ايماقتار • 19 تامىز، 2019

كىتاپحانا – قازىنا مەكەنى

151 رەتكورسەتىلدى

قازىرگى كەزدە الەمدە كىتاپ وقۋ جونىنەن ءبىرىنشى ورىندا – اعىلشىندار، ەكىنشى ورىندا – نەمىستەر، ءۇشىنشى ورىندا – امەريكالىقتار، ءتورتىنشى ورىندا جاپوندار تۇر ەكەن. وكىنىشكە قاراي، عالامشاردىڭ وقۋ «سوققان» تۇرعىندارىنىڭ قاتارىنان قازاقتاردى ىزدەۋگە ءالى ەرتە. دەرەكتەر ەل تۇرعىندارىنىڭ 57 پروتسەنتى عانا تۇراقتى تۇردە كىتاپ وقيتىنىن ايعاقتايدى.

الايدا، بۇل ايعاققا بولا قازاقتان قارا تانىمايتىن حالىق جاساۋعا اسىقپاۋ كەرەك. اقىلماندار وي-ءورىسى قالىپتاسقان ۇلت رۋحاني ازىقتى تالعاممەن تۇتىناتىنىن ەسكەرتەدى، ياعني، زيالىنىڭ دەڭگەيى وقىپ، تاۋىسقان كىتاپ سانىمەن ەمەس، سانعا قونىمدى مازمۇندى اقپاراتقا قانىعۋمەن ولشەنەدى ەكەن. جالپى، كىتاپ وقۋ ءۇشىن جاعداي كەرەك. وسى جەردەن وتاندىق كىتاپ ءىسىنىڭ، باسپا مەن تارالىم، تاعى دا باسقا اۆتور مەن وقىرماننىڭ اراسىنداعى مىڭ ءتۇرلى ماسەلە «مەن مۇندالاپ» شىعا كەلەدى. ونى قوزعاۋ باسقا تاقىرىپتىڭ ەنشىسىنە قالسىن. قازىرگى سوزىمىزگە كىتاپحانالاردىڭ ارقاۋ ەتەلىك. ءارى الىس اۋىلداعى شاعىن كىتاپحانا تۋرالى...

الماتى وبلىسىنىڭ ۇيعىر اۋدانىنا قاراستى قالجات اۋىلىنىڭ كىتاپحاناسى 2007 جىلى اشىلعان. 50 شارشى مەتر اۋماققا عانا ورنالاسقان بۇل وقىرمان ءۇيى اۋىلداعى 2424 تۇرعىننىڭ رۋحاني ورلاسى ىسپەتتى. ونىڭ ىشىندە 733 ادام تۇراقتى تۇردە كىتاپ جازدىرىپ الىپ وقيدى ەكەن.

- كىتاپحانا – قاي داۋىردە دە قوعامنىڭ مادەني ءومىرىنىڭ بىردەن-ءبىر كورسەتكىشى، وتكەن تاريحىمىزدى وشىرمەي، ۇلت جادىن ماڭگىلىك ساقتايتىن مەكەن بولىپ ەسەپتەلىپ كەلەدى. وسى قاسيەتتى ءىستى جالعاستىرۋ ءۇشىن كىتاپحانا ءىسى مەن كىتاپحاناشىلار دا زامان تالابىنا بەيىمدەلىپ، ۇنەمى جەتىلىپ وتىرۋى كەرەك. ءبىزدىڭ اۋىلدىق كىتاپحانامىز شاعىن بولعانىمەن، ىزدەنگەن ادامعا رۋحاني قورەگىن تاۋىپ بەرەتىن وقىرمان وتاۋى. قازىر ەل بويىنشا كىتاپحانا قىزمەتىن جەتىلدىرۋ، جاڭعىرتۋ جۇمىسى قىزۋ ءجۇرىپ جاتىر. كىتاپحاناشىلاردىڭ جۇمىسىن وڭتايلاندىرۋ ماقساتىندا كىتاپحانالاردىڭ اۆتوماتتاندىرىلعان اقپاراتتىق جۇيەسى ەنگىزىلدى. س.سەيفۋللين اتىنداعى الماتى وبلىستىق امبەباپ كىتاپحاناسىنىڭ اكىمشىلىگى مەن ماماندارىنىڭ كومەگى ارقىلى 2014 جىلى اۋىلدىق كىتاپحاناعا «كابيس» باعدارلاماسى قويىلدى. بۇل كىتاپ قورىنىڭ ساقتالۋىن قامتاماسىز ەتۋ، قورعا قولجەتىمدىلىكتى كەڭەيتۋ، جالعىز دانا باسىلىمدارعا دەگەن وقىرمانداردىڭ سۇرانىسىن قاناعاتتاندىرۋعا مۇمكىندىك بەرەتىن باستى باعىتتاردىڭ ءبىرى رەتىندە قۇجاتتاردى ساندىق تۇرگە كوشىرۋ جۇمىستارى جاپپاي جۇرگىزىلۋدە، - دەيدى قالجات اۋىلدىق كىتاپحاناسىنىڭ ديرەكتورى ايدا تۇرسىنوۆا.

