ينفراقۇرىلىم جۇيەلەرى تولىق تارتىلماي جاتىپ, پايدالانۋعا بەرىلگەن كوپقاباتتى ءۇي تۇرعىندارىنىڭ جەرگىلىكتى بيلىككە وكپەسى قارا قازانداي.
ء«ۇشىنشى مەگاپوليس دەپ ماقتانىپ جاتامىز. ال قالانىڭ جاڭا شاعىن اۋدانىندا ءالى ءجونى ءتۇزۋ اسفالت جول جوق. اكىمدىكتەگىلەر شاھاردىڭ ورتالىق بىرنەشە كوشەسىن بەزەندىرۋدەن ارى اسا المادى», دەپ كۇيىنەدى تۇراندىقتار.
انىعىندا, ناۋرىز ايىندا پرەزيدەنت تاپسىرماسىنا وراي پرەمەر-مينستر اسقار مامين باستاعان ۇكىمەت مۇشەلەرى وسى شاعىن اۋداننىڭ ينجەنەرلىك ينفراقۇرىلىم جوباسىمەن تانىسقان بولاتىن. سول كەزدە ءاپ-ادەمى تاقتايداي ءتۇزۋ جول قاعازعا تۇسىرىلگەنىمەن, قارا جەرگە ءالى توسەلە قويمادى.
ۇكىمەت باسشىسىنىڭ الدىندا تۇراننىڭ تاڭعاجايىپ بولاشاعى تۋرالى بايانداعان ەكس-اكىم عابيدوللا ءابدىراحىموۆ شاعىن اۋداندا جالپى ۇزىندىعى 33,7 شاقىرىم بولاتىن 13 ماگيسترالدى اۆتوجولدىڭ قۇرىلىسى قارالىپ, 13 جۇمىس جوباسى جاسالدى دەگەن بولاتىن. نەگىزگى ماگيسترال بايدىبەك بي داڭعىلىنان 2-3 شاقىرىم جەردە «اديا» جانە «وتاۋ ستروي» تۇرعىن ءۇي كەشەندەرى ورنالاسقانىن ەسكەرە وتىرىپ, العاشقى كەزەڭدە جالپى ۇزىندىعى 7,8 شاقىرىم بولاتىن №1, 2 جانە 7 كوشەلەردىڭ, 21 مىڭ شارشى مەتر جاياۋ جۇرگىنشىلەر جولى مەن 23 مىڭ شارشى مەتر ۆەلوجولدىڭ قۇرىلىسىن باستاۋ تۋرالى شەشىم قابىلدانعان.
ەكىنشى كەزەڭدە جالپى ۇزىندىعى 16,7 شاقىرىم بولاتىن, جاياۋ جۇرگىنشىلەر جانە ۆەلوجولدارى بار 5 كوشەنىڭ (№3, 4, 5, 6 جانە 10) قۇرىلىسى جوسپارلانۋدا. جوبانى جۇزەگە اسىرۋ ءۇشىن «وڭىرلەردى دامىتۋ – 2020» باعدارلاماسى بويىنشا, ۇلتتىق ەكونوميكا مينيسترلىگىنە 5,4 ملرد تەڭگە كولەمىندە قارجى ءبولۋ ءۇشىن بيۋدجەتتىك سۇرانىستار جىبەرىلگەن.
ءۇشىنشى كەزەڭدە جالپى ۇزىندىعى 9,1 شاقىرىم بولاتىن قالعان 5 كوشەنىڭ (№8, 9, 11, 12 جانە 13) قۇرىلىسى قارالعان. جوبانىڭ قۇنى – 1,9 ملرد تەڭگە. بۇعان قوسا جالپى قۇنى 10,4 ملرد تەڭگە سوماعا سۋمەن جابدىقتاۋ, سۋ وتكىزۋ, ەلەكتر جانە گازبەن جابدىقتاۋ جەلىلەرىن تارتۋ قاجەت بولعان.
الايدا وسى جوبانىڭ كوبىنىڭ قۇرىلىسى ءالى تۇرالاپ تۇر. شىلدە ايىندا سول كەزدەگى قالانىڭ ەكس-اكىمى عابيدوللا ءابدىراحىموۆ تۇران شاعىن اۋدانىنداعى №1, №2 جانە №7 جاڭا كولىك جولدارىنىڭ قۇرىلىسىمەن تانىسقان-تۇعىن.
وكىنىشكە قاراي كەزىندە بەي-بەرەكەت ساتىلعان جەر تەلىمدەرىنىڭ سالدارىنان جول بولىگى تۇسەتىن جەرلەرگە تۇرعىندار ءۇي تۇرعىزىپ العان. وسىنى ەسكەرگەن قالا باسشىسى №1 كوشەسىندەگى جوبا بويىنشا جولعا تۇسەتىن جەر تەلىمدەرىن الۋ ماسەلەسىندە تۇرعىندارمەن اقىلداسا كەلە, جوباعا وزگەرىس ەنگىزىپ, بۇزىلۋى ءتيىس 14 ۇيگە تيىسپەيتىن بولعان. ناتيجەسىندە ۇيلەردى اينالا جول سالۋ تۋرالى شەشىم قابىلداعان. ءارى وسى جولداردى بيىل قاراشا ايىندا اياقتاپ, 1 قازانعا دەيىن ءۇش جولدى ءتۇيىستىرىپ, ىشكى جولدارمەن قوعامدىق كولىك جۇرەتىن بولادى, دەپ سەندىرگەن ەدى.
مىنە, ناۋرىزدا حالىققا ءۇيىپ-توگىپ ۋادە ەتىلگەن ۋاقىتتىڭ دا ساناۋلى مەرزىمى قالدى. ازىرگە شاعىن اۋدان تۇرعىندارى الداعى كۇندەردەن ءۇمىتىن ۇزبەي شاڭداق جولمەن قاتىناپ ءجۇر.
شىمكەنت
