىن قايتارماي، اڭگىمەسىن شيراتا وتىرىپ، كادەگە اساتىن دۇنيەلەردى جارقىراتا جاساعانىنا قىزىعىپ، شاعىن شەبەرحانانى اينالسوقتاپ ءجۇرۋشى ەدىم»،- دەيدى ەركەبۇلان.

ەلۆيرا سەرىكقىزى

وتىز جاسىندا ءوز شەبەرحاناسىنىڭ ىرگەسىن قالاعان ەركەبۇلان جاساعان ۇلتتىق بۇيىمدار ۇلكەن سۇرانىسقا يە. «بۇگىندە 4-5 شەبەرى بار شەبەرحانامىزدىڭ تابىسى جاقسى جولعا قويىلدى. 2007 جىلى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ «كوركەم سۋرەت» فاكۋلتەتىنىڭ «ساندىك قولدانبالى ونەر» ماماندىعىنا وقۋعا ءتۇسىپ، كانىگى شەبەر، پروفەسسور جولاۋشى تۇردىعۇلوۆتىڭ مەكتەبىنەن ءوتىپ، «DalaSazy» شەبەرحاناسىنىڭ جەتەكشىسى الماس مۇستافاەۆتان التى جىل تاجىريبەدەن ءوتىپ شىڭدالدىم»،- دەيدى شەبەر. مەكتەپ قابىرعاسىندا سپورت سالاسىنا ۇيىرسەك بولعان ەركەبۇلان ۋنيۆەرسيتەتتىڭ ۆولەيبول كومانداسىندا ونەر كورسەتىپ، «وشىرگىشتەر» كوڭىلدى-تاپقىرلار كومانداسىندا دا بەلسەندىلەردىڭ ءبىرى بولدى. بالا جاستان جانىنا جاقىن كاسىپكە ماماندانعان ەركەبۇلان ءوزىنىڭ جەكە شەبەرحاناسىن اشۋدى اركەز جادىنان شىعارماي جۇرەتىن. وسى تۇرعىدا ءوز ويىمەن بولىسكەن ەركەبۇلان «جەكە كاسىبىمدى اشۋ ارينە وڭاي بولعان جوق. جوعارىدا اتاپ وتكەنىمدەي، جاناشىر اعالارىمنىڭ كەڭەسىمەن، جاقىندارىمنىڭ دەمەۋشىلىگىمەن شەبەرحانا جۇمىسىن باستادىم. ءىنىم مەن جاقىن جولداسىم استىنداعى كولىگىن بەرىپ دەمەگەنى ماعان ۇلكەن سەرپىلىس بولدى. شەبەرحانامىزدا ۇلتتىق اسپاپتارىمەن قاتار استاۋ، كۇبى، بەسىك سياقتى ۇلتتىق ماڭىزى بار بۇيىمداردى جاسايمىز. ال بۇيىمداردىڭ ساتىلۋى ەمەس، ساپاسىنا نازار اۋدارامىز. ۇلتتىق اسپاپتاردى جاساۋدا جاڭعاق، قايىڭ، شىرشا سياقتى جەرگىلىكتى اعاشتارمەن قاتار شەتەلدەردىڭ تروپيكالىق ورماندارىنان اكەلىنگەن اعاشتاردى دا كادەگە اسىرامىز. الداعى ۋاقىتتا مەملەكەت تاراپىنان قولداۋ بولىپ جاتسا، كوپتەگەن جوبالاردى جۇزەگە اسىرۋ جوسپارىمىزدا بار»،- دەيدى ەركەبۇلان سوۆەتبەك ۇلى. ۇلتتىق باعىتتاعى بايقاۋلارعا ءجيى قاتىسىپ تۇراتىن شەبەرلەر «DalaSazy» ۇلتتىق مۋزىكالىق اسپاپتار كورمەسىندە سەرتيفيكاتپەن ماراپاتتالىپ، اتىراۋ قالاسىندا وتكەن «ۇكىلى دومبىرا» بايقاۋ بايگەسىنىڭ ديپلومانتى اتاندى. ال ۇلتتىق اسپاپ ىسىندەگى جەتىستىكتەرىن پاش ەتۋدە «ۆەرنيساج» كورمەسىنە قويىلعان بۇيىمدارى كوپشىلىكتى ءتانتى ەتسە، مالازيادا وتكەن «Royal Selancor» school of Hard knocks فەستيۆالىنە قاتىسۋ جاس شەبەرلەردىڭ شىڭدالا تۇسۋىنە ىقپال ەتكەن ماڭىزدى شارالاردىڭ ءبىرى. «شەبەر-2015» جەتىنشى قازاقستان قولونەرشىلەر كونكۋرسىنىڭ «دارىندى باستاۋ» نوميناتسياسى بويىنشا جەڭىمپاز اتانۋى، «اڭىز دومبىرا» II رەسپۋبليكالىك شەبەرلەر بايقاۋىنىڭ 2-ءشى ورىن جۇلدەگەرى، «شەبەر-2016» سەگىزىنشى قازاقستان قولونەرشىلەر كونكۋرسى، ينديادا وتكەن «31 Surajkund international grafts mela» فەستيۆالى، سونداي-اق «Jetisu style» فەستيۆالىنە قاتىسۋى شەبەرحانا قورجىنىنداعى جەتىستىكتەرىنىڭ نىشانىنداي. ال وتكەن جىلى رايىمبەك اۋدانى جاس كاسىپكەرلەر فورۋمىنىڭ العىس حاتىنا، سونداي-اق كەگەن اۋدانى 22 ناۋرىز كورمەسىنىڭ العىس حاتىنا يە بولسا، اۋدان اكىمىنىڭ العىس حاتىمەن ماراپاتتالىپ، بيىلعى جىلى اتىراۋدا وتكەن «ۇكىلى دومبىرا» بايقاۋىنان العىس حات الىپ قايتتى.

ەركەبۇلان سوۆەتبەك ۇلى ءار بۇيىمعا ەرەكشە ىزدەنىس پەن شىعارماشىلىق ءادىس-تاسىلدەردى قولدانۋدىڭ ماڭىزدى ەكەندىگىن ايتا وتىرىپ، شەبەر ءۇشىن دە شەبەرلىگىن شىڭداپ وتىرۋ قاجەت دەپ سانايدى. وسى باعىتتا الماتى قۇرىلىس جانە حالىقتىق كاسىپشىلىك كوللەدجىن ءتورتىنشى دارەجەدەگى مۋزىكالىق اسپاپتاردى جاساۋشى ماماندىعى بويىنشا ءتاماماداپ، VERSUS اكادەمياسىنىڭ بيزنەس كۋرسىن اياقتادى.

بۇگىندە ەركەبۇلان جاساعان ۇلت اسپاپتارى ەلىمىز ساحنالارىنىڭ كوركىنە اينالعان.

الماتى