ادەتتە، وقىرمان مەن كىتاپحانا اراسىنداعى جاراسىمدى جالعاستىققا كىتاپحاناشى جاۋاپتى بولسا كەرەك. ياعني، كىتاپحاناشىنىڭ ءبىلىمى مەن بىلىگى، مىنەزى مەن ءوز ءىسىن سۇيە ءبىلۋى سياقتى كاسىبي قاسيەتى قاشاندا باعالى. وسى قالجان اۋىلىنىڭ كىتاپحاناشىسى سانام سيديروۆا سونداي قادىرلى ماماننىڭ ءبىرى ەكەن. كىتاپحانا اشىلعان العاشقى كۇننەن بەرى ەڭبەك ەتىپ كەلە جاتقان كىتاپحاناشىنى وقىرماندار ەرەكشە سىيلايدى. اۋىلدىڭ جاسى دا، جاسامىسى دا ول وتكىزگەن مادەني شارادان قالماۋعا تىرىسادى ەكەن. بىلتىر تاۋەلسىزدىك كۇنىنە وراي «تاۋەلسىزدىك - ۇلتتىڭ ورلەۋدىڭ ۇلى كۇشى» اتتى كىتاپ كورمەسى جانە تانىمدىق ساعاتتار مەن اۋعان سوعىسىنىڭ قاسىرەتىن پاش ەتەتىن «جۇرەكتەگى جارا»، «وشپەس ەرلىك ۇرپاققا مۇرا» اتتى كىتاپ كورمەلەرى ناتيجەلى ءوتتى.

- قازىرگى زاماننىڭ دامۋىنا قاراي اقپاراتتى جان-جاقتى اۋديو، بەينە، ينتەرنەت جۇيەسى ارقىلى جىلدام الۋعا مۇمكىندىك تۋعانىمەن، كىتاپحانا ارقىلى ادەبي كىتاپتاردى وقي وتىرىپ الاتىن ءبىلىم مەن سالاماتتىلىق ورنى ەرەكشە. ۇرپاق تاربيەلەۋدە كىتاپحانانىڭ الاتىن ورنى ەرەكشە. «ادام ءوزىن كىتاپپەن دوس بولا باستاعان شاقتان باستاپ قانا ينتەلليگەنتپىن دەپ ساناۋىنا بولادى» دەپتى ۇلى جازۋشى مۇحتار اۋەزوۆ. ياعني، كىتاپ – تەڭدەسى جوق اسىل قازىنا بولسا، ونىڭ مەكەنى – كىتاپحانا، - دەيدى قالجان اۋىلىنىڭ كىتاپحاناشىسى سانام سيديروۆا.

 

الماتى وبلىسى

سوڭعى جاڭالىقتار

ءۇي جانۋارىنان ۆيرۋس جۇعا ما؟

كوروناۆيرۋس • بۇگىن، 18:39

التىن قورىمىز كوبەيىپ كەلە جاتىر

قازاقستان • بۇگىن، 17:30

اقمولادا تاعى ءبىر ناۋقاس انىقتالدى

كوروناۆيرۋس • بۇگىن، 16:07

قارعىن سۋ بالكاشيندى باسىپ قالدى

ايماقتار • بۇگىن، 16:05

تاسقىننىڭ بۇگىنگى احۋالى

ايماقتار • بۇگىن، 15:42

سالەحاردتان كەلگەن تسيكلون

ايماقتار • بۇگىن، 15:30

ەلوردادا جالپى جاعداي تۇراقتى

كوروناۆيرۋس • بۇگىن، 14:50

فۋتبول ماۋسىمى جالعاسا ما؟

سپورت • بۇگىن، 14:48

ۇقساس جاڭالىقتار