نۇر-سۇلتان قالاسىندا وتكەن جايدارمان ويىندارىنىڭ رەسپۋبليكالىق جاستار جازعى فەستيۆالىنە ەلىمىزدىڭ ءار ايماعىنان ونەر كورسەتۋگە نيەتتى توپتار سانى جىل ساناپ ارتىپ كەلەدى. بيىلعى سايىسقا جوعارى ليگادا باق سىناپ جاتقان جايدارمان جۇلدىزدارى مەن جاس كوماندالاردان قۇرالعان 15 توپ قاتىستى. ونەرلەرى مەن تاپقىرلىقتارى تەڭ تۇسكەن جايدارمان توپتارىنا دانا نۇرجىگىت, باقتيار ارتاەۆ, داۋلەت كارىبەك, باقتيار ماكەن, ەرلان اڭداسباەۆ ەسىمدى تۇلعالار قازىلىق ەتتى.
اتالعان ويىندا قازاقستان تەمىرجولى ۇلتتىق كومپانياسىنىڭ قۇراماسى, «ماڭعىستاۋ.kz», «مەديۋم» تاراز قالاسى, «كۆارتال» ورال قالاسى, «قازاقپىز عوي» پاۆلودار قالاسى, «اق قۇراماسى» سەمەي قالاسى, «برەند» قوستاناي قالاسى, «اۋەزوۆ قۇراماسى» سەمەي قالاسى, «سارىارقا قۇراماسى» نۇر-سۇلتان قالاسى, كازاتك – الماتى قالاسى, «گراتسيا» نۇر-سۇلتان قالاسى, «جارلىوزەك» الماتى وبلىسى, «ەكونوم كلاسس» اقتوبە قالاسى, «مەد ۋنيۆەر» سەمەي قالاسى, «دارىن» قوستاناي قالاسى جانە «قازالى» قىزىلوردا وبلىسى كوماندالارى باق سىناپ, كورەرمەندەردىڭ كوڭىىن كوتەرۋگە تىرىستى.
سايىس قورىتىندىسى بويىنشا جۇلدەلى ءۇشىنشى ورىندى ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيەتىنىڭ جاستارىنان قۇرالعان «ەكونوم كلاسس» كومانداسى يەلەنسە, كۇمىس جۇلدە ياعني ەكىنشى ورىن ەلوردانىڭ «سارىارقا قۇراماسىنا» بۇيىردى. ال رەسپۋبليكالىق دەڭگەيدە العاش رەت ساحنا تورىنە شىققان شىعىس قازاقستاندىق «اق» كومانداسى «جازعى فەستيۆال جەڭىمپازدارى» اتانىپ, ۇلكەن كۋبوكتى يەلەندى. حالىقارالىق جاستار كۇنىنە ارنالعان سايىس جوعارى دەڭگەيدى ءوتىپ, وسىلايشا جاس كوماندالاردىڭ جايدارمان الەمىندەگى قاناتتارىنىڭ كەڭگە جايىلۋىنا مۇمكىندىك بەردى.
